کیلیفورنیا : گوگل نے مصنوعی ذہانت (اے آئی) کی مدد سے انتہائی دھندلی تصاویر کو واضح اور بلند معیار دینے کا کامیاب تجربہ کیا ہے۔ یہاں تک کہ بعض تصاویر میں آنکھیں اور دیگر نقوش غائب ہیں لیکن گوگل الگورتھم نے اسے بڑی خوبصورتی سے مکمل کر دکھایا ہے
اس حوالے سے گوگل نے اپنے بلاگ میں اس ٹیکنالوجی کی تفصیلات اور بعض تصویری مثالیں دی ہیں۔ گوگل میں اے آئی کا ایک الگ سے شعبہ ہے جو کئی میدانوں میں متحرک ہے۔ اس نئی ٹیکنالوجی کو ’ہائی فائڈیلٹی امیج جنریشن یوزنگ ڈیفیوژن ماڈل‘ کا نام دیا گیا ہے۔ اس کی بدولت پرانی، غیر واضح اور دھندلی تصاویر کو بالکل نیا کیا جاسکتا ہے
اہم بات یہ ہے کہ اسی ٹیکنالوجی کو سی سی ٹی وی کی وڈیوز اور تصاویر واضح کرنے کے لیے بھی استعمال کیا جاسکتا ہے۔ دوسری جانب طبی عکس نگاری کے معیار کو بڑھا کر مرض کی شناخت اور مریضوں کی جان بچانے میں بہت مدد مل سکے گی۔ ڈیفیوژن ماڈل سے صرف چند سیکنڈوں میں تصویر واضح اور صاف ہوجاتی ہے
گوگل کے مطابق یہ ٹیکنالوجی مصنوعی ذہانت استعمال کرتے ہوئے تصاویر سے نوائز (یعنی دانے) کم کرتی ہے اور اس دوران اے آئی بتاتی ہے کہ تصویر کےاجزا کس طرح مرتب ہوں گے اور اس طرح ایک واضح تصویر سامنے آتی ہے۔ اسے گوگل نے ”سپر ریزولیوشن براستہ ریپیٹڈ ریفائنمنٹ“ کا نام دیا ہے، جس کا مخفف ایس آر تھری ہے
اس کی بدولت تبدیل شدہ تصاویر دیکھ کر حیرت ہوتی ہے کیونکہ اصل کے مقابلے میں تبدیل شدہ تصاویر بہت واضح بنتی ہیں، بسا اوقات مشکل سے پہچانے جانے والے چہرے بالکل واضح ہوکر سامنے آتے ہیں.
