قاہرہ : سیلفی کا جنون کہیں یا انتہائی حماقت، قاہرہ میں ایک چور اپنی بےوقوفی کی وجہ سے اس وقت دھر لیا گیا، جب اس نے اسمارٹ فون سے لائیو وڈیو نشر کرنے والے ایک صحافی سے فون چھینا اور جلد بازی میں اپنی شکل بھی نشر کر دی
اس احمق ترین چور کی وڈیو اس وقت براہِ راست ہزاروں افراد نے دیکھی اور اسے گرفتار کر لیا گیا
تفصیلات کے مطابق محمد رجب نامی صحافی یوم سیون نامی نیوز ویب سائٹ کے لے لائیو اسٹریم کر رہے تھے، جو سوشل میڈیا پر نشر ہورہی تھی۔ اچانک موٹرسائیکل پر ایک شخص آیا اور صحافی کے ہاتھ سے جھٹکے سے فون چھین لیا۔ اس دوران اس نے فون اپنے چہرے کے سامنے پکڑا اور اس کی شکل بھی نشر ہو گئی، جس میں وہ سگریٹ پھونکتے ہوئے نظر آ رہا تھا. اس وڈیو کے بعد پولیس نے چور کو گرفتار کر لیا
یہ واقعہ مصر کے شہر شبرہ الخیمہ میں پیش آیا ہے جہاں زلزلے کے جھٹکے محسوس کئے گئے تھے۔ محمد رجب وہاں ایک پل پر لائیو رپورٹنگ کررہے تھے کہ چور نے موقع کا فائدہ اٹھا کر ان سے فون چھین لیا
اس دوران لائیو ٹرانسمیشن میں فون ہلا اور اچانک ایک نوجوان کی ویڈیو ظاہر ہوئی جو اس چور کی تھی جس نے فون چھین لیا تھا۔ دلچسپ بات یہ ہے کہ فیس بک پر لائیو اسٹریم میں موجود کئی شہریوں نے اسے پہچان بھی لیا کیونکہ اس وقت بیس ہزار افراد اسے دیکھ رہے تھے۔ بعض افراد نے کہا کہ یہ واقعہ بہت مضحکہ خیز بھی تھا
دیکھتے ہی دیکھتے وڈیو بہت وائرل ہوئی جس پر 45 ہزار افراد نے اپنی رائے بھی دی ہے۔ پولیس نے 24 گھنٹے میں چور کو پکڑ لیا جو خود کو بیروزگار بتاتا ہے اور اس نے چوری شدہ فون ایک تاجر کو فروخت کرنے کا اعتراف بھی کیا ہے.
