پاکستان میں گاڑیوں کی قیمتوں میں اضافے اور خام مال کی درآمد میں رکاوٹوں کے باعث گاڑیوں کی فروخت میں کمی ریکارڈ کی گئی ہے۔ اس کمی کے پیش نظر سوزوکی پاکستان نے ہزار سی سی گاڑی ویگن آر کی بکنگ پر مفت رجسٹریشن کروانے کی پیشکش کی ہے
سوزوکی پاکستان نے یہ اعلان اپنی ویب سائٹ اور سوشل میڈیا پلیٹ فارمز کے ذریعے کیا ہے۔
ویب سائٹ کے مطابق سوزوکی ویگن آر کے تمام ویرئنٹس کی بکنگ پر رجسٹریشن بالکل مفت کی جائے گی۔ سوزوکی پاکستان کی یہ آفر محدود مدت کے لیے ہے
واضح رہے کہ یہ پیشکش ایک ایسے موقع پر سامنے آئی ہے، جب سوزوکی پاکستان کی گاڑیوں کی فروخت میں مسلسل کمی دیکھی گئی ہے۔ اگست کے مہینے میں سوزوکی ویگن آر کے صرف 365 یونٹس فروخت ہوئے جبکہ گزشتہ سال اگست میں ایک ہزار 679 یونٹس فروخت ہوئے تھے
یہاں یہ بات بھی قابل ذکر ہے کہ پاکستان میں سوزوکی سب سے زیادہ گاڑیاں فروخت کرنے والی کمپنی کے طور پر جانی جاتی ہے تاہم مسلسل دو ماہ سے کمپنی کی گاڑیوں کی فروخت میں ریکارڈ کمی دیکھی گئی ہے
پاکستان آٹو موٹو مینوفکچررز ایسوسی ایشن کے اعداد و شمار کے مطابق گزشتہ برس اگست کے مقابلے میں رواں برس اگست کے مہینے میں ملک بھر میں گاڑیوں کی فروخت میں 50 فیصد تک کمی ریکارڈ کی گئی ہے۔ جبکہ رواں برس اگست میں مجموعی طور پر 8 ہزار 980 گاڑیاں فروخت ہوئیں جبکہ جولائی میں یہ تعداد 10 ہزار سے زائد تھی
پاکستان میں سب سے زیادہ فروخت ہونے والی کمپنی پاک سوزوکی کی کاروں کی فروخت میں سب سے زیادہ کمی دیکھنے کو ملی ہے۔ پاک سوزوکی کی کاروں کی فروخت میں سالانہ 67 فیصد اور ماہانہ 41 فیصد کمی ہوئی ہے۔
اگست میں انڈس کی کاروں کی فروخت میں بھی سالانہ31 فیصد کمی رہی۔ ہنڈا اٹلس کی فروخت میں سالانہ 44 فیصد جبکہ ماہانہ 29 فیصد کمی ہوئی۔ ہنڈائی کی کاروں کی فروخت میں سالانہ 171 اور ماہانہ 860 فیصد اضافہ ریکارڈ کیا گیا ہے
پاکستان آٹو مینوفیکچرز ایسوسی ایشن کے اعداد و شمار کے مطابق گزشتہ ماہ 1300 سی سی اور اس سے اوپر کی کاروں کی فروخت میں سالانہ بنیادوں پر 22 فیصد کمی ہوئی ہے
اسی طرح 1000 سی سی کاروں کی فروخت میں سالانہ 83 فیصد کمی ریکارڈ کی گئی ہے جبکہ ماہانہ بنیادوں پر 18 فیصد کمی ہوئی۔ 1000 سی سی سے کم کاروں کی فروخت میں سب سے زیادہ کمی دیکھنے میں آئی جس میں ماہانہ 49 فیصد اور سالانہ 59 فیصد کمی ریکارڈ کی گئی ہے۔
