خبر یا نیوز کی تعریف کی بات کی جائے تو کہا جاتا ہے کہ کتا انسان کو کاٹے تو خبر نہیں ہے، انسان کتے کو کاٹ لے تو خبر بنتی ہے
بھارتی ریاست اتر پردیش کے ضلع فرخ آباد میں خبر کی مذکورہ بالا تعریف پر پورا اترنے والا ایک اسی طرح کا واقعہ پیش آیا، جہاں ایک تین سالہ بچے نے ایک سانپ کو دانتوں سے چبا کر مار ڈالا
ٹائمز آف انڈیا کے مطابق یہ واقعہ ہفتے کے دن فرخ آباد کے گاؤں مدناپور میں پیش آیا، جہاں پریشان والدین مرے ہوئے سانپ کو ایک پلاسٹک کی تھیلی میں ڈال کر اپنے بچے کے ساتھ ہسپتال پہنچے
ہسپتال میں ڈاکٹروں نے بچے کو چوبیس گھنٹے اپنی نگرانی میں رکھا اور پھر حالت خطرے سے باہر ہونے کے سبب گھر جانے کی اجازت دے دی
تین سالہ اکشے اپنے گھر کے صحن میں کھیل رہا تھا، جب ان کی دادی نے اس کے چیخنے کی آواز سنی اور جب وہ وہاں پہنچیں تو انہیں مرا ہوا سانپ اپنے پوتے کے منہ میں لٹکا ہوا نظر آیا
بچے کی دادی سنیتا نے بتایا ”میں نے بچے کے منہ سے سانپ کو نکالا اور اس کا منہ صاف کیا، جس کے بعد میں نے بچے کے والدین کو اس واقعے کی اطلاع دی“
ان کا کہنا تھا کہ وہ ہسپتال جاتے وقت مرے ہوئے سانپ کو بھی اپنے ساتھ اس لیے لے گئے تاکہ ڈاکٹروں کو کیس سمجھنے میں آسانی ہو
بچے کا علاج کرنے والے ڈاکٹر محمد سلیم انصاری کا کہنا ہے ”میرے خیال میں جس سانپ کو بچے نے دانتوں سے چبا کر مارا، وہ زہریلا نہیں تھا“
خیال رہے بھارت میں سانپ کی تین سو سے زائد اقسام پائی جاتی ہیں، جس میں ساٹھ سے زائد انتہائی زہریلے ہوتے ہیں، جبکہ 180 سے زائد سانپ کی قسمیں وہ ہیں، جو بالکل زہریلے نہیں ہوتے
بھارتی ذرائع ابلاغ کے مطابق ملک بھر میں 2000 سے 2019 تک سانپ کے کاٹنے سے بارہ لاکھ اموات ہوئیں اور مرنے والوں میں 33 فیصد سے زائد پندرہ سال کی عمر سے چھوٹے بچے تھے۔
