میکسیکو سٹی : شمالی امریکا کے ملک میکسیکو کے شہر اوکساکا سے نو کلومیٹر کے فاصلے پر سانتا ماریا ڈیل ٹیول کے قصبے میں دنیا کا سب سے چوڑے تنے والا درخت موجود ہے جسے دیکھنے کے لیے دنیا بھر سے ہزاروں سیاح ہر سال وہاں کا رخ کرتے ہیں
یہ درخت ایک مقامی چرچ کے احاطے میں لگا ہوا ہے لیکن اس کے بارے میں کسی کو نہیں معلوم کہ یہ کب اگایا گیا تھا
اس بارے میں لوگ اپنے بزرگوں سے سنی ہوئی مختلف روایات بیان کرتے ہیں جن میں سے کچھ کے مطابق اس کی عمر چھ ہزار سال تک بتائی گئی ہے۔ البتہ حالیہ برسوں میں محتاط سائنسی اندازوں سے معلوم ہوا ہے کہ یہ ممکنہ طور پر چودہ سو سے سولہ سو سال تک پرانا ہوسکتا ہے
مقامی زبان میں اسے ’’ٹیول کا درخت‘‘ کہا جاتا ہے، جو اس قصبے کی شناخت بھی ظاہر کرتا ہے
پہلے سمجھا جاتا تھا کہ اس جگہ پر کئی درختوں کے تنے آپس میں مل گئے ہیں لیکن کچھ عرصہ پہلے کیے گئے جینیاتی تجزیئے سے معلوم ہوا ہے کہ یہ درحقیقت ایک ہی درخت ہے جس کا تعلق، درختوں کی نوع ’’مونٹیزوما سائپرس‘‘ Montenzuma Cypress سے ہے
اس کے تنے کا پھیلاؤ ایک سو اڑتیس فٹ جتنا ہے، جس کا احاطہ کرنے کے لیے کم از کم تیس بالغ افراد کو اپنے ہاتھ پھیلا کر، دائرے کی شکل میں اس کے گرد کھڑا ہونا پڑتا ہے
یونیسکو کی جانب سے 2000ع میں اسے عالمی ورثے میں شامل کر لیا گیا تھا، جس کے بعد سرکاری طور پر اس درخت کی حفاظت ہونے لگی ہے۔ل
اگرچہ ٹیول کے درخت کا تنا خاصا بے ہنگم ہے لیکن محتاط اندازے کے مطابق، اس کا قطر کم از کم چھیالیس فٹ جتنا ضرور ہے
اس کی اونچائی کے معاملے میں بھی ابہام ہے کیونکہ ماضی میں اس کی اونچائی ایک سو اکتالیس فٹ بتائی جاتی تھی لیکن 2005ع میں لیزر آلات کی مدد سے پیمائش کرنے پر معلوم ہوا کہ یہ اصل میں ایک سو سولہ فٹ اونچا ہے۔ تاہم اس کے بعد سے اب تک دوبارہ اس کی بلندی نہیں ناپی گئی
ڈیڑھ ہزار سال سے بھی زیادہ پرانا ہونے کے باوجود، ٹیول کا یہ درخت آج بھی ہرا بھرا ہے اور اس کے تنے کی چوڑائی میں بھی بڑی آہستگی سے، بتدریج اضافہ ہورہا ہے.
