جھاڑکھنڈ – بھارتی ریاست جھاڑکھنڈ میں دو کمسن بہن بھائی ایسے بھی رہتے ہیں، جن کی عمریں اگرچہ صرف تیرہ اور چھ سال ہیں، مگر وہ اپنے والدین سے بھی زیادہ بوڑھے اور عمر رسیدہ نظر آتے ہیں
بہن کا نام انجلی اور بھائی کا نام کیشو ہے، یہ دونوں بہن بھائی پیدائشی طور پر ایک ساتھ پروجیریا اور کیوٹس لیکسا نامی دو نایاب اور لاعلاج بیماریوں میں مبتلا ہیں
یہ پیدائشی بیماریاں ہیں، جن کی وجہ سے ایک بچہ ابتدائی عمر ہی سے نہ صرف بوڑھا دکھائی دینے لگتا ہے، بلکہ وہ اندرونی طور پر بھی بڑھاپے کے امراض میں مبتلا ہوجاتا ہے
اگرچہ ان میں سے ایک بیماری بھی بہت کم لوگوں کو ہوتی ہے، لیکن بدقسمتی سے انجلی اور کیشو ان دونوں بیماریوں کا ایک ساتھ شکار ہیں جس کے باعث ان کی زندگی بہت مشکل ہوگئی ہے
ان کے چہرے کی کھال عمر رسیدہ افراد کی طرح جھریوں سے بھری اور لٹکی ہوئی ہے، جبکہ یہ دونوں مختلف ایسی بیماریوں میں بھی مبتلا ہیں جو عموماً بڑھاپے میں لاحق ہوتی ہیں
اپنی اس ہیئت کی وجہ سے انجلی کو اسکول میں بھی دادی اماں، بڑی بی، بڑھیا اور اس جیسے نہ جانے کتنے ہی توہین آمیز القابات کا اکثر سامنا کرنا پڑتا ہے
عالمی میڈیا میں ان بہن بھائی کا قصہ پہلی بار 2016ع میں رپورٹ ہوا تھا جب انجلی سات سال کی اور کیشو صرف ایک سال کا تھا
اس رپورٹ میں ان بچوں کے والدین نے اپنے مسائل بیان کیے تھے اور بتایا تھا کہ وہ اتنے مالدار نہیں کہ اپنے بچوں کے لیے مہنگی دوائیں خرید سکیں
جب یہ خبر میڈیا میں آئی تو ’’کیئر ٹوڈے فنڈ‘‘ نامی ایک تنظیم نے ان سے رابطہ کرکے بچوں کے لیے دواؤں کا مفت بندوبست کیا
اس کے علاوہ، بچوں کے دوسرے اخراجات بھی اسی تنظیم نے اپنے ذمے لے لیے اور چہرے کی جھریاں کم کرنے کے لیے ان کی مفت سرجری بھی کروائی
اب چند روز قبل ان دونوں بچوں کی ایک نئی وڈیو بھی جاری کی گئی ہے، جس میں وہ پہلے کی نسبت بہتر دکھائی دے رہے ہیں جبکہ ان کے چہروں پر جھریاں بھی قدرے کم ہیں
وڈیو میں ان بہن بھائی کو کھیلتے کودتے اور پڑھتے ہوئے دکھایا گیا ہے، جس سے اندازہ ہوتا ہے کہ مخیر حضرات کے عطیے اور میڈیا میں آنے والی خبروں کی بدولت انہیں اپنی زندگی بہتر بنانے میں خاصی مدد ملی ہے.
