کوئٹہ: وزیر اعلیٰ بلوچستان میر عبدالقدوس بزنجو نے کہا ہے کہ ضلع چاغی میں پاک افغان سرحد کے قریب ڈرائیور کی ہلاکت کے خلاف ہونے والے احتجاجی مظاہرے کے دوران فائرنگ کے واقعے کی تحقیقات کے لیے مشترکہ تحقیقاتی ٹیم (جے آئی ٹی) تشکیل دے دی گئی ہے
منگل کو بلوچستان اسمبلی میں اظہار خیال کرتے ہوئے وزیراعلیٰ نے کہا کہ مختلف سیکیورٹی اداروں کے اہلکاروں پر مشتمل جے آئی ٹی مکمل تحقیقات کے بعد اپنی رپورٹ پیش کرے گی
تاہم انہوں نے مزید کہا کہ اگر تفتیش تسلی بخش نہ پائی گئی تو متوفی ڈرائیور کے اہل خانہ کو مطمئن کرنے کے لیے جوڈیشل کمیشن بنایا جا سکتا ہے اور واقعے میں ملوث قصوروار افراد کو انصاف کے کٹہرے میں لایا جائے گا
وزیراعلیٰ نے کہا کہ حکومت متاثرین کے لواحقین کو معاوضہ دے گی جبکہ چیف سیکریٹری، ایڈیشنل چیف سیکریٹری، ہوم سیکریٹری، آئی جی پولیس اور دیگر متعلقہ حکام نے بھی حقائق جاننے کے لیے علاقے کا دورہ کیا
میر عبدالقدوس بزنجو نے کہا کہ حکومت اس واقعے کے بارے میں جلد از جلد رپورٹ مرتب کرے گی، زخمیوں کو بہترین طبی امداد فراہم کی جارہی ہے اور اگر ضرورت پڑی تو انہیں کراچی کے ہسپتال میں منتقل کیا جائے گا
بلوچستان نیشنل پارٹی مینگل گروپ کے پارلیمانی لیڈر ملک نصیر احمد شاہوانی نے اسمبلی میں اظہار خیال کرتے ہوئے فائرنگ کے واقعے کی مذمت کی اور کہا کہ اس واقعے کی تحقیقات کے لیے جوڈیشل کمیشن بنایا جائے اور سانحہ کے ذمے داروں کو سزا دی جائے
وزیر اعلیٰ کے مشیر برائے امور داخلہ میر ضیااللہ لانگو نے کہا کہ حکومت واقعے کی تحقیقات کر رہی ہے، متوفی ڈرائیور کو رکنے کا اشارہ کیا گیا لیکن وہ نہیں رکا جس کے نتیجے میں ایک سیکیورٹی اہلکار نے ان پر فائرنگ کردی
