لاطینی امریکی ملک وینزویلا میں حکام ایک ایسے گروہ کی تلاش میں ہیں، جس کے بارے میں کہا جاتا ہے کہ وہ انڈیز کی پہاڑیوں میں ایک ’روحانی سفر‘ پر روانہ ہوا تھا
ان افراد کے رشتہ داروں کے مطابق ان لاپتہ افراد سے 22 اگست کے بعد سے کوئی رابطہ نہیں ہوا اور نہ ہی ان کی جانب سے کسی قسم کا کوئی پیغام موصول ہوا ہے
مقامی انتظامیہ کے ایک افسر نے بتایا کہ لاپتہ افراد کی تعداد سولہ سے بیس کے درمیان ہو سکتی ہے، لیکن مقامی میڈیا کے مطابق یہ تعداد اس سے زیادہ ہے
وینزویلا کی ٹچیرہ ریاست کے پہاڑی علاقوں میں گمشدہ افراد کی تلاش کے لیے ڈرونز اور کتوں کی بھی مدد لی جا رہی ہے
گمشدہ افراد کے پڑوسیوں نے مقامی اخبار ’لا نیشیون‘ کو بتایا کہ یہ سب مقامی لوگ تھے، جو کھانا اور کیمپنگ کا سامان لے کر پہاڑوں کی جانب یہ کہہ کر روانہ ہوئے تھے کہ وہ چار دن کے لیے ایک ’روحانی سفر‘ پر جا رہے ہیں
مقامی حکام کے مطابق گمشدہ افراد میں ایک نوزائیدہ بچے سمیت چند کم عمر بچے بھی شامل ہیں
منگل کو مقامی انتظامیہ نے لاپتہ افراد کی تلاش کے لیے ٹیموں کو اس مقام پر روانہ کیا تھا، جہاں مقامی لوگوں کے مطابق ان کو آخری بار دیکھا گیا تھا لیکن ان کو کوئی سراغ نہیں مل سکا
لا گریٹا کا یہ علاقہ تقریباً 4725 فٹ بلندی پر واقع ہے، جس کے قرب و جوار میں پہاڑیاں ہیں، جن کی بلندی نو ہزار فٹ تک جاتی ہے
علاقے کے میئر نے ان افراد کی گمشدگی کو ’بہت مشکوک‘ قرار دیتت ہوئے کہا ’اس بارے میں مختلف نظریات ہیں کہ کیا ہوا لیکن ہم حتمی طور پر اس وقت تک کچھ نہیں کہہ سکتے جب تک ہماری تفتیش مکمل نہیں ہو جاتی۔‘
لا گریٹا کے ایک پادری کے مطابق اس گروہ میں شامل تمام افراد ایک خاتون کے مرید تھے، جس کا دعویٰ تھا کہ اسے پر الہام ہوتا ہے
’لا نیشیون‘ کی رپورٹ کے مطابق یہ ستاون سالہ مذہبی خاتون ہی اپنے مریدوں کو اپنے ساتھ پہاڑوں پر لے کر گئیں تھیں اور انہوں نے دعویٰ کیا تھا کہ اس روحانی سفر میں ان کی ’خدا سے ملاقات‘ ہو گی
اخبار کے مطابق اس خاتون نے دعویٰ کیا تھا کہ یہ ملاقات ایک پہاڑی پر ہوگی، جو جوان پیبلو پینالوزا نیشنل پارک کے قریب اور ٹچیرہ اور میریڈا ریاست کے درمیان پہاڑیوں میں ہے
ایک اور مقامی اخبار نے گمشدہ افراد کے رشتہ داروں سے بات چیت کی اور لکھا کہ ان افراد کے مطابق یہ خاتون کوئی عام شخصیت نہیں
لانیشیون نے ایک شخص سے ان دعووں پر انٹرویو کیا، تو اس نے بتایا ’اس خاتون نے کئی لوگوں کو چرچ بھجوایا۔ وہ کہتی تھی کہ مسیح ہمارے اعمال کی وجہ سے خون کے آنسو روتے ہیں اور یہ کہ دنیا ختم ہونے والی ہے‘
مقامی چرچ کے پادری نے اتوار کو اپنے وعظ میں لوگوں کو تنبیہ کی کہ وہ ایسے جنونی لوگوں کی باتوں میں مت آئیں جو دنیا کے ختم ہونے جیسے دعوے کرتے ہیں۔
یہ خبر بھی پڑھیں:
جِم جونز اور 900 سے زیادہ امریکیوں کی ’اجتماعی خودکشی‘ کا دہلا دینے والا واقعہ!
