دنیا کی سب سے بڑی سوشل میڈیا ٹیکنالوجی کمپنی ’میٹا‘ نے فیسبک اور انسٹاگرام کو ایک ہی ایپلیکیشن سے چلانے کے نئے فیچر کی آزمائش شروع کر دی ہے
فیسبک کی جانب سے بلاگ پوسٹ میں بتایا گیا کہ ابتدائی طور پر ’اکاؤنٹس سینٹر‘ نامی فیچر تک محدود صارفین کو رسائی دی گئی ہے اور جلد ہی اسے عام صارفین میں بھی متعارف کرایا جا سکے گا
مذکورہ فیچر کے تحت اب صارفین فیسبک یا پھر انسٹاگرام کی ایپلیکیشن کے ذریعے دونوں ہی سوشل سائٹس کو استعمال کر سکیں گے
نئے فیچر کے تحت ابتدائی طور پر صارفین کو کسی بھی ایک ایپلیکیشن پر اپنے تمام اکاؤنٹس کو ایڈ کرنا پڑے گا، جس کے بعد وہ ایک ہی ایپ پر رہتے ہوئے دونوں ایپس کو استعمال کر سکیں گے
یعنی اگر کوئی فیسبک استعمال کر رہا ہوگا تو وہ اسی پر انسٹاگرام آئکون کو کلک کرکے وہیں پر ہی اپنے انسٹاگرام اکاؤنٹ پر جا سکے گا اور وہیں سے وہ پوسٹ بھی کرنے کا اہل ہوگا، جبکہ صارف کو ایک ہی ایپلیکیشن پر دونوں ایپس کے نوٹیفکیشن بھی موصول ہوں گے
مزید برآں نئے فیچر کے تحت صارفین کو مزید اکاؤنٹس بنانے کی اجازت بھی ہوگی اور صارفین تمام ہی اکاوٗنٹس کو ایک ہی ایپلیکیشن کے ذریعے کنٹرول بھی کر سکیں گے
بلاگ پوسٹ میں بتایا گیا ہے کہ ایک ہی ایپلیکیشن کے لاگ ان ہونے پر تمام اکاؤنٹس تک صارفین کو رسائی ہوگی اور صرف آئکون پر کلک کرنے پر صارف فیسبک سے انسٹاگرام پر جا سکیں گے یا پھر انسٹاگرام سے فیسبک پر آ سکیں گے
علاوہ ازیں مذکورہ فیچر کے تحت صارف کو اپنے تمام اکاؤنٹس کی معلومات الگ الگ بھی فراہم کی جائے گی اور صارف اپنی مرضی کے اکاؤنٹ کو استعمال کرسکیں گے
فیسبک کا مذکورہ فیچر ٹوئٹر کے ’ٹوئٹ ڈیک‘ سے ملتا جلتا ہے، جس کے ذریعے صارفین بیک وقت بہت سارے اکاؤنٹس کو استعمال کرنے کے اہل ہوتے ہیں۔
