سال 2019ع میں معروف ترین کیمبرج یونیورسٹی کے ڈیڈیکیٹڈ (پرعزم ترین) ٹیچر کا ایوارڈ جیتنے والے پاکستانی استاد احمد سایا نے ملک کا نام ایک بار پھر روشن کرتے ہوئے کیمبرج کی آفیشل ریاضی کی بک لکھنے کا اعزاز حاصل کر لیا
احمد سایا نے کیمبرج کی او لیول کی میتھمیٹکس (ریاضی) کی کورس بُک ڈین چالمرز کے ساتھ مشترکہ طور پر تحریر کی ہے اور 25 مئی کو اس کا باضابطہ طور پر اجرا کردیا گیا ہے
احمد سایا نے کتاب کی تحریر کو اپنے لیے باعث فخر قرار دیتے ہوئے اس اعزاز پر اللہ کا شکر ادا کیا اور اپنی اس کامیابی کو والدین اور اہل خانہ کی دعاؤں کا نتیجہ قرار دیا ہے
کتاب کے نئے ایڈیشن پر روشنی ڈالتے ہوئے انہوں نے کہا کہ یہ وہ پہلی کتاب ہے جو نصاب کے مطابق بنائی گئی ہے، اس سے قبل جتنے بھی پبلشرز کی جتنی بھی کتابیں آئیں وہ نصاب کے مطابق نہیں تھیں
انہوں نے کہا کہ دوسرا یہ کہ اس کتاب میں پریکٹس کے ساتھ ساتھ ایکٹیوٹی بیسڈ لرننگ (سرگرمی پر مبنی تعلیم) کو بھی مدنظر رکھا گیا ہے، عام طور پر ریاضی کی کتابوں میں یا تو پریکٹس مٹیریل زیادہ ہوتا ہے یا ایکٹیوٹی بیسڈ لرننگ ہوتی ہے، دونوں چیزیں متوازن طور پر نہیں ہوتیں لیکن اس کتاب میں دونوں کو اہمیت دی گئی ہے
ان کا کہنا تھا کہ کتاب میں مضامین کی ترتیب 2025 کے نصاب کے عین مطابق ہے، اسے استعمال کرنے کے دو طریقے ہیں، پہلا یہ کہ اسے گریڈ 10 اور 11 یعنی دو سال میں استعمال کیا جاسکتا ہے، دوسرا طریقہ ایک سال میں اسے مکمل پڑھانے کا ہے کیونکہ پاکستان میں طلبہ کو او لیول کے آخری سال میں پورا نصاب ایک ساتھ پڑھنا ہوتا ہے اس لیے طلبہ اس کتاب کو مکمل پڑھ کر اپنے امتحان کی تیاری کر سکتے ہیں
احمد سایا نے کہا کہ اس کتاب کی ایک خصوصیت یہ بھی ہے کہ دیگر پبلشرز کی کتابوں میں مضامین بےترتیب ہیں، مثلاً ایک مضمون کئی کتابوں میں موجود ہے لیکن اس کتاب میں ایک مضمون کے تمام حصوں کو یکجا کردیا گیا ہے
یاد رہے کہ پرعزم ترین ٹیچر کا ایوارڈ جیتنے کے حوالے سے کیمبرج یونیورسٹی کی ویب سائٹ پر شائع ہونے والی تفصیلات میں کہا گیا تھا کہ احمد سایا طلبہ کی تعمیر و ترقی میں اپنا کردار ادا کرنے والے سال 2019 کے بہترین استاد ہیں
عالمی شہرت یافتہ جامعہ نے ڈیڈیکیٹڈ ٹیچرز ایوارڈ 2019 کے لیے دنیا بھر سے 4 ہزار اساتذہ کو نامزد کیا گیا تھا جس میں سے پچاس کو شارٹ لسٹ کیا گیا
ان شارٹ لسٹ کیے گئے اساتذہ میں سے آخری چھ کے درمیان حتمی مقابلہ ہونا تھا، جس میں سب سے زیادہ ووٹ احمد سایا کو ملے جس کے ساتھ ہی وہ سال کے بہترین استاد کا ایوارڈ جیتنے میں کامیاب ہوئے تھے
احمد سایا گزشتہ بیس سال سے زائد عرصے تعلیم و تدریس کے شعبے سے وابستہ ہیں جنہوں نے جعفر پبلک اسکول اور فاؤنڈیشن پبلک اسکول سے اپنی ابتدائی تعلیم مکمل کرنے کے بعد اکاؤنٹنگ اور ریاضی کا اپنا شوق پورا کرنے کے لیے آکسفورڈ بروکس یونیورسٹی برطانیہ سے اپلائیڈ اکاؤنٹنگ میں گریجویشن مکمل کیا
بعد ازاں انہوں نے انسٹی ٹیوٹ آف بزنس منیجمنٹ (آئی او بی ایم) سے ماسٹرز کی ڈگری حاصل کی اور اس وقت ڈاکٹریٹ کی ڈگری حاصل کر رہے ہیں
اس وقت احمد سایا اے لیول کے مختلف اسکول اور کالجز سے وابستہ ہیں جو اکاؤنٹنگ اور ریاضی کے استاد ہونے کے ساتھ ساتھ او اینڈ اے لیول کے اساتذہ کے لیے ٹریننگ کا بھی اہتمام کرتے ہیں
وہ سائیکومیٹرک ٹیسٹنگ اور کاؤنسلنگ کے ادارے ’ریویل پاکستان‘ کے چیف آپریٹنگ افسر (سی او او) بھی ہیں جہاں وہ طلبہ کی صلاحیتوں کو ابھارنے اور ان کی کمزوریوں کو سامنے لانے میں ان کی مدد کرتے ہیں تاکہ وہ صحیح سمت میں جاتے ہوئے اپنے کیریئر کا انتخاب کر سکیں۔
