سری دیوی کے قتل کا الزام، بونی کپور نے پانچ برس بعد خاموشی توڑ دی

بھارت کے نامور پروڈیوسر بونی کپور نے حال ہی میں اپنی اہلیہ آنجہانی اداکارہ سری دیوی کے پانچ سال قبل ہونے والی المناک موت کے بارے میں بات کی ہے۔ انڈین میڈیا سے تازہ انٹرویو میں بونی کپور کا کہنا تھا کہ اداکارہ کی موت طبعی نہیں بلکہ حادثاتی تھی اور انہیں دبئی پولیس سے کلین چٹ لینے کے لئے مختلف اقسام کے ٹیسٹوں سے گزرنا پڑا تھا

یاد رہے کہ ہندوستانی سنیما کی لیجنڈ سری دیوی کا انتقال 2018ع میں اپنے بھتیجے کی شادی میں شرکت کے دوران دبئی میں اپنے ہوٹل کے کمرے میں ہوا تھا۔ ان کی موت کے حوالے سے پہلے یہ دعویٰ کیا جاتا رہا کہ وہ حرکت قلب بند ہونے کی وجہ سے چل بسیں، تاہم جب پوسٹ مارٹم رپورٹ سامنے آئی تو ان کی موت کو حادثاتی قرار دیا گیا۔

ان کی موت کا سبب بے ہوش ہونے کے بعد باتھ ٹب میں ’حادثاتی طور پر ڈوبنا‘ قرار دیا گیا تھا۔ اس وقت دبئی پولیس کی جانب سے جاری پوسٹ مارٹم رپورٹ کے مطابق، ان کے خون کے نمونے میں الکحل کی علامات پائی گئی تھیں

بونی کپور، جنہوں نے پہلے اس واقعے کے بارے میں عوامی سطح پر خاموشی برقرار رکھی تھی، نے دی نیو انڈین پر ایک حالیہ پوڈ کاسٹ میں اس پر نظر ثانی کی

انہوں نے انکشاف کیا کہ سری دیوی نمک سے پرہیز کرنے والی غذائیں استعمال کرتی تھیں۔ بونی کپور کے مطابق سری دیوی نے سخت ترین ڈائٹ کی وجہ سے اپنی صحت خراب کر دی تھی اور وہ اکثر فاقے کیا کرتی تھیں تاکہ اسمارٹ نظر آئیں

انہوں نے بھارتی میڈیا کے ’دباؤ‘ کی وجہ سے سری دیوی کی موت کے بعد دبئی پولیس کی جانب سے پوچھ گچھ کا بھی ذکر کیا

بونی کپور نے بتایا ”سری دیوی کی موت قدرتی نہیں بلکہ حادثاتی تھی، میں نے فیصلہ کیا تھا کہ میں اس بارے میں بات نہیں کروں گا، اُس وقت مجھ سے 24 تا 48 گھنٹے کی پوچھ گچھ کی گئی۔ دبئی پولیس نے مجھے بتایا کہ انہیں مجھ سے پوچھ گچھ کے عمل سے گزرنا پڑا کیونکہ ہندوستانی میڈیا کا دباؤ تھا۔ میں نے کہا، ٹھیک ہے، میرے پاس اس سے زیادہ کہنے کو کچھ نہیں ہے، جو میں پہلے ہی کہہ رہا ہوں۔“

انہوں نے بتایا کہ دبئی پولیس پر انڈین میڈیا کا بہت زیادہ دباؤ تھا لیکن انہیں جلد اندازہ ہو گیا کہ میری طرف سے کوئی غلط کام نہیں کیا گیا ہے

بونی کپور نے بتایا کہ دبئی پولیس نے ان سے سختی سے پوچھ گچھ کی اور انہیں جھوٹ پکڑنے والا ٹیسٹ لینا پڑا۔ پوسٹ مارٹم رپورٹ میں کہا گیا کہ یہ ڈوبنے سے حادثاتی موت تھی

انہوں نے سری دیوی کے بارے میں بات کی کہ وہ اپنی فلموں کے لیے ایک سخت ڈائٹ پلان پر عمل پیرا تھیں ”وہ اچھا نظر آنا چاہتی تھی کیونکہ جب آپ اسکرین پر ہوتے ہیں، تو آپ بہت زیادہ وسیع نظر آتے ہیں اور وہ اس بات کو یقینی بنانا چاہتی تھی کہ اسکرین پر اچھی شکل برقرار رکھنے کے لیے وہ اچھی فگر میں ہو۔ یہ صرف اس فلم کے لیے نہیں تھا جو وہ اس وقت کر رہی تھیں۔ وہ 46-47 کلوگرام پر آ گئی تھیں۔ آپ اسے فلم ‘انگلش ونگلش’ میں دیکھیں گے۔“

اس نے جاری رکھا، ”اس واقعے سے پہلے، وہ کئی مواقع پر بلیک آؤٹ ہو چکی تھیں اور ڈاکٹر اسے کہتے رہے، ’آپ کا بی پی (بلڈ پریشر) کم ہے، اس لیے سخت غذا پر عمل نہ کریں اور نمک سے پرہیز کریں۔‘ یقین کریں کہ نمک پانی کی برقراری کو بڑھاتا ہے اسی لیے آپ کو سوجن محسوس ہوتی ہے۔ یہ ایک وجہ تھی۔ میں نے ان سے یہ بھی کہا کہ نمک سے مکمل پرہیز نہ کریں اور سلاد کھاتے وقت ایک چٹکی بھر نمک شامل کرے۔“

ان کے انتقال کے بعد، تیلگو اداکار ناگارجنا نے بونی کو بتایا کہ سری دیوی ان کے ساتھ ایک فلم کی شوٹنگ کے دوران کریش (یا بہت کم کیلوری والی) غذا پر تھیں ”ان کی بدقسمت موت کے بعد، ناگارجن تعزیت کے لیے ہمارے گھر آیا اور انہوں نے مجھے بتایا کہ جب وہ ان کے ساتھ فلم کر رہی تھیں تو وہ کریش ڈائیٹ پر تھیں۔ اسے یاد آیا کہ وہ باتھ روم میں گر گئی تھیں اور ان کے دانت ٹوٹ گئے تھے، جو مصنوعی ’کیپ‘ تھے“

انہوں نے کہا کہ سری دیوی نے پچھلی فلم میں بھی ایسی ہی سختی کا مظاہرہ کیا تھا ”یہاں تک کہ پنکج پراشر کی ایک فلم کے دوران جو کبھی مکمل نہیں ہوئی تھی، انہیں بھی ایسی ہی پریشانی کا سامنا کرنا پڑا۔ ناگارجن نے مجھے کیا بتایا اس سے میں واقف نہیں تھا۔ لیکن میں پنکج پراشر کے حالات سے واقف تھا۔ یہ ایسی چیز نہیں تھی جو میں سری سے پوچھوں۔ لیکن میں جانتا تھا کہ ان کا یہ رجحان سخت غذا پر تھا، جہاں انہوں نے نمک چھوڑ دیا تھا‘‘

بونی کپور نے بتایا ”میں اپنے ڈاکٹر کو کہتا تھا اور پھر میں ان (سری دیوی) پر رات کے کھانے کے دوران زور دیتا تھا کہ (نمک کے استعمال کو مکمل طور پر روکنے کے خلاف) جیسے ’نمک کے بغیر سوپ‘ اور ’نمک کے بغیر کھانا۔‘ بدقسمتی سے، انہوں نے اسے سنجیدگی سے نہیں لیا اور ہم نے یہ بھی سوچا کہ یہ اس وقت تک سنجیدہ نہیں ہو سکتا جب تک یہ واقعہ نہیں ہو جاتا۔“

بھارتی فلم نگری میں پیار، تکرار اور دوسری شادی ایسے معاملات ہیں جن سے تقریباً ہر ہی جوڑا گزرتا ہے فرق صرف اتنا ہے کہ کوئی ان سب سے گزر کر بھی ایک ساتھ رہتا ہے اور کچھ جوڑے طلاق کو واحد راستہ سمجھ کر علیحدگی اختیار کر لیتے ہیں اور نئے راستے پر چل نکلتے ہیں۔

اسی طرح بالی ووڈ ہدایتکار بونی کپور کی بھی زندگی ان ہی تمام معاملات سے گزری

رواں سال مئی میں بھارتی معروف اداکارہ روینہ ٹنڈن نے اپنے ایک انٹرویو میں بتایا تھا کہ وہ بھارتی ہر دلعزیز اداکارہ سری دیوی اور بونی کپور کی پہلی اہلیہ مونا کپور دونوں کی اچھی دوست تھیں

روینہ نے بتایا کہ سری دیوی اور وہ خود بہت اچھے دوستانہ رشتے سے بندھے ہوئے تھے اور ان کے ہمراہ گزرا ہوا وقت بے حد خوشگوار ہوتا تھا

روینہ ٹنڈن اور سری دیوی نے 1994 میں ریلیز ہونے والی فلم ’لاڈلا‘ میں ایک ساتھ کام کیا تھا

اداکارہ نے اپنے اور سری دیوی کے اچھے تعلقات کے متعلق بتاتے ہوئے ایک واقعے کا ذکر کیا کہ سری دیوی کے ساتھ کی گئی فلم کے دوران روینہ سری دیوی سے پہلے سیٹ پر پہنچ کر تیار ہو جاتی تھیں لیکن ایک دن وہ تیار ہو ہی رہی تھیں کہ سری دیوی نے ان کی وین کے دروازے پر کھٹکھٹایا اور کہا ’کیا تم تیار ہو چکی ہو؟ میری وین میں آجاؤ، وہاں میرے ساتھ بیٹھو‘

اداکارہ نے بتایا کہ انہیں یاد ہے کہ جن دنوں بونی کپور اور سری دیوی رشتۂ محبت سے منسلک نہیں ہوئے تھے تب سب لوگ انہیں یہ بات کہہ کر چھیڑا کرتے تھے کہ روینہ کو سری دیوی کی وین میں جانے کی اجازت کیسے ملی ہوئی ہے

روینہ نے یہ بھی بتایا کہ انہوں نے اور ان کے شوہر انیل نے اپنی شادی کے بعد جس جوڑے کو سب سے پہلے اپنے گھر پر دعوت دی، وہ سری دیوی اور بونی کپور ہی تھے اور دونوں جوڑے ایک ساتھ تفریح کے لیے بھی نکلتے تھے

روینہ کا کہنا تھا کہ سری دیوی ان پر بہت بھروسہ کرتی تھیں اور اپنے حوالے سے باتیں بھی بتاتی تھیں لیکن ایک وہ وقت بھی آیا کہ جب بونی کپور نے مونا کپور کو طلاق دے کر سری دیوی سے شادی کرلی اور اس دوران روینہ کے لیے معاملات بہت مشکل ہوگئے تھے

اداکارہ نے بتایا کہ وہ اس پورے مسئلے میں خاموشی اختیار رکھنے کی کوشش کرتی تھیں، کیوں کہ صرف سری دیوی ہی نہیں بلکہ مونا کپور بھی ان کی بہت اچھی دوست تھیں لہٰذا روینہ کئی برسوں تک اپنی دونوں دوستوں کے درمیان اس پیچیدہ معاملے میں پھنسی رہیں

اداکارہ نے افسوس کا اظہار کرتے ہوئے کہا کہ وہ دونوں ہی خوبصورت روحوں کی حامل خواتین تھیں جو بہت جلد ہی دنیائے فانی سے کوچ کر گئیں۔

واضح رہے کہ مونا کپور کا انتقال 2012 میں ہو ا جبکہ اداکارہ سری دیوی 2018 میں دنیا کو خیر آباد کہہ گئیں

آنجہانی اداکارہ سری دیوی نے 1978 میں اپنے فلمی کریئر کا آغاز فلم ’سولہواں ساون‘ سے کیا تھا

ان کی مشہور ترین فلموں میں ’چاندنی‘، ’لمحے‘، ’مسٹر انڈیا‘، ’خدا گواہ‘ ’صدمہ‘ اور ’نگینہ‘ شامل ہیں

سری دیوی نے ہندی فلموں کے علاوہ جنوبی ہند میں تمل، تیلیگو، ملیالم، اور کنڑ زبانوں کی فلموں میں بھی کام کیا

سری دیوی نے فلم پروڈیوسر بونی کپور سے سال 1996 میں شادی کی تھی اور ان کی دو بیٹیاں خوشی کپور اور جھانوی کپور ہیں

اداکارہ کو 2013 میں حکومت کی جانب سے پدماشری اعزاز سے بھی نوازا گیا تھا۔ اس کے علاوہ وہ پانچ بار فلم فیئر ایوارڈ بھی حاصل کر چکی ہیں

سری دیوی نے 90 کی دہائی میں اپنے فلمی کریئر کو الوداع کہہ دیا تھا۔ بعد ازاں انہوں نے دوبارہ فلموں میں کام کرنا شروع کر دیا تھا۔