نئی دھات کی دریافت، بیٹری ٹیکنالوجی میں اہم پیش رفت متوقع!

سیمی کنڈکٹر میں بڑے پیمانے پر استعمال ہونے والے ایک خاص عنصر کی کثیر مقدار پر مشتمل ایک ایسی کچ دھات جو پہلے کبھی نہیں دیکھی گئی، چین میں دریافت ہوئی ہے، جس سے بیٹری ٹیکنالوجی میں نئی پیش رفت کی توقع ہے

ماہرین ارضیات کو شمالی چین کے اندرونی منگولیا سے نیوبوباوٹائٹ نامی نئی دھات کے اندر نایاب زمینی دھات نیوبیئم (niobium) ملی ہے۔
واضح رہے کہ یہ نایاب زمینی دھات بڑے پیمانے پر جیٹ انجنوں اور راکٹوں میں استعمال ہوتی ہے اور اس کے اندر کم درجہ حرارت پر کرنٹ کے غیر معمولی بہاؤ کی خصوصیات بھی دیکھی گئی ہیں

کچھ محققین نے کہا ہے کہ نیوبیئم سے بنی بیٹریاں روایتی لیتھیم آئن بیٹریوں کے مقابلے میں کئی فوائد رکھتی ہیں

اب تک نیوبیئم کا بنیادی ذریعہ کچ دھات کولمبائٹ رہی ہے، جو کینیڈا، برازیل، آسٹریلیا اور نائیجیریا میں بڑے پیمانے پر نکالا جاتا ہے۔ جبکہ چین اپنی اسٹیل کی صنعت کے لیے یہ عنصر تقریباً 95 فیصد درآمدات کے ذریعے حاصل کرتا ہے

اخبار ساؤتھ چائنا مارننگ پوسٹ کی رپورٹ میں بتایا گیا ہے کہ اگر ماہرین ارضیات یہ ثابت کر دیتے ہیں کہ نیوبوباوٹائٹ سے نیوبیئم کی کافی مقدار اور معیار نکالا جا سکتا ہے تو ماہرین کا کہنا ہے کہ اس سے چین کو ’خود کفیل‘ بنانے میں مدد مل سکتی ہے

چین کے سویلین اور فوجی جوہری پروگراموں کی نگرانی کے لیے ذمہ دار سرکاری ادارے چائنا نیشنل نیوکلیئر کارپوریشن کے مطابق نیوبوبوٹائٹ کو بین الاقوامی معدنیاتی ایسوسی ایشن کی درجہ بندی کمیٹی سے باضابطہ منظوری مل گئی ہے۔
برازیل کی میٹالرجی اینڈ مائننگ کمپنی (سی بی ایم ایم) جدید لیتھیم آئن بیٹریاں بنانے کے لیے نیوبیئم کے استعمال پر نئے منصوبوں پر کام کر رہی ہے

چین کی سرکاری خبر رساں ایجنسی شنہوا نے اس سال کے شروع میں اطلاع دی تھی کہ سی بی ایم ایم لیتھیم بیٹریوں میں اس نایاب زمینی عنصر کے استعمال کو بہتر بنانے کے لیے یونیورسٹیوں، تحقیقی مراکز اور بیٹری بنانے والوں کے ساتھ شراکت داری کر رہی ہے

نیشنل یونیورسٹی آف سنگاپور کے سینٹر فار ایڈوانسڈ ٹو ڈی مٹیریلز کے ڈائریکٹر انتونیو کاسترو نیٹو نے اس سال کے آغاز میں کہا تھا کہ توقع ہے کہ نیوبیئم بیٹریاں روایتی لیتھیم آئن بیٹریوں کے مقابلے میں کئی فوائد لائیں گی، جنہیں حفاظتی خطرات، مختصر لائف سرکل اور طویل چارجنگ ٹائم جیسے مسائل کا سامنا ہے

ڈاکٹر نیٹو نے کہا، ’ہم نے نیوبیئم گرافین بیٹریوں کی بہتری میں نمایاں پیش رفت کی ہے جو حفاظت، کارکردگی اور پائیداری میں گیم چینجر ثابت ہو رہی ہیں۔‘

محققین کا کہنا ہے کہ نیوبیئم گرافین بیٹریوں کی کارکردگی کا دورانیہ روایتی لیتھیم آئن بیٹریوں کے مقابلے میں دس گنا زیادہ ہو سکتا ہے، اس طرح وہ ایک اندازے کے مطابق تیس سال تک چل سکتی ہیں اور زیادہ پائیدار اور قابل اعتماد ہیں

انہوں نے بتایا کہ یہ بیٹریاں، جو فی الحال تیاری کے مراحل میں ہیں، دس منٹ سے بھی کم وقت میں مکمل طور پر چارج کی جا سکتی ہیں

سی بی ایم ایم بیٹریوں کے عالمی سربراہ روجریو ریباس نے ایک بیان میں کہا، ”چونکہ ان کی عمر طویل ہوتی ہے، لہٰذا نئی گرافین-نیوبیئم بیٹریاں موجودہ لیتھیم آئن بیٹریوں کے مقابلے میں مجموعی لاگت کو نمایاں طور پر کم کرتی ہیں اور الٹرا فاسٹ چارجنگ کی صلاحیت رکھتی ہیں۔ علاوہ ازیں، وہ بہترین حفاظت دیتی ہیں کیونکہ زیادہ درجہ حرارت میں بھی ان کے پھٹنے کا خطرہ نہیں۔“