آپ اس عجیب لیکن مانوس احساس سے ضرور آشنا ہوں گے۔ آپ نیند سے بیدار ہوتے ہیں اور چند لمحوں کے لیے ایسا لگتا ہے کہ آپ ابھی بھی اسی دنیا میں ہیں جہاں خواب چل رہا تھا۔
ممکن ہے آپ نیون روشنیوں سے جگمگاتے کسی خوبصورت شہر کے اوپر پرندے کی طرح اُڑ رہے تھے یا شاید آپ ایک بولنے والی بلی کے ساتھ اپنے ہائی اسکول کے الجبرا کے نمبر پر نہایت سنجیدہ گفتگو کر رہے تھے۔
خواب حیرت انگیز طور پر واضح تھا۔ گویا کسی فلم کا منظر ہو۔ اور عجیب بات یہ کہ وہ بہت اہم محسوس ہوتا تھا۔ لیکن پھر اچانک وہ خواب غائب ہو جاتا ہے۔
آپ جیسے ہی موبائل فون اٹھانے لگتے ہیں یا کسی کو وہ خواب سنانے کی کوشش کرتے ہیں، خواب کی پوری کہانی بکھرنے لگتی ہے۔ رنگ مدھم ہو جاتے ہیں، مناظر دھندلے پڑ جاتے ہیں اور جو بات چند لمحے پہلے بہت معنی خیز لگ رہی تھی، اب بے معنی محسوس ہونے لگتی ہے۔
یہ بالکل ایسا ہے جیسے آپ مٹھی میں پانی کو پکڑنے کی کوشش کریں۔ جتنا زور سے پکڑیں، پانی اتنی ہی تیزی سے انگلیوں کے درمیان سے نکل جاتا ہے۔ ذرا سوچیں تو یہ کسی حد تک ایک عجیب سانحہ نہیں؟
ہم اپنی زندگی کا تقریباً ایک تہائی حصہ نیند میں گزارتے ہیں۔ یعنی ہماری زندگی کے کئی برس ایسے گزرتے ہیں، جن میں ہمارا دماغ حیرت انگیز کہانیاں تخلیق کرتا ہے، ایسی کہانیاں جو کسی فلمی ایوارڈ یعنی آسکر (Oscar) کے قابل بھی ہو سکتی ہیں۔
یہ سب کچھ کائنات کے سب سے طاقتور سپر کمپیوٹر، یعنی ہمارے دماغ میں تخلیق ہوتا ہے۔ اور ہم ہر صبح اسے یوں ہی بھول جانے دیتے ہیں۔ لیکن اگر ایسا نہ ہو؟
سوچئے، اگر آپ صبح بیدار ہوں، اپنے بستر کے پاس رکھے ایک آلے پر سنک (Sync) کا بٹن دبائیں اور گزشتہ رات کے آر ای ایم خواب (REM Dream) کو سیدھا اپنی ٹی وی اسکرین پر دیکھ سکیں، جبکہ آپ سکون سے صبح کی چائے کی چسکیاں لے رہے ہوں۔
یہ خیال سننے میں کسی سائنس فکشن فلم یا سیریز جیسا لگتا ہے۔ لیکن حیرت کی بات یہ ہے کہ حقیقت میں ہم اس خیال کو جتنا تصور کرتے ہیں، اس سے کہیں زیادہ قریب پہنچ چکے ہیں۔ جی ہاں، اب ہم صرف خوابوں کو ریکارڈ کرنے کے بارے میں خواب نہیں دیکھ رہے، ہم اس کے لیے کیمرے بنانے کی کوشش کر رہے ہیں۔ تو سوال یہ ہے کہ اس سفر میں ہم اس وقت کہاں کھڑے ہیں؟
صاف الفاظ میں بات کی جائے تو ابھی ہم خوابوں کی ریکارڈنگ کے فور کے بلو رے (4K Blu-ray) مرحلے تک نہیں پہنچے۔ اگر کوئی ایسا دعویٰ کرے تو وہ مبالغہ ہوگا۔ فی الحال ہماری حالت تقریباً سن 1895 کی ابتدائی فلموں جیسی ہے—دانے دار، سیاہ و سفید اور خاموش۔ لیکن حیرت کی بات یہ ہے کہ یہ بھی کسی معجزے سے کم نہیں کہ آخر کسی خیال کو دیکھا کیسے جا سکتا ہے؟ یہ وہ سوال ہے جس نے سائنس دانوں کو کئی دہائیوں سے الجھا رکھا ہے۔
فی الحال سب سے قابلِ اعتماد طریقہ ایک ٹیکنالوجی ہے جسے فنکشنل میگنیٹک ریزونینس امیجنگ (Functional Magnetic Resonance Imaging — fMRI) کہا جاتا ہے۔ یہ وہ بڑی گول مشینیں ہوتی ہیں جن میں انسان کو ایک سلائیڈ پر لٹا کر اندر لے جایا جاتا ہے۔ یہ مشین دراصل دماغ میں خون کے بہاؤ کو ناپتی ہے۔ جب دماغ کا کوئی حصہ زیادہ سرگرم ہوتا ہے تو اسے زیادہ آکسیجن درکار ہوتی ہے، اور ایف ایم آر آئی (fMRI) اسی لمحے کو ایک روشن نقطے کی صورت میں ریکارڈ کر لیتی ہے۔
جاپان میں ایک حیرت انگیز تجربہ
سن 2013 میں جاپان کی ایک تحقیقاتی ٹیم نے ایک دلچسپ تجربہ کیا۔ انہوں نے رضاکاروں کو ایف ایم آر آئی اسکینر (fMRI Scanner) میں سلا دیا۔ جیسے ہی دماغی سگنلز سے اندازہ ہوتا کہ وہ خواب دیکھنا شروع کر رہے ہیں، محققین فوراً انہیں جگا دیتے اور پوچھتے: ”آپ نے ابھی کیا دیکھا؟“ یہ تجربہ سینکڑوں مرتبہ دہرایا گیا۔
سوچئے، ان رضاکاروں کی نیند کیسی رہی ہوگی، شاید انسانی تاریخ کی سب سے زیادہ پریشان کن راتیں!
پھر اس سارے ڈیٹا کو استعمال کرتے ہوئے سائنس دانوں نے ایک مصنوعی ذہانت (Artificial Intelligence — AI) کو تربیت دی۔ اور کمپیوٹر کو سکھایا گیا کہ اگر دماغی نمونہ X ہو تو اس کا مطلب ہے کہ انسان گھر دیکھ رہا ہے، اگر نمونہ Y ہو تو وہ سڑک کا سائن بورڈ دیکھ رہا ہے۔
کچھ عرصے بعد یہ اے آئی (AI) اتنی بہتر ہو گئی کہ وہ سوئے ہوئے انسان کے دماغی اسکین کو دیکھ کر تقریباً 60 فیصد درستگی کے ساتھ اندازہ لگا سکتی تھی کہ وہ خواب میں کیا دیکھ رہا ہے۔
یہ ابھی فلم نہیں تھی۔ یہ زیادہ تر ایک اعصابی کھیل جیسا تھا، گویا دماغ اور کمپیوٹر کے درمیان تصویری کھیل یا پکشنری (Pictionary) کھیلا جا رہا ہو۔
دماغ سے چہرے نکالنے کا تجربہ
آج تحقیق اس سے بھی آگے بڑھ چکی ہے۔ دنیا کے مختلف تحقیقی مراکز میں سائنس دان اب نیورل ڈیکوڈنگ (Neural Decoding) پر کام کر رہے ہیں۔
اس تجربے میں لوگوں کو اسکینر کے اندر مختلف چہروں کی تصاویر دکھائی گئیں۔ اے آئی (AI) نے یہ سیکھا کہ دماغ کا بصری حصہ ناک، آنکھوں اور ٹھوڑی کو دیکھ کر کس طرح ردعمل دیتا ہے۔
پھر اصل حیرت انگیز مرحلہ آیا۔ محققین نے کمپیوٹر کو صرف دماغی سرگرمی دکھائی اور کہا، ”اب وہ چہرہ دوبارہ بنا کر دکھاؤ، جسے یہ شخص دیکھ رہا تھا۔“ نتائج کسی بھوت کہانی جیسے لگتے تھے۔
تصاویر دھندلی تھیں، جیسے پانی میں لرزتا ہوا عکس۔ لیکن اس کے باوجود یہ انسانی تاریخ کی ایک غیر معمولی پیش رفت تھی۔ پہلی بار ہم نے کسی انسان کے دماغ کے اندر سے ایک حقیقی تصویر نکالنے کی کوشش کی۔
خوابوں کا فلمی ہدایتکار: مصنوعی ذہانت
اگر خوابوں کو فلم میں تبدیل کرنے کی بات کی جائے تو ایک اور اہم ٹیکنالوجی سامنے آتی ہے: اے آئی ویڈیو جنریٹرز (AI Video Generators) یہ وہ سافٹ ویئر ہوتے ہیں جو صرف ایک جملہ پڑھ کر مکمل ویڈیو بنا سکتے ہیں۔
مثلاً اگر آپ لکھیں، ”مریخ پر خلائی لباس پہنے ایک سنہری ریٹریور کتا“ تو اے آئی (AI) اس منظر کی ویڈیو تخلیق کر سکتی ہے۔ محققین کو اب احساس ہو رہا ہے کہ یہی ٹیکنالوجی خوابوں کو ریکارڈ کرنے کا گمشدہ کڑی بن سکتی ہے۔
خفیہ ترکیب: لیٹنٹ ڈفیوشن ماڈلز
سائنس دان دماغ کو کسی وی ایچ ایس ٹیپ (VHS Tape) کی طرح ریکارڈ کرنے کی کوشش نہیں کر رہے، کیونکہ دماغی ڈیٹا بہت شور والا اور پیچیدہ ہوتا ہے۔ اس کے بجائے وہ لیٹنٹ ڈفیوشن ماڈلز (Latent Diffusion Models) استعمال کرتے ہیں۔
اسے ایک مثال سے سمجھیں۔ فرض کریں آپ کسی مصور سے کہیں: ”میں نے ایک دھندلی سرخ شکل دیکھی جو شاید گاڑی تھی۔“ مصور صرف سرخ دھبہ نہیں بنائے گا۔ وہ اپنی معلومات استعمال کرتے ہوئے ایک خوبصورت فراری (Ferrari) کار بنا دے گا۔ اسی طرح اے آئی (AI) دماغ کے دھندلے سگنلز کو لے کر ایک واضح تصویر یا ویڈیو تخلیق کر سکتی ہے۔
اس کے پیچھے ریاضی کیا ہے؟
اس عمل میں کمپیوٹر لینیئر ریگریشن ماڈلز (Linear Regression Models) کے ذریعے دماغی ڈیٹا کے ووکسَلز (Voxels) کو اے آئی کے لیٹنٹ اسپیس (Latent Space) سے جوڑتے ہیں۔ یہ عمل عام طور پر چار مرحلوں میں ہوتا ہے:
1. فیچر ایکسٹریکشن (Feature Extraction) : اے آئی ہزاروں گھنٹوں کی ویڈیوز دیکھ کر کناروں، سائے اور حرکت کو پہچاننا سیکھتی ہے۔
2. انکوڈنگ (Encoding) : انسان وہی ویڈیوز دیکھتا ہے اور اسی دوران دماغی سرگرمی ریکارڈ کی جاتی ہے۔
3. پیش گوئی (Prediction) : جب انسان خواب دیکھتا ہے تو اے آئی دماغی سگنلز کو دیکھ کر اندازہ لگاتی ہے کہ کون سا منظر بن رہا ہے۔
4. جنریٹو اصلاح (Generative Refinement) : پھر جی اے این الگورتھم (GAN Algorithm) تصویر کو بہتر بنا کر مکمل ویڈیو میں تبدیل کرتا ہے۔
مستقبل کی مشینیں
مستقبل میں اس کے لیے حیرت انگیز ہارڈویئر بھی زیرِ تحقیق ہے۔
یوروگرین سینسر (Neurograins Sensors)
یہ نمک کے دانے کے برابر خردبینی چپس ہوں گے جو دماغی سگنلز وائرلیس طریقے سے ریکارڈ کر سکیں گے۔
ہائی ڈینسٹی نیورل پروب (High-Density Neural Probe)
باریک الیکٹروڈ دھاگوں کی مدد سے دماغی سگنلز کو انتہائی واضح انداز میں ریکارڈ کیا جا سکے گا۔
نینو بوٹس اور آپٹو جینیٹکس (Nanobots & Optogenetics)
ایک تصور یہ بھی ہے کہ نینو روبوٹس خون کے ذریعے دماغ تک پہنچیں اور ہر فعال نیورون کو روشنی کے ذریعے ظاہر کریں۔
سنہ 2050 کی ایک صبح
تصور کریں کہ سن 2050 میں ایک صبح کچھ یوں ہو
● آپ آر ای ایم نیند (REM Sleep) میں داخل ہوتے ہیں۔
● سینسر دماغ کے بصری اور سماعتی حصوں کی سرگرمی ریکارڈ کرتے ہیں۔
● اے آئی (AI) اس ڈیٹا کو ویڈیو میں بدل دیتی ہے۔
● جذبات کے مطابق رنگ اور ماحول کو بہتر بنایا جاتا ہے۔
● صبح آپ کو اطلاع ملتی ہے: ”آپ کا خواب، لامتناہی لائبریری، دیکھنے کے لیے تیار ہے۔“
لیکن اصل مسئلہ کیا ہے؟
اصل مشکل یہ ہے کہ خواب حقیقت میں ویڈیو نہیں ہوتے۔ جب ہم جاگتے ہوئے کسی درخت کو دیکھتے ہیں تو آنکھیں مسلسل ڈیٹا دماغ تک بھیجتی ہیں۔ لیکن خواب میں دماغ خود ہی یہ منظر تخلیق کرتا ہے۔ اسی لیے خواب اکثر بے ترتیب ہوتے ہیں۔ آپ اچانک کچن میں ہوتے ہیں اور اگلے لمحے جنگل میں۔ اگر خواب کو جوں کا توں ریکارڈ کیا جائے تو وہ شاید ایک عجیب اور ناقابلِ برداشت ویڈیو بن جائے۔
اس لیے اے آئی (AI) کو اسے قابلِ دید بنانے کے لیے تھوڑا ”درست“ کرنا پڑے گا۔ اور یہی وہ لمحہ ہے جہاں ایک دلچسپ فلسفیانہ سوال پیدا ہوتا ہے: اگر مشین خواب کو بہتر بنانے کے لیے اس میں تبدیلی کرے، تو کیا وہ اب بھی آپ کا خواب ہوگا؟ یا پھر وہ آپ کے لاشعور اور مشین کی مشترکہ تخلیق بن جائے گا؟
یہ بھی پڑھیں:
اگر کبھی کششِ ثقل ایک سیکنڈ کے لیے رُک جائے تو؟
کائنات کا خفیہ کوڈ: وہ دس اعداد اور نمبر، جنہوں نے دنیا بدل دی!
آج ہم کیا کر سکتے ہیں؟
فی الحال بھی چند طریقے موجود ہیں۔ مثلاً لوسیڈ ڈریمنگ (Lucid Dreaming) یعنی ایسا خواب جس میں انسان کو معلوم ہوتا ہے کہ وہ خواب دیکھ رہا ہے۔
اسی طرح ٹارگٹڈ میموری ری ایکٹیویشن (Targeted Memory Reactivation) کے ذریعے خوابوں کو کسی حد تک متاثر کیا جا سکتا ہے۔
مستقبل میں ممکن ہے خواب ویڈیو کی بجائے متن کی صورت میں محفوظ ہوں، جیسے: ”میں ساحل پر تھا۔۔۔ پانی جامنی تھا۔۔۔ اور میں کسی چابی کی تلاش میں تھا۔۔۔“
کیا یہ ہماری زندگی میں ممکن ہوگا؟
شاید اگلے منگل تک نہیں۔۔ لیکن انسان تیزی سے ایک ایسی دنیا کی طرف بڑھ رہا ہے جہاں خیال اور ڈیجیٹل میڈیا کے درمیان حدیں ختم ہو جائیں گی۔ ممکن ہے مستقبل میں ”میں اپنا خواب بھول گیا“ ایسا جملہ بن جائے جیسے آج ”مجھے راستہ نہیں معلوم“ (کیونکہ جی پی ایس — GPS موجود ہے) یا ”مجھے جواب نہیں معلوم“ (کیونکہ گوگل — Google موجود ہے)
شاید جلد ہی ہم اپنی راتوں کے سینما کے ہدایتکار بن جائیں۔ اور سچ پوچھیں تو ایک سوال ذہن میں ضرور آتا ہے: اگر آپ آج رات اپنی زندگی کا صرف ایک خواب ریکارڈ کر کے ٹی وی پر دیکھ سکتے۔۔ تو وہ کون سا خواب ہوتا؟ اور کیا آپ اسے کسی اور کو بھی دکھانا چاہیں گے؟
یہ بھی پڑھیں:
امریکہ کی نیندیں اڑانے والی ’ڈیپ سیک‘ کی پسِ پردہ کہانی
