فرانسیسی کمپنی نے خاص مٹیریئل سے ایک خیمہ بنایا ہے، جو مکمل واٹرپروف ، اوس، دھوپ اور برف کی شدت سے بچانے کی خصوصیات رکھتا ہے، بڑی بات یہ کہ اس کا وزن صرف ایک کلوگرام ہے اور اسے سمیٹا جائے تو یہ محض آٹھ انچ رہ جاتا ہے
اپنی جدت اور کم وزن کے ساتھ یہ کوہ پیما، سیاحوں اور پہاڑوں پر گھومنے پھرنے والے مہم جوؤں کے لیے ایک بہترین تحفہ بھی ہے۔ اسے ابھرتی ہوئی فرانسیسی کمپنی سامایا نے بنایا ہے جسے ایسوٹ ٹو الٹرا ٹینٹ کا نام دیا گیا ہے۔ یہ ٹینٹ کھل کر اتنا وسیع ہوجاتا ہے کہ اس میں دو افراد رہ سکتے ہیں۔
یہ خیمہ انتہائی قیمتی اور جدید فیبرک سے اسے بنایا گیا ہے اور خیمے کو ایستادہ رکھنے کے لیے اس میں مضبوط کاربن فائبر فریم فٹ ہوتا ہے
کمپنی کا دعویٰ ہے کہ الپائن سے لے کر ہمالیہ کے پہاڑوں تک ان کا ٹینٹ استعمال کیا جاسکتا ہے جو دشوار گزار اور موسمیاتی شدت سے بھرپور علاقے ہیں
خیمے کی دیواروں کو دو پرتوں سے بنایا گیا ہے، جس میں ڈائنیما کمپوزٹ کے ساتھ ساتھ مکمل واٹر پروف پولی ٹیٹرا فلورو ایتھائلین (پی ٹی ایف ای) نامی مادے سے بنا ایک باریک پردہ بھی لگا ہے۔ پی ٹی ایف ای کی بدولت اس میں تازہ ہوا آسکتی ہے لیکن بارش کا پانی باہر ہی رہ جاتا ہے
اپنی نوعیت کا یہ سب سے ہلکا خیمہ گھر ہے جو 20 ہزار ملی میٹر کی واٹر پروفنگ کی صلاحیت رکھتا ہے۔ اسے کاربن فائبر تاروں کی مدد سے خیمے کی شکل دی جا سکتی ہے
پانی اور کیچڑ کو دور رکھنے کے لیے اس میں ایکوا گارڈ نامی زپ لگائی گئی ہے، جو بند ہونے پر نمی کو باہر رکھتی ہے
ایسوٹ ٹو الٹرا نامی اس ٹینٹ کا وزن ایک کلو اور بیس گرام ہے جبکہ بلندی ایک میٹر ہے۔ بند ہونے پر اس کی چوڑائی 15 سینٹی میٹر اور اونچائی 20 سینٹی میٹر رہ جاتی ہے.
