اسلام آباد ہائی کورٹ نے منتخب عوامی نمائندوں کے خلاف نا اہلی کی درخواستیں سننے سے متعلق اسپیکر قومی اسمبلی اور چیئرمین سینیٹ سے رائے طلب کر لی ہے
گزشتہ روز اسلام آباد ہائی کورٹ کے چیف جسٹس اطہر منﷲ نے سابق صدر آصف زرداری اور فواد چوہدری نا اہلی کیسز پر سماعت کی
چیف جسٹس اطہر منﷲ نے ریمارکس دیے کہ جب متبادل فورم موجود ہیں، تو عدالت اس معاملے میں مداخلت کیوں کرے؟ پارلیمنٹ کو چاہیے کہ عدالتوں کو ایسے سیاسی نوعیت کے معاملات ملوث نہ کریں، اسپیکر قومی اسمبلی سے بھی اس معاملے میں رائے لے لیتے ہیں، ہم اسپیکر قومی اسمبلی ، چیئرمین سینیٹ سے پوچھتے ہیں ان کا طریقہء احتساب کیا ہے، اگر پارلیمنٹ خود منتخب نمائندوں کے احتساب کا نظام بنا لے تو معاملہ حل ہو سکتا ہے، یہ نہیں ہو سکتا کوئی بھی درخواست لائے اور عدالت منتخب نمائندے کی تفتیش شروع کر دے
ہائی کورٹ نے منتخب عوامی نمائندوں کے خلاف نا اہلی درخواستیں سننے سے متعلق اسپیکر قومی اسمبلی اور چیئرمین سینیٹ سے رائے طلب کرتے ہوئے پوچھا کہ کیا پارلیمان میں ایسے کیسز حل کرنے کا کوئی فورم موجود نہیں؟ اگر فورم موجود نہیں تو کیا اس پر کوئی قائمہ کمیٹی بنائی جا سکتی ہے؟ منتخب نمائندوں کے خلاف ایسی درخواستیں سننا عدالتوں کا کتنا اختیار ہے؟ ایک وزیر خارجہ کو ہم نے نا اہل قرار دیا، بعد میں وہ سپریم کورٹ سے بحال ہو گئے، اس دوران ان کے حلقے کے عوام اسمبلی میں نمائندگی سے محروم رہے
عدالت نے اٹارنی جنرل آف پاکستان کو بھی آئندہ سماعت کے لیے نوٹس جاری کرتےہوئے کیس کی مزید سماعت چھ اپریل تک ملتوی کردی۔
یاد رہے کہ اثاثے چھپانے پر آصف زرداری کی نااہلی کے لئے پی ٹی آئی رہنما عثمان ڈار اور خرم شیر زمان نے درخواست دائر کر رکھی ہے، جبکہ فواد چوہدری کو نا اہل قرار دینے کی درخواست نیوز اینکر سمیع ابراہیم نے دائر کر رکھی ہے.
