طویل مدتی ویزے پر بھارت گئے ہوئے ہندو خاندانوں سمیت ایک سو چوبیس پاکستانی شہری ایک سال سے بھی زائد عرصے کے بعد بھارت سے واپس لوٹ آئے
اس ضمن میں ملنے والی تفصیلات کے مطابق پاکستان سے مختلف اوقات میں کئی ہندو خاندان اپنے رشتے داروں سے ملنے انڈیا گئے تھے۔ یہ ہندو خاندان بھارت کے مختلف شہروں میں طویل مدتی ویزے پر مقیم تھے اور انہیں امید تھی کہ بھارتی حکومت انہیں شہریت دے گی، تاہم بھارتی خفیہ ایجنسیوں کے رویوں اور وہاں کے مقامی انتہا پسند ہندوؤں کی طرف سے ملنے والی دھمکیوں کے بعد ان ہندو خاندانوں کی واپس پاکستان لوٹنے کا سلسلہ شروع ہو گیا ہے
بدھ کے روز بھارت سے 124 پاکستانی شہری واہگہ بارڈر کے راستے واپس لوٹے، جن میں 80 سے زائد ہندو تھے ان کا تعلق سندھ کے مختلف اضلاع سے ہے
بھارت سے واپس آنے والے ہندو خاندانوں کے بارے میں بتایا گیا ہے کہ یہ نئی دہلی سمیت مختلف شہروں میں انتہائی کس مپرسی کی زندگی گزار رہے تھے۔ کئی خاندان ایسے تھے جو جھگیوں میں رہتے تھے، جہاں انہیں کوئی بنیادی سہولت میسر نہیں تھی۔ پاکستانی ہونے کی وجہ سے ان لوگوں کو مزدوری بھی نہیں دی جاتی تھی
واپس لوٹنے والے ہندو خاندانوں کے مطابق انہیں بھارتی خفیہ ایجنسیاں ہراساں کرتی تھیں جب کہ اونچی ذات کے انتہا پسند ہندو دھمکیاں دیتے تھے۔ پاکستان چھوڑ کر جانا ان کی بہت بڑی غلطی تھی
ہندو خاندانوں کے علاوہ کئی ایسے اردو بولنے والے پاکستانی شہری بھی واپس پلٹے ہیں جو زیارتوں اور رشتہ داروں سے ملنے انڈیا گئے ہوئے تھے۔ علاوہ ازیں مقبوضہ جموں و کشمیر سے تعلق رکھنے والے 12 طبا و طالبات بھی پاکستان پہنچے ہیں
دوسری جانب بھارتی حکام کی طرف سے فراہم کی گئی لسٹ کے مطابق 349 بھارتی شہریوں بشمول مقبوضہ کشمیر سے تعلق رکھنے والے شہریوں کو پاکستان آنا تھا، تاہم بھارت سے صرف 137 افراد واپس آئے ہیں جن میں 124 پاکستانی ہیں.
پاکستانی اور بھارتی شہریوں کی واپسی کے لئے واہگہ بارڈ کو خصوصی طور پر کھولا گیا، واضح رہے کہ کورونا لاک ڈاؤن کی وجہ سے دونوں ملکوں نے گزشتہ سال مارچ میں واہگہ سرحد بند کر دی تھی۔ اب مہینے میں صرف ایک دن بارڈر کھولا جاتا ہے۔ بھارت سے واپس آنے والے تمام افراد کو کورونا کے پیش نظر قرنطینہ میں منتقل کر دیا گیا ہے، جہاں ان کے کورونا کے ٹیسٹ کیے جائیں گے.
