ابوظہبی : ملتان سلطانز کے فاسٹ باؤلر لاڑکانہ ایکسپریس بائولر شاہ نواز ڈاھانی کا کہنا ہے کہ میری کوشش ہوتی ہے کہ کرکٹ کے ہر لمحے کا بھرپور مزہ لوں، پھر چاہے وکٹ ملے یا چھکا ملے، مسکراتے رہنے کی وجہ سے ہی مجھے کافی اعتماد ملتا ہے
ایک انٹرویو میں شاہنواز ڈاھانی نے کہا کہ فون کرنے والی سیلیبریشن کا مقصد دنیا کو یہ بتانا ہے کہ میں ٹاپ کرکٹ کے لئے تیار ہوں
انہوں نے کہا کہ پاکستان سپر لیگ کھیل کر مجھ میں کافی تبدیلی آئی اور بہت کچھ سیکھنے کو ملا ہے، میں بطور ایمرجنگ کھلاڑی ٹورنامنٹ میں آیا لیکن کھیلنے کے بعد میرے اندر کا ڈر نکل گیا ، میں نے پی ایس ایل میں سیکھا ہے کہ خود پر کیسے کنٹرول کرنا ہے، میری کرکٹ میں فرق ضرور آیا ہے لیکن میری شخصیت آج بھی ویسی ہی ہے جیسی پہلے تھی ، میری آج بھی کوشش ہوگی کہ اپنے گائوں والوں اور دوستوں کیلئے ہمیشہ ایسا ہی ڈاھانی رہوں
ان کا کہنا تھا کہ قومی ٹیم کیمپ میں وقار یونس سے بھی بہت کچھ سیکھنے کا موقع ملا۔ میں ریڈ بال اور وائٹ بال دونوں طرز کی کرکٹ سے لطف اندوز ہوتا ہوں
شاہنواز ڈاھانی نے کہا کہ کسی بھی سپورٹس مین کے لئے ورلڈ کپ میں اپنے ملک کی نمائندگی کرنے سے بڑی کوئی چیز نہیں ہوسکتی ہے۔ پاکستان کے لئے ورلڈ کپ میں کھیلنا میرا خواب ہے۔ اگر مجھے ٹی ٹونٹی ورلڈ کپ میں کھیلنے کا موقع ملا تو میں آپ کو یقین دلاتا ہوں کہ میں اپنی صلاحیت کو ثابت کرنے اور دنیا کو یہ بتانے کے لئے پوری کوشش کروں گا کہ میں بہترین کھلاڑیوں کی فہرست میں شامل ہوں
شاہنواز ڈاھانی نے اب تک پی ایس ایل کے 10 میچوں میں 20 وکٹیں حاصل کی ہیں اور وہ اس وقت ٹورنامنٹ میں سب سے زیادہ وکٹیں لینے والے بائولر ہیں ، پشاور زلمی کے کپتان وہاب ریاض 18 وکٹیں لے کر دوسرے نمبر پر ہیں۔ دونوں اب پی ایس ایل کے فائنل میں ایک دوسرے کے مدمقابل ہوں گے.
