کراچی : سندھ کے وزیراعلیٰ مراد علی شاہ نے بیالیسویں مشترکہ مفادات کونسل (سی سی آئی) کے فیصلے کے مطابق وفاقی حکومت کے زیر انتظام چلائے جانے والے 4192 نان فارمل اسکولوں کو ٹیک اوور کی منظوری دے دی اور اساتذہ کی 8000 سے 25000 روپے تک تنخواہوں میں اضافے کا فیصلہ کیا ہے
وزیر اعلیٰ سندھ نے یہ منظوری آج وزیراعلیٰ ہاؤس میں ایک اجلاس کی صدارت کرتے ہوئے دی۔ اجلاس میں وزیر تعلیم سعید غنی، مشیر قانون مرتضیٰ وہاب، چیف سیکریٹری ممتاز شاہ، وزیراعلیٰ سندھ کے پرنسپل سیکریٹری ساجد جمال ابڑو، سیکریٹری اسکول ایجوکیشن احمد بخش ناریجو، سیکریٹری آئی پی سی آصف اکرام، خصوصی سیکریٹری خزانہ بلال میمن اور دیگر نے شرکت کی
سی سی آئی کے بیالیسویں اجلاس میں فیصلہ کیا گیا کہ 30 جون 2021 سے قومی ترقیاتی کمیشن برائے انسانی ترقی (این سی ایچ ڈی) اور بیسک ایجوکیشن کمیونٹی اسکول (بی ای سی ایس) صوبائی حکومتیں سنبھال لیں گی
وزیر تعلیم سعید غنی نے وزیراعلیٰ سندھ کو بتایا کہ کُل 4192 سینٹر/ اسکول ہیں، جن میں 4425 اساتذہ اور 236755 طلباء کی انرولمنٹ ہیں، جن میں 1463 اساتذہ سمیت 61118 انرولمنٹ پر مبنی 1463 بی ای سی ایس سینٹر ہیں اور 2729 این سی ایچ ڈی سینٹر میں 2962 اساتذہ اور 175637 طلباء شامل ہیں
وزیراعلیٰ سندھ کو بتایا گیا کہ یہ اسکول/ سینٹر نان فارمل ایجوکیشن سسٹم کے تحت چلائے جارہے ہیں، جہاں رضاکارانہ بنیاد پر اساتذہ 8000 روپے ماہانہ معاوضے پر پڑھاتے ہیں۔ اس پر وزیراعلیٰ سندھ نے کہا کہ ان کی حکومت نے پہلے ہی کم سے کم اجرت 25000 روپے ماہانہ دینے کا اعلان کیا ہے، لہٰذا ان رضاکار اساتذہ کو ہر ماہ 25000 روپے دیے جائیں گے
محکمۂ خزانہ نے وزیراعلیٰ سندھ کو بتایا کہ 4425 اساتذہ کی تنخواہوں کو 8000 سے بڑھا کر 25000 روپے ماہانہ کرنے سے 1.327 ارب روپے کا مالی نقصان ہوگا۔ مراد علی شاہ نے مجوزہ رقم کی منظوری دی اور محکمہ کو ہدایت کی کہ وہ اس مقصد کے لیے سمری منتقل کرے
مراد علی شاہ نے محکمہ تعلیم کو بھی ہدایت کی کہ وہ اسکولوں کو فوری سنبھالیں اور تدریسی عملے سے اسکولوں کو فعال بنائیں
انہوں نے کہا کہ کچھ عرصے کے بعد اساتذہ کو ٹیسٹ دینے کا موقع فراہم کیا جاسکتا ہے اور جو اہل ہوں گے، ان کو ریگولر کیا جائے گا.
