ادویات کی قیمتوں میں اضافے کے بارے میں ڈاکٹر فیصل سلطان کی عجیب منطق

وزیر اعظم کے معاون خصوصی برائے صحت ڈاکٹر فیصل سلطان نے جان بچانے والی ادویہ کی قیمتوں میں اضافے کے فیصلے کا دفاع کرتے ہوئے کہا ہے کہ مارکیٹ سے غائب ہونے والی ادویات کی قیمتوں میں اضافہ کیا گیا

تفصیلات کے مطابق میڈیا سے بات کرتے ہوئے ڈاکٹر فیصل سلطان کا کہنا تھا کہ جن دواؤں کا ذکر ہو رہا ہے، وہ سستی لائف سیونگ اور پرانے فارمولے پر مبنی ہیں، یہ دوائیں قیمتوں پر مناسب تبدیلی نہ انے کی وجہ سے مارکیٹ سے غائب ہو جاتی ہیں

ڈاکٹر فیصل سلطان نے کہا کہ مارکیٹ میں ناپید ادویات کو تھوڑے سے اضافے کی ضرورت تھی ۔ قیمتوں میں مناسب اضافہ نہ ہونے کے باعث یہ دوائیں دستیاب نہیں ہوتیں۔ غائب ہونے والی دوائیں بلیک میں ملنے لگتی ہیں۔ وہ ادویات جو لوگوں کو مہنگی مل رہی تھیں، قیمتوں میں اضافے کے بعد اب مناسب وقت میں دستیاب ہونگی۔

معاون خصوصی برائے صحت نے مزید کہا کہ  حکومت اور ڈریپ کا کام دواؤں کی دستیابی کو یقینی بنانا بھی ہے۔ ہم نے ادویات کی قیمتیں اسی قدر بڑھائی ہیں کہ لوگوں تک پہنچ سکیں۔ ہم دوا ساز کمپنیوں کے دباؤ میں نہیں آئے۔ ایک نئی پرائسنگ پالیسی پر کام کر رہے ہیں۔

انہوں نے کہا کہ دواؤں کی قیمتوں کی لسٹ ویب سائٹ پر لگائی جائے گی۔ صحت کے تمام اداروں میں اصلاحات لانے پر بھی کام کر رہے ہیں.