کراچی : اولڈ ٹرمینل کے قریب واقع محکمۂ موسمیات کی آبزرویٹری پر بارشوں کی تیز ترین صورتحال کو جانچنے والا آٹومیٹک ویدر اسٹیشن (اے ڈبلیو ایس) نصب کر دیا گیا ہے
تفصیلات کے مطابق ڈیجیٹل خصوصیات کا حامل آٹومیٹک ویدر اسٹیشن اولڈ ایئرپورٹ، پہلوان گوٹھ کی سابقہ رین آبرزویٹری پر نصب کیا گیا ہے، شہر میں تیز ترین اے ڈبلیو ایس کو جاپان انٹرنیشنل کوآپریشن سینٹر کے تعاون سے نصب کیا گیا ہے
اس حوالے سے ڈائریکٹر محکمہ موسمیات سردار سرفراز کا کہنا ہے کہ ملک بھر میں جاپان کے تعاون سے 45 آٹومیٹک ویدر اسٹیشن نصب کیے جائیں گے، صوبائی دارالحکومت کراچی کے بعد 17 اے ڈبلیو ایس دیہی سندھ کے دیگر اضلاع جبکہ 27 پنجاب کے مختلف شہروں میں نصب ہوں گے
کراچی کے بعد اگلا اے ڈبلیو ایس لاہور جبکہ تیسرا اسلام آباد میں نصب کیا جائے گا
ان کا کہنا ہے کہ 45 اے ڈبلیو ایس پر 560 ملین (56 کروڑ) روپے کی لاگت آئی ہے، خطیر رقم جاپان نے فراہم کی ہے
آٹومیٹک ویدر اسٹیشن ماضی میں نصب کیے جانے والی اینالاگ آبزرویٹری کے ساتھ مل کر کام کرے گا
سردار سرفراز کے مطابق سابقہ آبزرویٹریز کے ذریعے ایک گھنٹے اور تین گھنٹے پر مشتمل بارشوں کے ڈیٹا کا حصول ممکن تھا، تاہم آٹومیٹک ویدر اسٹیشن کے ذریعے دس منٹ کی فریکوینسی کا ڈیٹا ریکارڈ ہوسکے گا، جو بعدازاں سرور پر منتقل ہوجائے گا
انہوں نے کہا کہ شہر میں نصب ہونے والے آٹومیٹک ویدر اسٹیشن کے بارے میں حتمی طور پر نہیں کہہ سکتے کہ یہ مون سون سے قبل فعال ہوگا یا رواں سال مون سون کی بارشوں کے بعد کام شروع کردے گا.
