ہمارے ملک میں موبائل فون پر کالز یا میسیجز کے ذریعے مختلف طریقوں سے پیسے بٹورنے کا حربہ کوئی نئی بات نہیں۔ یقیناً آپ کو بھی ’بے نظیر انکم ٹیکس پروگرام‘ کے نام پر پیسے ملنے یا کسی گیم شو میں انعام نکلنے کی ’خوش خبری‘ کے پیغامات کبھی نہ کبھی تو موصول ہوئے ہی ہوں گے اور پھر ایس ایم ایس کے زمانے کی ’ایزی لوڈ والی صبا‘ کو کون نہیں جانتا؟
لیکن رقم ہتھیانے کا یہ حربہ اب پرانا ہو چکا ہے اور لوگ بہت حد تک ہوشیار ہو گئے ہیں۔ یہی وجہ ہے کہ اب ’طریقہ واردات‘ بھی بدل رہا ہے اور گذشتہ کچھ عرصے میں ایمرجنسی کالز کے ذریعے معصوم شہریوں کو لوٹنے کے واقعات رپورٹ ہوئے ہیں
ایسے ہی فراڈیوں نے حال ہی میں عوامی نیشنل پارٹی کے مرکزی رہنما اور سابق سینیٹر الیاس بلور کو بھی لاکھوں کا چونا لگایا ہے
الیاس بلور نے بدھ کو تھانہ کینٹ راولپنڈی میں ایک ایف آئی آر درج کرائی ہے، جس میں انہوں نے بتایا کہ ”مجھے موبائل فون پر کال آئی اور کال کرنے والے نے تھانہ کینٹ راولپنڈی کے اے ایس آئی شاہ کے نام سے اپنا تعارف کرایا“
الیاس بلور کے مطابق ”اے ایس آئی نے بتایا کہ آپ کا بھانجا لڑکیوں کے ساتھ پکڑا گیا ہے، اے ایس آئی نے بھانجے سے میری بات کرائی جس نے کہا کہ مجھے بچا لیں، مجھ سے مختلف موبائل نمبرز پر دس لاکھ اٹھانوے ہزار روپے طلب کیے گئے“
”میں نے تصدیق کیے بغیر مختلف نمبروں پر رقم بھجوا دی، بعد میں بھانجے سے رابطہ کیا تو انہوں نے بتایا کہ وہ تو اپنی فیکٹری میں موجود ہیں اور ان کے ساتھ ایسا کچھ بھی نہیں ہوا“
پولیس نے الیاس بلور کے بیان کی روشنی میں فراڈ و ٹیلی گراف ایکٹ کے تحت نامعلوم افراد کے خلاف مقدمہ درج کرکے تفتیش شروع کردی ہے
واضح رہے کہ ہم سنگت میگ کے انہی صفحات پر اس طریقہ واردات کے بارے میں دسمبر 2021 میں آگاہ کر چکے ہیں۔ جسے آپ اس لنک پر پڑھ سکتے ہیں :
