جاپان میں سائنس دانوں نے کہا ہے کہ ہیومنوئیڈز (انسان نما روبوٹ) مستقبل میں ’زندہ انسانی جِلد‘ کی بدولت اور بھی زیادہ جاندار نظر آنے کے قابل ہوں گے
خبر رساں ادارے روئٹرز کے مطابق یونیورسٹی آف ٹوکیو سے منسلک سائنسدانوں نے ایک روبوٹک انگلی تیار کی ہے، جس کی جِلد بالکل انسانوں کی طرح ہے اور حیرت انگیز طور پر کسی زخم یا چوٹ لگنے کی صورت میں یہ خود ہی اس کو مندمل کرنے کی بھی صلاحیت رکھتی ہے
اس تحقیق کی قیادت کرنے والے یونیورسٹی کے پروفیسر شوجی تاکیوچی کہتے ہیں ”اصلی انسانی جِلد کی طرح، لیب میں تیار کی گئی یہ جِلد واٹر پروف ہے اور جب روبوٹک انگلی کو موڑا جاتا ہے تو اس میں جھریاں پڑ جاتی ہیں“
انہوں نے مزید کہا ”زندہ خلیوں کی موجودگی کا مطلب یہ ہے کہ روبوٹ سے ایسے کام لیے جاسکتے ہیں جو صرف زندہ خلیات یا بائیو میٹریلز کے لیے مخصوص ہوتے ہیں“
پروفیسر شوجی تاکیوچی بتاتے ہیں ”بائیو میٹریلز کے بارے میں حیرت انگیز بات یہ ہے کہ ان میں مختلف صلاحیتیں ہوتی ہیں، جیسے خود کو مندمل (مرمت) کرنا، تقسیم، پھیلاؤ، انتہائی حساس سینسنگ اور میٹابولزم“
بقول شوجی تاکیوچی ”ہم نے اس بار روبوٹ کی جسمانی شکل کو مزید انسانوں جیسا بنا کر کامیابیاں حاصل کی ہیں“
تاکیوچی اور ان کی ٹیم جلد میں اضافی خصوصیات شامل کرکے اس کام کو مزید بہتر بنانے کے لیے پُرامید ہے، جیسے کہ اعصابی یا رگوں کا نظام۔۔ اور اگر یہ مقصد حاصل ہو جاتا ہے تو ان کا خیال ہے کہ جلد کو مستقبل میں ٹرانسپلانٹیشن، کاسمیٹکس، منشیات کی جانچ یا مصنوعی اعضا کو ڈھانپنے وغیرہ جیسے مختلف مقاصد کے لیے استعمال کیا جا سکتا ہے۔
