جِلد کی کریمیں ہڈیوں کے ٹوٹنے کا باعث بن سکتی ہیں۔ نئی تحقیق
ایک نئی تحقیق میں بتایا گیا ہے کہ لاکھوں لوگوں کی طرف سے جلد کی بیماریوں جیسے کہ ایکزیما کے علاج کے لیے استعمال ہونے والی ادویات کی زیادہ مقداریں ہڈیوں کو پتلا کرنے والی بیماری آسٹیوپوروسس کے خطرے کو نمایاں طور پر بڑھا دیتی ہیں۔
تائیوان کے نیشنل تائیوان یونیورسٹی ہاسپٹل میں کی جانے والی تحقیق میں 8000 مریضوں کے میڈیکل ریکارڈز کا مطالعہ کیا گیا۔
تحقیق میں محققین کو معلوم ہوا کہ وہ افراد جنہوں نے کارٹیکوسٹیرائیڈز (خون کی شریانوں کو سکیڑنے اور سوزش کو کم کرنے کے لیے استعمال کی جانے والی کریمیں اور مرہم) استعمال کیے تھے، ان کے آئندہ پانچ سالوں میں آسٹوپوروسس میں مبتلا ہونے اور ہڈی فریکچر ہونے کے خطرات زیادہ تھے۔
وہ افراد جو زیادہ مقدار میں ادویات کا استعمال کرتے تھے، ان کے اس کیفیت میں مبتلا ہونے کے امکانات 34 فی صد زیادہ تو تھے ہی، لیکن وہ لوگ جنہوں نے کم مقدار میں دوا کا استعمال کیا، ان میں بھی اس کیفیت کے خطرات 22 فی صد زیادہ تھے۔
تحقیق میں خواتین مردوں کے مقابلے میں زیادہ مسائل کا شکار نظر آئیں۔
واضح رہے کہ انتہائی موثر اور انتہائی محفوظ ہونے کے باوجود، کورٹیکوسٹیرائڈز کو قلیل مدتی استعمال کے لیے ڈیزائن کیا گیا ہے کیونکہ اگر غلط طریقے سے استعمال کیا جائے تو یہ سنگین ضمنی اثرات کا سبب بن سکتے ہیں۔
یہ ادویات جسم کے کیلشیئم اور وٹامن ڈی استعمال کرنے کے طریقے کو بدل کر ہڈیوں کی بیماری اور کمزوری کا سبب بن سکتی ہیں
تحقیق کے مصنف چیا-یو چو کے مطابق جِلدی بیماریوں کے علاج کے لیے ٹوپیکل کورٹیکوسٹیرائیڈزکا استعمال انتہائی احتیاط سے کرنا چاہیئے اور معالجین کو ان کے ممکنہ نقصانات کا علم ہونا چاہیئے۔
