بیجنگ – خلا میں ایک سو اَسی سے زائد دنوں پر محیط طویل ترین مشن مکمل کرنے کے بعد تین چینی خلابازوں کی ٹیم واپس اپنے ملک میں لینڈ کر گئی ہے
تفصیلات کے مطابق خبر رساں ادارے اے ایف پی نے اپنی ایک رپورٹ میں بتایا ہے کہ مریخ پر گاڑی اور چاند پر خلابازوں کی تحقیقاتی ٹیم بھجوانے کے بعد شین زو 13 چین کا امریکا کے مقابلے میں تازہ ترین خلائی مشن ہے
ایک خاتون اور دو مردوں پر مشتمل اس خلائی مشن نے چین کے مقامی وقت کے مطابق ہفتے کی صبح دس بجے واپس زمین پر لینڈ کیا ہے
یاد رہے کہ گزشتہ سال اکتوبر میں شین زو 13 کو شمال مغربی چین میں واقع گوبی صحرا سے لانچ کیا گیا تھا۔
مشن میں شامل وانگ یاپنگ کو خلا میں جانے والی پہلی چینی خاتون کا اعزاز بھی حاصل ہے
تین خلابازوں پر مشتمل یہ ٹیم دو مرتبہ خلائی مرکز سے باہر نکل کر اسپیس واک مکمل کر چکی ہے اور خلائی اسٹیشن میں کئی سائنسی تجربوں کے علاوہ ٹیکنالوجی کو بھی ٹیسٹ کر چکی ہے
گزشتہ کئی ہفتے اس ٹیم نے مستقبل میں آنے والے مشن شین زو 14 کے لیے سامان کی تیاری میں لگائے ہیں، جس کی لانچ آئندہ چند ماہ میں متوقع ہے
چین کے تیانگونگ خلائی اسٹیشن کے حوالے سے خیال کیا جا رہا ہے کہ یہ آئندہ دس سال تک کام کرتا رہے گا
خلا بازوں کی یہ ٹیم تیانگونگ سٹیشن پر لینڈ کرنے والا دوسرا گروپ ہے
خیال رہے شین زو 13 کے مشن کمانڈر ژائے فائٹر پائلٹ بھی رہ چکے ہیں، جنہوں نے سال 2008ع میں پہلی اسپیس واک مکمل کی تھی، جبکہ ٹیم کے دوسرے رکن یی گوانگفو پیپلز لیبریشن آرمی کے پائلٹ رہ چکے ہیں
اس سے قبل گزشتہ سال چین کے شین زو 12 مشن نے تیانگونگ خلائی سٹیشن میں بانوے دن گزارے تھے.
