وفاقی وزیر برائے توانائی عمر ایوب نے کہا ہے کہ سندھ میں سترہ کلومیٹر کا ایک علاقہ ایسا ہے جو سندھ حکومت اگر ہمیں دے دے تو صوبے بھر میں گیس کی قلت کا مسئلہ حل کردیں گے
عمر ایوب نے پریس کانفرنس کرتے ہوئے کہا کہ گزشتہ حکومتوں نے تیل کی دریافت کے لیے کوئی اقدامات نہیں اٹھائے، ملک کے گیس کے ذخائر کی پیداوار میں ساڑھے سات فیصد یومیہ کی بنیاد پر کمی آتی رہی، اب سندھ میں 250 ایم ایم سی ایف ڈی گیس کی کمی آرہی ہے
عمر ایوب کا کہنا تھا کہ سندھ میں سترہ کلومیٹر کی ایک جگہ ہے جو سندھ حکومت ہمیں نہیں دے رہی، اگر سندھ حکومت ہمیں وہ علاقہ دے دے تو ہم سندھ کو 250 ایم ایم سی ایف ڈی گیس فراہم کر دیں گے
دوسری جانب پریس کانفرنس پر ردعمل دیتے ہوئے سندھ حکومت کے ترجمان بیرسٹر مرتضیٰ وہاب نے کہا ہے کہ وفاقی حکومت کی بدانتظامی کی وجہ سے سندھ میں گیس کی قلت ہے۔ ٹویٹر پیغام میں انہوں ںے کہا کہ آئین کے آرٹیکل 158 کے تحت ضمانت دی گئی ہے کہ سندھ کو سندھ سے نکلنے والی گیس ملنی چاہیے سندھ کو ایل این جی / آر ایل این جی نہیں بلکہ سندھ میں نکلنے والی گیس فراہم کی جائے۔
انہوں نے کہا کہ وفاقی حکومت کی بدانتظامی کی وجہ سے ہمارے گھریلو ، تجارتی اور صنعتی صارفین شدید مشکلات کا شکار ہیں، وفاقی وزیر توانائی عمر ایوب گیس کی قلت کا ذمہ دار سندھ کو ٹھہرانے سے گریز کریں.
