ممبئی – ’مسٹر پرفیکشنسٹ‘ کے نام سے جانے جانے والے بولی وڈ کے معروف اداکار عامر خان نے اعتراف کیا ہے کہ وہ کریئر بنانے کے چکر میں اپنی دونوں سابق بیویوں کو وقت نہیں دے پائے تھے اور اسی وجہ سے ان کی طلاقیں ہوئیں
عامر خان نے اپنی ستاونویں سالگرہ کے موقع پر پہلی بار بھارتی نشریاتی ادارے ’نیوز 18‘ کی ہندی سروس کو دیے گئے انٹرویو میں اپنی دوسری شادی ٹوٹنے کی وجوہات پر کھل کر بات کی
عامر خان نے انٹرویو میں اعتراف کیا کہ وہ کریئر بنانے کے چکر میں کرن راؤ کو بھی مناسب وقت نہیں دے پاتے تھے اور وہ ہر وقت شوبز کی مصروفیات میں مصروف رہتے تھے
عامر خان کے مطابق انہوں نے سمجھا تھا کہ کرن راؤ عام خاتون ہیں مگر ایسا نہیں ہوا اور انہیں وقت نہ دے پانے کی وجہ سے ان کے ازدواجی تعلقات بگڑنے لگے تھے اور ان تمام مسائل کے وہ ذمہ دار ہیں
انہوں نے کرن راؤ سے طلاق کا سبب اپنی مصروفیات بتائیں، تاہم انہوں نے دوسری تمام چہ مگوئیوں پر کوئی واضح بات نہیں کی
انٹرویو کے دوران انہوں نے اپنی پہلی شادی کی ناکامی پر بھی کھل کر بات کی اور بتایا کہ اس وقت وہ کریئر بنانے میں مصروف تھے، جس وجہ سے وہ اہلیہ اور بچوں کو وقت نہیں دے پاتے تھے
انہوں نے کہا کہ وہ اتنے مصروف ہوتے تھے کہ وہ بھول جاتے تھے کہ گھر پر بچے اور بیوی ان کے منتظر ہیں
انہوں نے کہا کہ وہ محض اٹھارہ برس کی عمر میں شوبز میں آئے تھے، جس وجہ سے ان پر اپنا نام اور مقام بنانے کا بھوت سوار تھا، جس وجہ سے انہوں نے ازدواجی زندگی کے بجائے کریئر کو زیادہ اہمیت دی
مسٹر پرفیکشنٹ عامر خان کا کہنا تھا ”اب ان کی بڑی صاحبزادی تیئیس برس کی ہوچکی ہے، جنہوں نے ذہنی مسائل کا بھی بہادری سے مقابلہ کیا اور اب وہ ان کے ساتھ ہیں مگر انہیں افسوس ہے جب کہ وہ چار سال کی تھیں، تب وہ انہیں بطور والد وقت نہیں دے پائے تھے“
عامر خان نے اپنے بڑے بیٹے جنید خان کے حوالے سے بھی بات کی اور کہا کہ اب پچیس برس ہو چکے ہیں اور بہادری سے آگے بڑھ رہے ہیں لیکن جب وہ معصوم تھے، تب انہیں بھی وہ وقت نہیں دے پائے تھے
ان کے انٹرویو کے حوالے سے ’ٹائمز آف انڈیا‘ نے بتایا کہ عامر خان نے صاحبزادے جنید خان کے حوالے سے بتایا کہ وہ جلد ہی اداکاری کا آغاز کریں گے
عامر خان کے مطابق ان کے بیٹے نے اب تک بیس آڈیشن دیے ہیں، جن میں انہیں ناکامی ملی مگر اب انہیں ایک اچھے پروڈکشن ہاؤس کے ساتھ کام کرنے کا موقع ملا ہے اور جلد ہی جنید خان اداکاری کرتے دکھائی دیں گے
خیال رہے کہ عامر خان نے جولائی 2021ع میں اپنی دوسری بیوی کرن راؤ سے شادی ختم ہونے اور اپنی طلاق کی تصدیق کی تھی
دونوں نے 2005ع میں شادی کی تھی اور دونوں کے ہاں 2011ع میں بچے کی پیدائش ہوئی تھی۔ کرن راؤ اور عامر خان کی جوڑی کا شمار نہ صرف بولی وڈ کی رومانوی جوڑیوں میں ہوتا تھا بلکہ دونوں کو بھارت کی بھی رومانوی جوڑیوں میں شمار کیا جاتا تھا۔ دونوں نے متعدد فلمی منصوبے ایک ساتھ کیے اور شادی سے قبل بھی دونوں کے درمیان اچھے تعلقات رہے تھے۔ شادی ختم ہونے کے بعد بھی انہیں ایک ساتھ خوشگوار موڈ میں دیکھا جاتا رہا ہے اور دونوں اب تک ایک دوسرے کو بہترین دوست قرار دیتے آ رہے ہیں
کرن راؤ سے قبل عامر خان نے کیریئر کے آغاز میں 1986 میں ہی اداکارہ رینا دتا سے شادی کی تھی، مگر ان کی پہلی شادی بھی سولہ سال بعد 2002ع میں طلاق پر ختم ہوئی تھی
عامر خان کو پہلی شادی سے دو بچے ہیں، جن میں بیٹی ارا خان اور بیٹا جنید خان ہے، جب کہ دوسری بیوی کرن راؤ سے انہیں 2011ع میں بیٹا آزاد خان ہوا تھا.
