فلپ مورس سگریٹ کمپنی کے سربراہ نے سگریٹ پر پابندی کا مطالبہ کر دیا

حیران کن طور پر سگریٹ بنانے والی دنیا کی سب سے بڑی کمپنی فلپ مورس انٹرنیشنل کے چیف ایگزیکٹیو نے برطانوی حکومت سے مطالبہ کیا ہے کہ وہ برطانیہ میں دس سال کے اندر اندر سگریٹ پر پابندی لگا دے

واضح رہے کہ فلپ مورس کمپنی ایک صدی سے زیادہ عرصے سے دنیا کے مشہور ترین سگریٹ برانڈ مالبرو بنا رہی ہے

سوئس امریکی کمپنی فلپ  مورس کے چیف ایگزیکٹیو یاکسیک اولچیک نے برطانوی اخبار ’دا میل آن سنڈے‘ کو بتایا کہ کمپنی برطانیہ میں سگریٹ کی فروخت مرحلہ وار بند کر رہی ہے

انہوں نے کہا کہ اول تو لوگوں کو سگریٹ پینا بند کر دینا چاہیے، لیکن پھر بھی جو لوگ سگریٹ پینا چاہتے ہیں وہ ای سگریٹ اور دوسری الیکٹرانک ڈیوائسز استعمال کر سکتے ہیں

انہوں نے کہا کہ ہم سگریٹ کے بغیر دنیا کا تصور کر سکتے ہیں۔ یہ جتنا جلد ہو، ہر کسی کے لیے اتنا ہی بہتر ہے۔ مناسب قانون سازی اور آگہی سے بعض ملکوں میں یہ کام دس سال کے اندر ہو جائے گا۔ اس طرح آپ یہ مسئلہ ہمیشہ کے لیے حل کر سکتے ہیں

عالمی ادارۂ صحت کے مطابق سگریٹ نوشی کے ہاتھوں ہر سال اسی لاکھ سے زیادہ افراد موت کے منہ میں چلے جاتے ہیں۔ ان میں سے ستر لاکھ کے قریب اموات براہِ راست سگریٹ نوشی سے، جب کہ بارہ لاکھ اموات سگریٹ نہ پینے والوں کو دوسری لوگوں کے سگریٹوں کے دھویں سے ہوتی ہیں

عالمی ادارۂ صحت کے مطابق سگریٹ پینے والوں کی نصف تعداد اس مضر صحت لت کی وجہ سے قبل از وقت ہلاک ہو جاتی ہے

ادارے کا یہ بھی کہنا ہے کہ تمباکو کی کوئی محفوظ حد نہیں ہے اور اس کی ہر مقدار نقصان دہ ہے

بظاہر ایسا معلوم ہوتا ہے کہ فلپس مورس سگریٹ بنانے کا کاروبار چھوڑ کر فارماسیوٹیکل انڈسٹری میں جانا چاہتی ہے۔ اس ماہ کے شروع میں فلپ مورس انٹرنیشنل نے ایک دوا ساز کمپنی ویکٹورا کو ایک ارب پاؤنڈ میں خریدنے کا معاہدہ کیا تھا

تاہم اس پر بعض حلقوں کی  طرف سے اعتراض کیا جا رہا ہے کہ وہ کمپنی جس کی مصنوعات لاکھوں لوگوں کو ہلاک کرنے کا باعث بن رہی ہیں، اسے زندگی بچانے والی ادویات بنانے کا لائسنس کیسے دیا جا سکتا ہے.