منزل نہیں صرف سفر، ’سپرمون‘ فلائٹ کی نشستیں ڈھائی منٹ میں فروخت

کینبرا: دنیا بھر میں پروازوں کی منسوخی یا کمی سے فضائی سفر کے شوقین افراد بہت پریشان ہیں۔ اس ضمن میں آسٹریلوی فضائی سروس سمیت کئی کمپنیوں نے ایسی فلائٹس شروع کی ہیں جو کہیں نہیں جاتیں بلکہ انہیں ہوا میں پھیرا لگوا کر اتار دیا جاتا ہے۔  آسٹریلوی کمپنی قوانٹاس کی ایسی ہی ایک فلائٹ کی تمام نشستیں ڈھائی منٹ میں فروخت ہو گئیں

مئی کے آخر کے لیے تیار یہ فلائٹ چالیس ہزار فٹ کی بلندی پر جاکر مسافروں کو چاند گرہن اور سپر مون کا نظارہ کروا کے دوبارہ اسی ایئرپورٹ پر اتارے گی، جہاں سے اڑان بھرے گی

اس انوکھی فلائٹ کو سپرمون  کا نام دیا گیا ہے۔ اس میں اکانومی کلاس کا ٹکٹ 386 ڈالر اور بزنس درجے کا ٹکٹ 1160 ڈالر کا رکھا گیا تھا

دلچسپ بات یہ ہے کہ ساری ٹکٹیں منٹوں میں بِکنے کے بعد ایک ویٹنگ لسٹ بھی بنائی گئی، جو اب دوبارہ بھر گئی ہے

واضح رہے کہ ہوائی کمپنیاں فضائی سفر کے شوقین خواتین وحضرات کے لیے دنیا بھر میں ’کہیں نہ جانے والی‘ فلائٹس کا اجرا کر رہی ہیں۔ اسی طرح قوانٹاس نے چاند کا نظارہ کرانے والی ایک فلائٹ شروع کی ہے جو 26 مئی کو اڑان بھرے گی

اس رات چاند گرہن ہوگا، جسے ناسا نے ’سپربلڈ چاند گرہن‘ کا نام دیا ہے۔ سپر کا مطلب یہ ہے کہ اس رات چودہویں کا چاند ہوگا اور زمین سے قریب ترہوگا

اس عمل میں سورج کی روشنی زمینی فضا سے ہوتی ہوئی کچھ اس انداز سے نظر آئے گی کہ چاند سرخی مائل دکھائی دے گا جسے بلڈ مون کہا جاتا ہے.