پیغام رسانی کے لیے سب سے زیادہ استعمال ہونے والی موبائل ایپلیکیشن واٹس ایپ کی نئی پالیسی کو صارفین کی جانب سے مسترد کر دیا گیا ہے، جس کے بعد ‘ٹیلی گرام’ اور ‘سگنل’ ایپس کی مانگ میں نمایاں اضافہ دیکھنے میں آیا ہے
تفصیلات کے مطابق واٹس ایپ کی متنازع پالیسی کے بعد صارفین متبادل پلیٹ فارم تلاش کر رہے ہیں، یہی وجہ ہے کہ حالیہ دنوں پیغام رسانی کی دوسری دو ایپلیکیشنز ٹیلی گرام اور سگنل کے صارفین میں اضافہ رکارڈ کیا گیا ہے
تجزیاتی ادارے سینسر ٹاور کی جانب سے جاری کیے گئے اعدادوشمار میں بتایا گیا ہے کہ گزشتہ دو دنوں کے دوران ایپل اور گوگل سے تقریباً ایک لاکھ صارفین نے سگنل ایپ ڈاؤن لوڈ کیا۔ جبکہ اسی دوران ٹیلی گرام کے ڈاؤن لوڈ کی تعداد 2.2 ملین سے بھی زائد رہی
اعداد وشمار کے مطابق گزشتہ ہفتے کے مقابلے میں رواں ہفتے واٹس ایپ ڈاؤن لوڈ کی شرح میں 11 فیصد تک کمی ریکارڈ کی گئی لیکن پھر بھی اس دورانیے میں دنیا بھر سے 10.5 ملین ڈاؤن لوڈ رکاڈ ہوا
خیال رہے کہ بدھ کے روز جاری ہونے والی نئی پالیسی کے مطابق واٹس ایپ صارفین کا ڈیٹا ناصرف استعمال کرے گا بلکہ اسے فیس بک کے ساتھ شیئر بھی کرے گا، اس کے لیے کمپنی نے صارفین کو 8 فروری تک کا وقت دیا ہے تاکہ وہ اسی سروس کا استعمال جاری رکھ سکیں، اس ضمن میں نوٹی فکیشن بھی جاری کردیا گیا ہے۔
واٹس ایپ نے پرائیوسی پالیسی کی تبدیلی اور اس کے اطلاق کے حوالے سے اقدامات شروع کردیے ہیں، جس کے تحت ایپلیکیشن استعمال کرنے والے لاکھوں صارفین کو کمپنی کی جانب سے ایک نوٹی فکیشن موصول ہوا۔
واٹس ایپ کی جانب سے جاری ہونے والے نوٹی فکیشن میں صارف کو آگاہ کیا گیا ہے کہ اگر انہوں نے 8 فروری 2021 تک پرائیوسی پالیسی کو قبول نہیں کیا اور اس سے اختلاف کیا تو اُن کا اکاؤنٹ ڈیلیٹ کردیا جائے گا
واٹس ایپ کی یہ نئی پالیسی 8 فروری سے نافذ العمل ہوگی، جو صارف اس سے اتفاق نہیں کرے گا تو کمپنی اُس کا نمبر ختم کردے گی اور پھر اُسے دوبارہ اکاؤنٹ بنانے کے لیے اس قواعد و ضوابط کی شرائط کو پورا کرنا ہوگا.
