وہ کالج، جس کی ڈگری یافتہ آیاؤں کو کروڑوں روپے سالانہ تنخواہ ملتی ہے!
لندن : برطانوی کاؤنٹی سمرسیٹ کے شہر ’باتھ‘ میں آیاؤں کا مہنگا ترین ’’نارلینڈ کالج‘‘ قائم ہے جہاں سے ڈگری لینے والی آیائیں سالانہ کروڑوں روپے کی تنخواہ حاصل کرتی ہیں
تفصیلات کے مطابق یہ کالج 1892ء میں ایک برطانوی خاتون ایمیلی وارڈ نے قائم کیا تھا، جس کا ابتدائی مقصد شاہی اوت مالدار خاندان کے بچوں کی دیکھ بھال کرنے والی خواتین کو باقاعدہ تربیت فراہم کرنا تھا. اپنے اعلیٰ نصاب اور بہترین تربیت یافتہ آیاؤں کی وجہ سے یہ کالج کچج ہی عرصے میں دنیا بھر میں مشہور ہوگیا جہاں کی، سند یافتہ آیائیں مالدار گھرانوں اور شاہی خاندانوں تک کی اوّلین ترجیح قرار پائیں
اگرچہ آج بھی اس کا نام ’’نارلینڈ کالج‘‘ (Norland College) ہے لیکن اب یہ ایک یونیورسٹی کا درجہ رکھتا ہے، جہاں دنیا بھر سے آیاؤں کو ڈگری اور ڈپلوما کے علاوہ فاصلاتی تعلیم (بذریعہ انٹرنیٹ) بھی فراہم کی جاتی ہے. البتہ، اس کی فیس بھی اتنی زیادہ ہے کہ آکسفورڈ اور کیمبرج یونیورسٹیاں بھی اس کے سامنے سستی لگتی ہیں
نارلینڈ کالج کی ویب سائٹ پر دستیاب معلومات کے مطابق، یہاں ایک تعلیمی سال کی فیس پاکستانی کرنسی میں تقریباً چالیس لاکھ روپے بنتی ہے جبکہ رہائش کے اخراجات اس کے علاوہ ہیں۔ زیرِ تربیت آیاؤں کو گریجویشن کے لیے یہاں چار سال تک قیام کرنا پڑتا ہے
اتنی مہنگی تعلیم ہونے کے باوجود، نارلینڈ کالج کی سند یافتہ آیاؤں کی دنیا بھر میں زبردست مانگ ہے، جن میں سے اکثر کو دورانِ تعلیم ہی اچھی ملازمت مل جاتی ہے
کالج ویب سائٹ کے مطابق، یہاں سے تربیت یافتہ آیاؤں کو پہلے ہی سال میں چالیس ہزار برطانوی پاؤنڈ (91 لاکھ روپے) سالانہ تنخواہ پر بہ آسانی ملازمت مل جاتی ہے جس میں ان کے تجربے کے ساتھ ساتھ اضافہ ہوتا رہتا ہے
نارلینڈ کالج سے فارغ التحصیل آیاؤں کو پانچ سے دس سالہ تجربے پر برطانیہ میں 68 ہزار پاؤنڈ (ایک کروڑ 54 لاکھ روپے) سالانہ تنخواہ بہ آسانی مل جاتی ہے
اس تجربے پر بیرونِ ملک ملازمت حاصل کرنے والی آیاؤں کی تنخواہ ایک لاکھ پاؤنڈ (2 کروڑ 27 لاکھ روپے) سالانہ یا اس سے بھی زیادہ ہوتی ہے
اب اگر آپ سوچ رہے ہیں کہ نارلینڈ کالج میں آیاؤں کو ایسا کیا پڑھایا جاتا ہے کہ دنیا بھر میں ان کی بہت مانگ ہے، تو بتاتے چلیں کہ انہیں سلائی کڑھائی، صفائی ستھرائی، بچوں کو سنبھالنے اور غصے پر قابو رکھنے کے علاوہ ہنگامی حالات سے نمٹنے، اپنا اور دوسروں کا دفاع کرنے سے لے کر مشکل حالات میں خطرناک ڈرائیونگ اور سائبر سیکیورٹی تک کی تربیت دی جاتی ہے
ظاہر ہے کہ اتنی زبردست تربیت کے بعد تیار ہونے والی آیا بلاشبہ غیرمعمولی ہوگی۔ یہی وجہ ہے کہ نارلینڈ کالج کی ہر سند یافتہ آیا کے لیے چھ ملازمتیں منتظر ہوتی ہیں
آج نہ صرف برطانیہ بلکہ مشرقِ وسطی، چین اور امریکا تک کے امیر گھرانوں میں نارلینڈ کالج سے تربیت یافتہ آیاؤں کی بہت مانگ ہے جنہیں اکثر منہ مانگی تنخواہ پر کام مل جاتا ہے.
