اوہایو : ٹانگوں سے محروم امریکی نوجوان زیون کلارک نے بیس میٹر کا فاصلہ اپنے ہاتھوں کے بل چل کر صرف 4.78 سیکنڈ میں طے کر کے نیا عالمی ریکارڈ قائم کر دیا
اس سال 15 فروری کے روز میسیلون، اوہایو میں قائم کیے گئے رکارڈ کو اب گنیز ورلڈ ریکارڈ نے بھی تسلیم کرتے ہوئے اسے اپنی آئندہ سالانہ کتاب ’’گنیز بُک آف ورلڈ ریکارڈ 2022‘‘ کتاب کا حصہ بنا لیا ہے
چوبیس سالہ زیون کلارک پیدائشی طور پر ٹانگوں سے محروم ہیں، جس کی وجہ سے انہیں جنم دینے والی خاتون نے بھی پالنے سے انکار کر دیا تھا اور اسپتال میں چھوڑ دیا تھا. جس کے بعد ان کی زندگی اذیتوں کا ایک سلسلہ بن گئی
وہ سولہ سال کی عمر تک ایک سے دوسرے اور دوسرے سے تیسرے گھر میں لے پالک بچے کے طور پر پلتے رہے اور ہر طرح کی دشواری، حقارت اور پریشانی کا سامنا بھی کرتے رہے
2013ع میں کمبرلی ہاکنز نامی ایک خاتون نے زیون کو ہمیشہ کے لیے اپنا بیٹا بنا کر ساتھ رکھ لیا
زیون کا کہنا ہے کہ ٹانگوں سے محرومی ان کے لیے زندگی کا سب سے بڑا چیلنج تھی جس کا سامنا کرنے کے لیے انہوں نے ہر وہ کام کیا جو ٹانگوں والا ایک نارمل انسان کر سکتا ہے
انہوں نے اداکاری کی، باڈی بلڈنگ کی، ریسلنگ میں مہارت حاصل کی اور دنیا کو دکھا دیا کہ ان میں وہ سب کچھ کرنے کی قابلیت ہے جو ایک نارمل انسان کرسکتا ہے
دونوں ٹانگوں سے محروم یہ نوجوان حوصلے اور ہمت کی ایک مثال بن کر ابھرا، وہ اپنی معذوری کی بنا پر دوسروں کی ہمدردیاں سمیٹنے کے بجائے عزم و استقلال کی علامت بن چکا ہے
حتیٰ کہ دوسروں کو حوصلہ دینے کے لیے انہوں نے انسٹاگرام اور ٹک ٹاک پر اکاؤنٹ کے علاوہ ذاتی ویب سائٹ بھی بنائی ہوئی ہے۔ زیون کی زندگی پر نیٹ فلکس ایک مختصر ڈاکیومینٹری بھی بنا چکا ہے
وہ ایک امریکی مصنف کے تعاون سے اپنے بارے میں ایک کتاب ’’زیون: ان میچڈ‘‘ بھی لکھ چکے ہیں
اپنی صلاحیتوں کو ایک نئے انداز سے منوانے کےلیے پچھلے سال کووڈ 19 وبا کے دوران زیون نے ہاتھوں کی مدد سے دوڑنے کی مشق بہتر کرنا شروع کردی؛ اور بالآخر ایک سال بعد وہ ہاتھوں کے ذریعے تیز ترین دوڑ کا عالمی ریکارڈ اپنے نام کرلیا
اب وہ 2024 کے سمر اولمپکس اور پیرالمپکس میں حصہ لینے کی تیاری کررہے ہیں جہاں وہ سونے کا تمغہ جیتنے اور کوئی نیا عالمی ریکارڈ بنانے کا ارادہ رکھتے ہیں
