اسلام آباد : ملک میں پہلی بار مقامی سطح پر تیار کردہ موبائل فونز کی تعداد درآمدی موبائل فون سے زیادہ ہو گئی ہے
جنوری تا جولائی 2021 کے گزشتہ سات مہینوں کے دوران پاکستان میں موبائل فون بنانے والے اداروں نے ایک کروڑ بائیس لاکھ ستر ہزار موبائل فون تیار کئے، جب کہ اسی عرصے میں درآمد شدہ موبائل فون کی تعداد بیاسی لاکھ نوے ہزار رکارڈ کی گئی. یہ رجحان پی ٹی اے کے موبائل ڈیوائس مینوفیکچرنگ (ایم ڈی ایم) اجازت ناموں سے متعلق ریگولیٹری نظام کے بعد دیکھنے میں آیا
پی ٹی اے کا کہنا ہے کہ ریگولیٹری نظام متعارف کروانے کے پہلے ہی سال کے سات ماہ کے عرصہ میں ایک کروڑ 22 لاکھ 70 ہزار موبائل فون تیار ہوئے، مقامی سطح پر تیار ہونے والے موبائل فونز میں 48 لاکھ 70 ہزار فور جی اسمارٹ فونز بھی شامل ہیں
پی ٹی اے کا کہنا ہے کہ موبائل مینوفیکچرنگ پالیسی سمیت سازگار حکومتی پالیسیوں کی بدولت اور ڈیوائس آئیڈینٹی فکیشن رجسٹریشن اینڈ بلاکنگ سسٹم (ڈی آئی آر بی ایس) کے کامیاب نفاذ کے بعد پاکستان میں مقامی سطح پر موبائل بنانے کے لیے سازگار ماحول پیدا ہوا، اس سے پاکستان کے موبائل فون تیاری کے نظام پر بھی مثبت اثرات مرتب ہوئے، جس کی بدولت جعلی ڈیوائس مارکیٹ کا خاتمہ اور تجارتی اداروں کو برابر مواقع میسر آئے
پی ٹی اے اعلامیے کے مطابق ہر قسم کی ڈیوائس کی درآمدات کے لیے یکساں قانونی ذرائع کی موجودگی سے صارفین کے اعتماد میں بھی اضافہ ہوا، حکومت پاکستان کی جانب سے مینوفیکچررز کو پاکستان میں اپنے یونٹ کے قیام کے حوالے سے ایک جامع موبائل مینوفیکچرنگ پالیسی متعارف کرائی گئی، اس پالیسی کی روشنی میں پی ٹی اے نے 28 جنوری 2021 کوموبائل ڈیوائس مینوفیکچرنگ (ایم ڈی ایم) ریگولیشنز جاری کیں، جن کےتحت اب تک 26 کمپنیوں کو موبائل تیار کرنے کا اجازت نامہ جاری کیا گیا ہے، ان کمپنیوں میں مشہور برانڈز جیسا کہ سام سنگ، نوکیا، اوپو، ٹیکنو، انفینکس، ویگوٹل، کیو موبائل وغیرہ شامل ہیں، پی ٹی اے کے مطابق تجارتی درآمد ات کے مقابل مقامی تیاری کے رجحانات کی تفصیلات پی ٹی اے کی ویب سائٹ پر موجود ہے.
