پاکستان میں ہُنڈا موٹر سائیکلوں کی قیمتوں میں ایک بار پھر اضافہ

ایک طرف حکومت نے پیٹرول کی قیمتوں کو آگ لگا دی ہے تو دوسری جانب ایٹلس کمپنی نے ایک بار پھر ہنڈا موٹر سائیکل کی قیمتیں بھی بڑھا دی ہیں ، جس سے متوسط طبقے کی سواری بھی ان کی پہنچ سے دور ہوتی دکھائی دیتی ہے

گاڑیوں کی معلومات فراہم کرنے والی ویب سائٹ ’پاک وہیلز‘ کے مطابق پاکستان میں ایٹلس ہُنڈا نے ایک بار پر موٹرسائیکلوں کی قیمت بڑھائی ہے، جس سے ہُنڈا سی ڈی 70 کی قیمت میں نو ہزار روپے کا اضافہ ہوا ہے، جس کے بعد اس کی نئی قیمت ایک لاکھ 37 ہزار 900 روپے ہو گئی ہے

اسی طرح ہُنڈا کی سی ڈی 70 ’ڈریم‘ کی قیمت میں نو ہزار 600 روپے کا اضافہ ہوا ہے، جس کے بعد اس کی نئی قیمت ایک لاکھ 47 ہزار 500 روپے ہو گئی ہے

ہُنڈا ’پرائڈر‘ کی قیمت میں 10 ہزار 600 روپے کا اضافہ ہوا ہے اور اس کی نئی قیمت ایک لاکھ 81 ہزار 500 روپے پر پہنچ گئی ہے

ہُنڈا کی سی جی 125 کی قیمت میں 11 ہزار روپے کا اضافہ ریکارڈ کیا گیا ہے اور اس کی نئی قیمت دو لاکھ پانچ ہزار 900 روپے ہو گئی ہے

ایٹلس ہُنڈا کی 125 کے اسپیشل ایڈیشن کی قیمت میں بھی 13 ہزار روپے کا اضافہ ہوا ہے، جس کے بعد اس کی نئی قیمت دو لاکھ 43 ہزار 900 روپے ہو گئی ہے

ہُنڈا 150 کی قیمت 35 ہزار روپے بڑھ گئی ہے اور اس کی نئی قیمت چار لاکھ 18 ہزار 900 روپے پر پہنچ گئی ہے، جبکہ 150 کے اسپیشل ایڈیشن کی نئی قیمت بھی 35 ہزار روپے کے اضافے کے بعد چار لاکھ 22 ہزار 900 روپے پر پہنچ گئی ہے

خیال رہے گذشتہ رات پاکستان کی حکومت نے پیٹرولیم مصنوعات کی قیمت میں بھی اضافے کا اعلان کردیا تھا، جس کے بعد پیٹرول کی فی لیٹر قیمت 272 روپے فی لیٹر ہو گئی ہے

بدھ کی رات کو وزارت خزانہ کی جانب سے جاری ہونے والے اعلامیے میں کہا گیا تھا کہ پیٹرل کی قیمت میں 22 روپے 20 پیسے فی لیٹر اضافہ کر دیا گیا

اضافے کے بعد پیٹرول کی نئی قیمت 272 روپے فی لیٹر ہو گئی ہے۔ ہائی اسپیڈ ڈیزل کی قیمت میں 17 روپے 20 پیسے کا اضافہ کیا گیا ہے۔ اضافے کے بعد ہائی اسپیڈ ڈیزل کی نئی قیمت 280 روہے ہو گئی ہے

لائٹ ڈیزل کی قیمت میں نو روپے 68 پیسے فی لیٹر اضافہ کیا گیا ہے جس کے بعد لائٹ ڈیزل کی نئی قیمت 196 روپے 68 پیسے فی لیٹر ہو گئی ہے

مٹی کے تیل کی قیمت میں 12 روپے 90 پیسے کا اضافہ کیا گیا ہے۔ اضافے کے بعد مٹی کے تیل کی نئی قیمت 202 روپے 73 پیسے ہوگئی ہے۔