کراچی کے دو تعلیمی اداروں میں چین کی جانب سے ای کامرس اور ٹیکنالوجی کورس کا اجرا

چین کے تعاون سے کراچی کے دو سرکاری تعلیمی اداروں نے نوجوانوں میں چین جیسی کاروباری صلاحیت اور استعداد پیدا کرنے کے لیے ای کامرس سمیت مختلف کورسز جا اجراء کر دیا ہے

آن لائن شروع کیے جانے والے ان کورسز میں ملکی تاریخ میں پہلی مرتبہ چینی اساتذہ اور کاروباری شعبہ کے ماہرین نوجوانوں کو چین کی کاروباری دنیا میں رسائی کے طریقے، چینی مصنوعات دنیا بھر میں فروخت اور پاکستانی مصنوعات کے دنیا میں دروازے کھولنے کے طریقے سکھا رہے ہیں

اس حوالے سے سندھ ٹیکنیکل بورڈ کے چیئرمین ڈاکٹر مسرور شیخ کا کہنا ہے ”ٹیکنیکل بورڈ اور داؤد انجیئرنگ یونیورسٹی مشترکہ طور پر چین کے ہنان کیمیکل اینڈ ووکیشنل ٹیکنیکل کالج کی مدد سے یہ کورسز کرا رہے ہیں اس کورسز سے نئے تعلیمی تقاضوں کو مدنظر رکھتے ہوئے ڈیزائن کیا گیا“

انہوں نے کہا کہ ملکی تاریخ میں پہلی مرتبہ نوجوانوں کو چینی زبان سکھانے کے ساتھ چین کی کاروباری دنیا میں رسائی کا طریقہ سکھایا جارہا ہے۔ یہ کورس کم سرمائے سے آن لائن کاروبار کرنے کرنے کے گر سکھانے کا باعث بنے گا، جس کی رسائی چینی یونیورسٹی میں بھی ہوگی

ڈاکٹر مسرور شیخ کا کہنا تھا کہ چائنا کے باہمی تعاون سے ای کامرس، بیلٹ اینڈ روڈ انیشی ایٹو (بی آر آئی) بزنس انٹرپرینیورشپ کے لیے ایک آن لائن پروگرام شروع کردیا۔ انہوں نے مزید کہا کہ جہاں چینی کمپنیوں کی ضرورت روز بروز بڑھتی جا رہی ہے کہ وہ زیادہ سے زیادہ انفارمیشن ٹیکنالوجی تربیت یافتہ انگریزی بولنے والے افرادی قوت کام کر سکیں

چینی مصنوعات اور خدمات کی مارکیٹنگ کے لیے بی آر آئی نیٹ ورک میں آنے والے ایک سو باون ملکوں میں ان کی آن لائن فروخت اور سرحد پار ای کامرس آپریشنز کے لیے ریڑھ کی ہڈی کے طور پر کام کر رہی ہے

سندھ ٹیکنیکل بورڈ کے چیئرمین نے کہا کہ نوجوانوں میں بے روزگاری کا خاتمہ اور ان کے لیے بیرون ملک میں روزگار کے مواقع مہیا کرنے کے لیے اور پاک چائنا کے تعلیمی اداروں کے روابط اور مضبوط کرنے کے لیے سندھ بورڈ آف ٹیکنیکل ایجوکیشن اور داؤد یونیورسٹی آف انجینئرنگ اینڈ ٹیکنالوجی نے چین کے ہنان کیمیکل اینڈ ووکیشنل ٹیکنیکل کالج کے ذریعے ای کامرس، بی آر آئی بزنس انٹرپرینیورشپ کے لیے ایک آن لائن ٹریننگ پروگرام کا باقائدہ آغاز کر دیا ہے، جس کی کلاسز 19 جولائی سے داؤد یونیورسٹی آف انجینئرنگ اینڈ ٹیکنالوجی میں شروع ہو گئیں ہیں، جس میں تین ماہ کے تین کورسز جس میں ہر کورس میں بتیس گھنٹے آن لائن اور بتیس گھنٹے فزیکل کلاسز لی جارہی ہیں۔ایک بیچ میں پینتالیس طلبہ و طالبات ٹریننگ لے رہے ہیں

ڈاکٹر مسرور شیخ کا کہنا تھا کہ ہمارا ہدفِ ہے کہ دس ہزار داخلے دیں اور اس کو مزید آگے تک پھیلائیں

انہوں نے مزید کہا کہ حال ہی میں ماڈل سائنو پیک ڈویل ڈپلومہ ووکیشنل اینڈ ٹیکنیکل جوائنٹ ایجوکیشنل پروگرام پر مفاہمتی یادداشت پر دستخط کئے گئے ہیں۔ ہم چاہتے ہیں طلبہ و طالبات اس پروگرام کے لیے تیار ہو جائیں تاکہ چین میں کاروبار کر سکیں

چائنیز زبان کے ساتھ چائنا میں کاروبار ، چائنا کے قانون اور چائنا کے کلچر کو سیکھنے کے لیے نئے کورسز متعارف کروائے گئے ہیں جس میں طلباء کو طور طریقہ سمجھنے میں آسانی ہوگی اور مزید آسانی سے کاروباری کام پاک چائنا کے درمیان شروع کر سکتے ہیں

انہوں نے کہا کہ چین کے ہنان کیمیکل اینڈ ووکیشنل ٹیکنیکل کالج تین ماڈیولز پر مشتمل ہے جن میں چینی زبان، چینی ثقافت اورچینی کاروبار شامل ہیں، جنہیں ہنان چین کی فیکلٹی نے ڈیزائن کیا ہے تاکہ پاکستانی طلباء کو چینی کاروبار، کلچر، زبان کی آگاہی ہو اور ان میں مہارت ہو جائے

ڈاکٹر مسرور شیخ کا کہنا تھا کہ یہ پروگرام چائنیز یونیورسٹی، انڈسٹری کے روابط کی ایک بہترین مثال ہے، جہاں مطالعہ کے دوران ہر طالب علم کو ای کامرس گیٹ وے اور کنسورشیم کے ذریعے پچاس چینی کاروباروں تک آن لائن مفت رسائی کے ساتھ انٹرپرینیورشپ پر مبنی جسمانی تربیت فراہم کی جائے گی۔ تربیت کی تکمیل کے بعد ہر ٹرینی کو فری لانس سیلز مارکیٹنگ کی صلاحیت بڑھ جائے گی اور وہ اپنا کاروبار چین میں بخوبی کر سکتے ہیں۔