ایریزونا: آج ہمیں ’’کووِڈ-19‘‘ کا لفظ سنتے، کہتے، پڑھتے اور لکھتے ہوئے ایک سال سے زائد کا عرصہ بیت چکا ہے، لیکن ہم میں سے شاید ہی کوئی یہ جانتا ہو کہ امریکی ریاست ایریزونا میں آڈیو ویژول کنکٹرز اور کیبلز بنانے والی ایک ایسی کمپنی بھی ہے، جس کا نام کوود ہے، اور جو اس سال وجود میں نہیں آئی بلکہ وہ پچھلے چالیس سالوں سے ’’کووِڈ‘‘ کے نام سے ہی کام کر رہی ہے
آج سنگت میگ کی دلچسپ رپورٹ میں ہم آپ کو یہ بتائیں گے کہ اس کمپنی کا نام کووڈ کس طرح پڑا
تو قارئین آئیے یہ بات جاننے کے لیے سب سے پہلے ہم ملتے ہیں کووِڈ کمپنی کے سربراہ نورم کارسن سے، ان کے بقول "آج سے چالیس سال پہلے جب یہ کمپنی قائم کی جارہی تھی، تو اسے بنانے والوں نے اس کا نام ’’وڈیو کمپنی‘‘ کو مختصر کرکے ’’وِڈکو‘‘ رکھنا چاہا، لیکن مشکل یہ تھی کہ پہلے ہی بہت سی کمپنیاں یہ نام استعمال کر رہی تھیں”
اس کے بعد کا قصہ وہ کچھ یوں سناتے ہیں "یہ مسئلہ تب حل ہوا، جب پارسل کمپنی کے ایک ڈرائیور نے تجویز دی کہ انہیں اس نئی کمپنی کا نام ’’کووِڈ‘‘ رکھ لینا چاہیے، جو دوسرے ناموں سے مختلف ہوگا۔ یہ تجویز پسند کی گئی اور اس طرح کمپنی کا نام ’’کووِڈ اِنکارپوریٹڈ‘‘ رکھ دیا گیا”
کمپنی کے نام کے حوالے سے کارسن ایک دلچسپ واقعہ بیان کرتے ہوئے بتاتے ہیں کہ فروری 2020ع میں وہ اور ان کے ساتھی ایمسٹرڈیم میں آڈیو ویژول آلات کی ایک عالمی نمائش میں شریک تھے، کہ اسی دوران وبا کے نام کا اعلان ’’کووِڈ 19‘‘ کے طور پر کیا گیا
اس وقت وبا کی ابتداء تھی اور حالات سنگین بھی نہیں تھے لہٰذا کمپنی ملازمین اس خبر سے اتنے خوش ہوئے کہ انہوں نے ’’کووِڈ‘‘ کے اسٹال پر لگے بورڈ کے سامنے کھڑے ہو کر سیکڑوں تصویریں کھینچ لیں تاکہ یادگار رہے
کارسن کہتے ہیں کہ ہماری خوش قسمتی ہے کہ ہماری کمپنی تقسیم کاروں اور ڈیلروں کے ذریعے ہی اپنی مصنوعات فروخت کرتی ہے ورنہ شاید ہمارے کاروبار کو ناقابلِ تلافی نقصان پہنچتا
بلومبرگ کے مطابق، کووِڈ انکارپوریٹڈ ایکسٹینڈرز، اسپلٹرز، وال پلیٹس، ریک پینلز، ٹولز، آڈیو ویژول کیبل اسمبلیز، سوئچرز، کنکٹرز، ایڈاپٹرز، فائبر کیبلز اور پاور کورڈز جیسی مصنوعات بنانے والی کمپنی ہے جس کا صدر دفتر ٹیمپی، ایریزونا میں واقع ہے.
