گوگل میپس کی طرز پر پاکستان کی مقامی ’ٹی پی ایل میپس‘ ایپ متعارف

دنیا کی سب سے بڑی لوکیشن ایپلیکیشن ’گوگل میپس‘ کی طرز پر پاکستانی کمپنی ٹی پی ایل نے صارفین کو راستہ بتانے والی پاکستان کی پہلی سمارٹ ’ٹی پی ایل میپس‘ نامی ایپلیکیشن آزمائشی بنیادوں پر متعارف کرائی ہے۔ یہ ایپ جدید لوکیشن ڈیٹا لوکیشن انٹیلیجنس اور جی آئی ایس خدمات کو کاروباری اور انفرادی صارفین تک رسائی فراہم کرتی ہے

پاکستان میں اس ایپ کی بدولت میپنگ میں بڑی تبدیلی کا آغاز ہونے والا ہے جبکہ کاروباری اداروں کو بھی اپنے آپریشنز میں اضافے کے لئے لوکیشن کی بنیاد پر ڈیٹا اور انٹیلیجنس معلومات کی فراہمی ممکن ہوگی

’ٹی پی ایل میپس‘ ملک میں تیار کی جانے والی پہلی مقامی میپ ایپ ہے جو کہ کاروباری اداروں سمیت عام صارفین کو بھی لوکیشن سمیت زمین کی دیگر معلومات بروقت اور درست بتاتی ہے

’ٹی پی ایل میپس‘ کی سب سے خاص بات یہ ہے کہ یہ ایپ صارفین کو ’جیوگرافک انفارمیشن سسٹم‘ (جی آئی ایس) کی صورت میں معلومات فراہم کرتی ہے

یعنی یہ ایپ صارفین کو گرافکس اور دیگر چیزوں کی مدد سے لوکیشن کو سمجھنے اور درست لوکیشن پر پہنچنے میں مدد فراہم کرتی ہے

ساتھ ہی اس ایپ کی سب سے اہم بات یہ ہے کہ یہ صارفین کو اپنی منزل پر پہنچنے کے لیے شارٹ کٹ راستے بھی بتاتی ہے اور ایپ کی بتائی گئی ڈائریکشن تقریباً درست ہوتی ہے

یوں اس بڑی تبدیلی کی حامل ایپ کو اس طرح سے تیار کیا گیا ہے کہ مقامی صارفین کو راستے کی تلاش میں فیول کی بچت، پبلک ٹرانسپورٹ اور ماس ٹرانزٹ انفارمیشن اور مقامی سطح پر مقامات کی نشاندہی سمیت سب کو ایک پلیٹ فارم پر اکھٹا کر دیا گیا ہے

ایپ کو 14 اگست کو آزمائی بنیادوں پر متعارف کرایا گیا ہے اور اسے صارفین گوگل سمیت ایپل اسٹور سے بھی مفت ڈاؤن لوڈ کر سکتے ہیں

کمپنی کی جانب سے جاری بیان کے مطابق ’ٹی پی ایل میپس‘ کو فوری طور پر ملک کے ساڑھے تین سو شہروں میں آزمائش کے لیے پیش کیا گیا ہے

ایپ میں ابتدائی طور پر تیس لاکھ سے زیادہ گھروں، تیس لاکھ سے زیادہ کاروباری مراکز اور آٹھ لاکھ کلو میٹرز تک پھیلے راستے کی درست معلومات اور لوکیشن شامل کی گئی ہے

کمپنی کے مطابق اس میپ ایپلیکیشن کو بہتر بنانے کے لیے ایک سو ملازمین کی خدمات حاصل کی گئی ہیں اور تمام ملازمین مقامی ہیں

کمپنی کے مطابق ایپ کو اپڈیٹ رکھنے اور اسے لوکیشن کو درست بتانے کے لیے بءس ڈیٹا سائنٹسٹ ہر وقت خدمت کے لیے دستیاب ہوتے ہیں

مذکورہ ایپ کو متعدد فوڈ اور لاجسٹک ڈیلیوری کمپنیاں بھی استعمال کر رہی ہیں، جب کہ عام صارفین بھی اسے استعمال کر کے کم وقت میں اپنی مطلوبہ لوکیشن تک پہنچ سکتے ہیں

ایپلیکیشن کے حوالے سے ٹی پی ایل میپس کے بانی سرور خان نے اپنے پیغام میں کہا کہ وہ اس ایپلیکیشن کو متعارف کراتے ہوئے بہت پرجوش ہیں، جو کہ پاکستان کے نقشہ سازی کے منظر نامے میں گیم چینجر ہے

انہوں نے کہا کہ پاکستانی انجینئرز اور ڈیٹا سائنسدانوں کی ہماری ٹیم نے ایک جامع نقشہ سازی کا حل تیار کرنے کے لیے انتھک محنت کی، جو انفرادی صارفین اور کارپوریٹ اداروں دونوں کو پر مبنی ہے

سرور خان نے کہا کہ ’ٹی پی ایل میپس‘ کے ذریعے ہمارا مقصد پورے پاکستان میں کاروباروں کو بااختیار بنانا ہے تاکہ وہ لوکیشن کی اہمیت کو سمجھ سکیں اور کاروباری ترقی کے لیے اس کی صلاحیت کو بروئے کار لائیں

انہوں نے کہا کہ لوکیشن کی ٹیکنالوجی پر اپنی مضبوط گرفت کے ساتھ ہم یہاں اپنے کلائنٹس کی رہنمائی کرنے کے لیے موجود ہیں کہ وہ کس طرح کاروباری کارکردگی کو آگے بڑھانے، لاگت میں بچت کے مواقع کی نشاندہی کرنے، اور اپنی مجموعی کارکردگی کو بہتر بنانے کے لیے لوکیشن کے ڈیٹا اور ذہانت سے فائدہ اٹھا سکتے ہیں۔