کراچی : اٹلس ہونڈا نے اگست 2021ع کے آخر میں اپنی مقبول ترین موٹر سائیکل سی ڈی 70 کا 2022 کا ماڈل پاکستان میں ایک سو ایک نئی تبدیلیوں کے ساتھ متعارف کرایا تھا اور اب سی جی 125 کو پیش کردیا گیا ہے
پاک وہیلز کی رپورٹ کے مطابق کمپنی کا دعویٰ ہے کہ اس مرتبہ نئے ماڈل میں صرف اسٹیکرز کو ہی تبدیل نہیں کیا گیا بلکہ فریم اور انجن میں بھی متعدد اپ ڈیٹس کی گئی ہیں
کمپنی کے دعوے کے مطابق سی جی 125 کی مکمل باڈی میں مجموعی طور پر 55 تبدیلیاں کی گئی ہیں، جن میں فرنٹ ٹائر، پیٹرول ٹینک، سیٹ، ریئر سیٹ، سائیلنسر، بریک اور گیئر باکس قابل ذکر ہیں
رپورٹ میں بتایا گیا ہے کہ نئی موٹر سائیکل میں دو اہم ترین تبدیلیاں بیئرنگ، ریڈیل بال اور ڈرم گیئر شفٹ میں کی گئی ہیں. نئے بیئرنگ کا ڈیزائن پہلے سے بہتر بنایا گیا ہے جبکہ زیادہ لوڈ کی گنجائش اور ہموار آپریشن کو یقینی بنایا گیا ہے
اسی طرح ڈرم گیئر شفٹ کا نیا ڈیزائن بھی ہموار گیئر شفٹنگ کے لیے بائیک کا حصہ بنایا گیا ہے. نئے گیئر شفٹ سے فریکشن کم ہوگا اور بائیک کی افادیت بڑھ جائے گی
رپورٹ میں مزید بتایا گیا کہ نئی سی جی 125 آئندہ ہفتے سے ملک بھر میں ڈیلرز کے پاس پہنچنے کا امکان ہے
کمپنی نے نئی موٹر سائیکل کو فی الحال پرانے ماڈل کی قیمت پر ہی فروخت کرنے کا فیصلہ کیا ہے، یعنی دستیاب ہونے کے بعد یہ نئی بائیک ایک لاکھ 47 ہزار 500 روپے میں دستیاب ہوگی
خیال رہے کہ یکم اکتوبر کو ہی اٹلس ہونڈا نے اپنی موٹر سائیکلوں کی قیمتوں میں اضافہ کیا تھا اور سی جی 125 کی قیمت میں 5 ہزار روپے اضافہ کیا گیا تھا.
