بدین / مٹھی : تھرپارکر اور بدین میں موسلا دھار بارش اور آسمانی بجلی گرنے کے واقعات میں بچوں سمیت کم از کم نو افراد کے جاں بحق ہونے کی اطلاعات ہیں، کئی افراد زخمی بھی ہوئے جبکہ درجنوں مویشی بھی ہلاک ہو گئے
تھرپارکر میں تیز بارش کے دوران مختلف مقامات پر آسمانی بجلی گرنے کے واقعات میں ایک بچے سمیت پانچ خواتین جاں بحق جبکہ ساٹھ سے زائد بکریاں اور تین اونٹ بھی ہلاک ہو گئے
آسمانی بجلی گرنے کے نتیجے میں آٹھ سالہ بچے سمیت پانچ خواتین ہلاک اور دو خواتین زخمی ہوئی ہیں۔ مٹھی کے گاؤں سوبھارو شاہ میں کنویں سے پانی بھرنے والی خواتین پر آسمانی بجلی گر پڑی، جس کے نتیجے میں چالیس سالہ لالہ بھیل اور سولہ سالہ گُڈی بھیل ہلاک ہوگئیں
اسلام کوٹ کے گاؤں کونبھاریو میں کھیت میں موجود اٹھائیس سالہ مُراداں سموں اور آٹھ سالہ بچہ مزمل مومن سموں بھی آسمانی بجلی گرنے سے جاں بحق ہوئے جبکہ چھاچھرو کے گاؤں پاڈیرال میں سترہ سالہ لڑکی کملا بھیل بھی آسمانی بجلی گرنے سے ہلاک ہوگئی
ادھر آسمانی بجلی گرنے سے تین گاؤں جیئندو درس، کبڑی اور چھہو سوٹہر میں تریسٹھ بھیڑ بکریاں اور تین اونٹ بھی مر گئے۔ بارش وقفے وقفے سے مختلف علاقوں میں دن پھر چلتی رہی
بدین ضلع کے مختلف علاقوں میں تیسرے روز بھی بارشوں کا سلسلہ جاری رہا
آسمانی بجلی گرنے کرنٹ لگنے اور دیوار کے نیچے دب کر تین افراد جاں بحق اور سولہ افراد زخمی ہو گئے ، آسمانی بجلی گرنے کے باعث حبیب اﷲ ملاح جان بحق ہو گیا جبکہ نندو کے قریب موسیٰ خاصخیلی بس اسٹاپ پر بارش میں مسافر خانہ میں پناہ حاصل کرنے والے پندرہ مسافر زخمی ہو گئے
گولارچی کے قریبی دیہات میں کرنٹ لگنے اور گرنے والی دیوار کے نیچے دب کر دو بچیاں جاں بحق ہو گئیں، جبکہ اسی دیہات میں گرنے والی دیوار کے ملبے تلے دب کر محمد صدیق جتوئی کی چار سالہ بچی سدرہ جاں بحق ہو گئی.
