چار سال بعد رکھنے کے بعد تفتان راہداری دروازہ بدھ کو کھول دیا گیا ہے۔ اسے ایرانی حکام نے کرونا وائرس کی وبا کی وجہ سے بند کر دیا تھا
واضح رہے کہ راہداری کی سہولت بلوچستان کے ایران سے متصل سرحدی علاقے تفتان، نوکنڈی اور دالبندین کے عوام کے لیے ہے، جن کی رشتہ داریاں ایران میں ہیں، وہ اس سہولت کے ذریعے وہاں جا سکتے ہیں
اس راہداری کے ذریعے چاغی کے لوگ پندرہ روز کے لیے ایرانی شہر میر جاوہ تک جا سکتے ہیں
گذشتہ دنوں ریگولر بارڈر کمیٹی کا ایک اجلاس ایرانی سرحدی علاقے میر جاوہ میں منعقد ہوا تھا، جس میں ڈپٹی کمشنر چاغی حسین جان بلوچ نے پاکستانی وفد کی قیادت کی تھی۔ اس اجلاس میں راہداری دروازے کو کھولنے کا فیصلہ کیا گیا تھا
اجلاس میں تفتان میں بازارچہ گیٹ کھولنے کا معاملہ بھی زیر غور آیا، جس پر پاکستانی حکام نے جلد عمل درآمد کی یقین دہانی کروائی
سرکاری حکام کے مطابق راہداری گیٹ ہفتے میں پانچ دن (جمعہ اور اتوار کے علاوہ) صبح نو بجے سے دوپہر دو بجے تک کھلا رہے گا
چاغی کے رہائشی اور صحافی فاروق عادل بلوچ کے مطابق راہداری دروازہ مقامی لوگوں کے لیے انتہائی اہمیت کا حامل ہے، چار سال کی بندش نے لوگوں کو اپنے رشتہ داروں سے دور رکھا
انہوں نے کہا ’ضلع چاغی میں اکثر بلوچوں کے آدھے رشتہ دار سرحد کی دوسری طرف رہتے ہیں، جن کو شادی، غمی اور دیگر قبائلی امور کے لیے سرحد پار کرنے کی ضرورت پڑتی ہے۔‘
فاروق عادل بلوچ بتایا کہ راہداری دراوزے کے ذریعے کوئی بھی شخص اپنے شناختی کارڈ کے ذریعے ڈپٹی کمشنر آفس سے پندرہ روز کے لیے راہداری حاصل کر کے ایرانی شہر میرجاوہ تک جاسکتا ہے
’راہداری کی بندش کے باعث لوگوں کو پاسپورٹ بنوانا پڑتا تھا اور پھر اس پر ویزہ لگوانا ہوتا تھا، جس میں طویل وقت درکار ہوتا تھا۔‘
وہ بتاتے ہیں ’کیوں کہ ویزے کے لیے کوئٹہ جانا پڑتا ہے اور خرچ بھی زیادہ آتا ہے تو غریب لوگ پاسپورٹ بنوانے سے قاصر تھے اور اس راہداری دروازے کے کھلنے کے منتظر تھے۔‘
دوسری جانب چاغی کے عوام نے تفتان میں راہداری گیٹ کے کھلنے کا خیرمقدم کرتے ہوئے اسے خوش آئند قرار دیا ہے۔ ان کا کہنا ہے کہ اب وہ ایران میں اپنے رشتہ داروں سے ملنے کے لیے بآسانی جاسکتے ہیں۔
