فیسبک ریلز کا دورانیہ ایک منٹ سے بڑھا کر ڈیڑھ منٹ کرنے کے علاوہ مزید کیا تبدیلیاں کر رہا ہے؟

دنیا کی سب سے بڑی سوشل ویب سائٹ فیسبک کی مالک کمپنی نے میٹا نے فیسبک ریلز کو بہتر بناتے ہوئے اس میں متعدد نئے فیچرز پیش کر دیے

واضح رہے کہ فیسبک ریلز مختصر وڈیوز کا مقبول فیچر ہے، جو کہ دراصل ٹک ٹاک سے متاثر ہوکر ابتدائی طور پر انسٹاگرام پر پیش کیا گیا تھا، جسے بعد ازاں فیسبک کا حصہ بھی بنایا گیا

فیسبک ریلز سوشل ویب سائٹ پر استعمال کیا جانے والا سب سے بڑا فیچر بنتا جا رہا ہے اور صارفین پوسٹ اور اسٹوریز کے بجائے فیسبک ریلز پر زیادہ وقت گزارتے دکھائی دیتے ہیں اور تحریری پوسٹس پڑھنے کا رواج ختم ہوتا جا رہا ہے

صارفین کی ریلز میں دلچسپی کو دیکھتے ہوئے اب فیسبک نے ریلز میں زیادہ وقت کی وڈیوز کو شیئر کرنے کا فیچر پیش کر دیا ہے

جس کے بعد صارفین اب فیسبک ریلز میں ڈیڑھ منٹ یا نوے سیکنڈ دورانیے کی وڈیوز کو بھی شیئر کر سکیں گے، جبکہ پہلے یہ دورانیہ صرف 60 سیکنڈ تھا، جب کہ اس سے بھی قبل یہ دورانیہ صرف 45 سیکنڈز تک محدود تھا۔ یعنی فیسبک بتدریج اس کے دورانیے میں اضافہ کرتا جا رہا ہے

یوں اب فیسبک صارفین ریلز میں ڈیڑھ منٹ دورانیے کی وڈیوز کو شیئر کر سکیں گے جبکہ انسٹاگرام ریلز میں پہلے ہی ڈیڑھ منٹ دورانیے کی وڈیوز کو شیئر کرنے کی سہولت موجود ہے

اسی طرح فیسبک پر شیئر کی جانے والی ریلز کو خصوصی ٹیمپلیٹس میں بنانے کا فیچر بھی پیش کر دیا گیا ہے، جو کہ اس سے قبل صرف انسٹاگرام پر تھا۔ یعنی اب صارفین مختلف اقسام کے ٹیمپلیٹس پر وڈیوز بنا کر اسے شیئر کر سکیں گے

علاوہ ازیں فیسبک ریلز میں وڈیوز میں مکسنگ یعنی ویڈیو کو دوسرے گانے میں sync کا فیچر بھی پیش کیا گیا ہے، مذکورہ فیچر بھی پہلے ہی انسٹاگرام پر موجود تھا

مزید برآں فیس بک ریلز میں ایک نئے اور زبردست فیچر کا اضافہ کیا گیا ہے، جس کے تحت صارفین اب میموریز کی وڈیوز یا تصاویر کو ریلز کی صورت میں فوری طور پر بھی شیئر کر سکیں گے

مذکورہ فیچر کو ریلز کے لیے اب تک کا بہترین فیچر قرار دیا جا رہا ہے اور صارفین اس فیچر سے زیادہ خوش دکھائی دیتے دکھائی دے رہے ہیں

اگرچہ فیسبک میں مندرجہ بالا تمام فیچرز کو پیش کردیا گیا ہے، تاہم تاحال بعض صارفین تک مذکورہ فیچرز کام نہیں کر رہے لیکن ترتیب وار صارفین کو تمام فیچرز تک رسائی دے دی جائے گی۔۔