واٹس ایپ کا کمپیوٹرز کے لیے نیا ورژن متعارف، گروپ کالنگ فیچرز میں اضافہ

میٹا کمپنی نے واٹس ایپ کے ڈیسک ٹاپ ورژن کے لیے کچھ نئی سہولیات پیش کی ہیں، جن میں انٹرفیس اس طرح بدلا گیا ہے کہ آپ کثیر افراد کے ساتھ گفتگو کر سکتے ہیں اور واٹس ایپ وڈیو کانفرنسنگ میں کئی افراد شامل ہو سکتے ہیں

فیسبک اور پیرنٹ کمپنی میٹا پلیٹ فارم کے شریک بانی مارک زکربرگ نے فیسبک پر اعلان کیا کہ ونڈوز کمپیوٹرز اور لیپ ٹاپ کے لیے نئی ایپ متعارف کرا دی گئی ہے، اس نئے ورژن میں کالنگ فیچرز کا اضافہ کیا گیا ہے، پرانی ایپلیکیشن کے مقابلے نئے ایپ کی کارکردگی بھی بہتر بنایا گیا ہے

اب اگر صارفین کا فون بند بھی ہوجائے، تب بھی وہ واٹس ایپ استعمال کر سکتے ہیں

نئی ڈیسک ٹاپ ایپ میں اب آٹھ افراد کے ساتھ وڈیو کالز اور بتیس افراد کے ساتھ آڈیو کالز کرنا ممکن ہوگا، کمپنی کا کہنا ہے کہ مستقبل میں ویڈیو کالنگ کے لیے لوگوں کی تعداد میں اضافہ کیا جائے گا

کمپنی کا کہنا ہے کہ کمپیوٹر یا لیپ ٹاپ کے ڈیسک ٹاپ پر واٹس ایپ ایپلیکیشن استعمال کرتے ہوئے گروپ کالز میں شامل ہونا آسان ہو جائے گا

اب لیپ ٹاپ اور ڈیسک ٹاپ کمپیوٹر کے لیے واٹس ایپ ورژن کو تیز رفتار لوڈنگ کے قابل بنایا گیا ہے اور یہ ہموار انداز میں کام کرتا ہے۔ دوسری جانب ایک سے زائد ڈیوائس سنکنگ کو بھی بڑھایا گیا ہے۔ اسی طرح پری ویوز دیکھنے اور اسٹکرز کی صلاحیت کو بھی بڑھا گیا ہے۔

تاہم میٹا نے کہا ہے کہ واٹس ایپ ڈیسک ٹاپ میٹنگ میں اوتار اور تھری ڈی ماڈل موجود نہیں ہوں گے۔ لیکن میٹا نے یہ اعلان بھی کیا ہے کہ وہ جلد اینڈروئڈ ٹیبلٹ کے لیے بھی واٹس ایپ کا نیا ورژن پیش کرے گا جس میں دیگر نئی سہولیات رکھی جائیں گی

ڈیسک ٹاپ کے لیے نئے واٹس ایپ ایپلیکیشن واٹس ایپ کے ٹوئٹر اکاؤنٹ پر جا کر دیے گئے لنک پر کلک کرکے ڈاؤنلوڈ کی جا سکتی ہے

اس سے قبل کمپنی نے مزید دو نئے فیچرز متعارف کروائے تھے، پہلے فیچر میں کسی واٹس ایپ گروپ میں شامل افراد کی تعداد میں ڈبل اضافہ کیا گیا ہے، گروپس کے اراکین کی تعداد 512 سے بڑھ کر 1024 کیے جانے کا اعلان کیا گیا تھا۔

دوسرا ’وائس اسٹیٹس‘ کا فیچر پیش کیا گیا تھا، جس سے وائس نوٹ کے ذریعے واٹس ایپ اسٹیٹس لگاسکیں گے۔