جاپان کی الیکٹرانک کاریں بنانے والی کمپنی ’ایس پارک‘ کی تیار کی گئی گاڑی نے حال ہی میں تیز ترین رفتار سے چلنے کے دو حیران کن عالمی ریکارڈز اپنے نام کیے ہیں
‘آؤل’ نامی الیکٹرک کار نے دونوں ریکارڈ شمالی انگلینڈ کے الوینگٹن ایئر فیلڈ میں بنائے
کار نے ایک چوتھائی میل کا سفر 318.85 کلو میٹر فی گھنٹہ رفتار سے طے کیا، جب کہ ایک میل کا آٹھواں حصہ 309.02 کلو میٹر فی گھنٹہ رفتار سے طے کر کے دو عالمی ریکارڈز بنائے
’ایس پارک‘ کی یہ تیز ترین کار صرف 1.72 سیکنڈز یعنی دو سیکنڈز سے بھی کم وقت میں صفر سے 96 کلومیٹر فی گھنٹہ رفتار تک کی اسپیڈ تک پہنچنے کی صلاحیت رکھتی ہے
اس الیکٹرک کار کی بیٹریوں کو چارج کرنے کے لیے صرف چالیس منٹ درکار ہوتے ہیں
ایک بار جب الیکٹرک گاڑی مکمل چارج ہو جائے تو یہ کار لگ بھگ چار سو کلو میٹر تک کا سفر طے کر سکتی ہے
واضح رہے کہ اس گاڑی کی سب سے زیادہ رفتار 418 کلو میٹر فی گھنٹہ ہے
جہاں اس الیکٹرک کار میں کئی خصوصیات ہیں، وہیں اس کی قیمت بھی کافی زیادہ ہے
‘آؤل’ کو خریدنے کے خواہشمند افراد کو اس کے لیے 25 لاکھ پاؤنڈز (لگ بھگ 85 کروڑ روپے) کی ادائیگی کرنا ہوگی
واضح رہے کہ جاپان کے شہر اوساکا کی یہ کمپنی 2015ع سے الیکٹرک الٹرا پرفارمنس گاڑیوں کی تیاری پر کام کر رہی ہے
اس کمپنی میں لگ بھگ ساڑھے تین ہزار ملازمین کام کرتے ہیں، جب کہ دنیا کے مختلف ممالک میں اس کے پچیس دفاتر ہیں۔
