سُقطرا (سُقُطْریٰ) کلچر اتنا ہی خطرے سے دوچار ہے، جتنا یہاں کے حیوانات اور نباتات کی مشہور انواع۔۔ بحر ہند میں یمن کے ساحل پر واقع یہ پراسرار جزیرہ گارڈافوئی چینل اور بحیرہ عرب کے درمیان واقع ہے۔ اس کے نام کا مطلب قدیم سنسکرت زبان میں نعمتوں کا جزیرہ ہے۔
سقطرا کی دوسری دنیاوی خوبصورتی کو میڈیا نے صرف اس کی منفرد قدرتی خصوصیات کی بنیاد پر پیش کیا ہے۔ اس کے خون والے ڈریگن کے درخت، بخور اور مختلف قسم کے حیوانات اور نباتات کرہ ارض پر کہیں اور نہیں مل سکتے۔ پودوں اور حیوانی زندگی کی اس کی سات سو سے زیادہ الگ الگ شکلوں کے اعتراف میں، اسے یونیسکو کی طرف سے 2008 میں بطور عالمی ثقافتی ورثے کا خطہ منتخب کیا گیا
تاہم، یہ جزیرہ تقریباً لگ بھگ پچاس ہزار لوگوں کا گھر بھی ہے، جن کے منفرد ثقافتی ورثے کو اکثر نظر انداز کیا جاتا ہے۔ جس میں سقطری ثقافت میں تحفظ کی روایتی تکنیک، قدرتی ادویات، ماہی گیری کے طریقے اور سب سے اہم بات یہ ہے کہ سقطری زبان، جو اب معدومیت کے دہانے پر ہے، شامل ہیں
قدیم تاریخ
سقطرا اپنی منفرد نباتات کی دولت کے لیے جانا جاتا ہے۔ پہلی صدی قبل مسیح کی کہانیاں بیان کرتی ہیں کہ سقطرا نے پوری دنیا کو مرر, افیم کا ٹنکچر اور دیگر خوشبودار پودے فراہم کیے۔ ایک افسانہ یہ ہے کہ مصری اس کے لوبان کے لیے سقطرا جایا کرتے تھے کیونکہ کہا جاتا تھا کہ یہاں کے درختوں کی رال روحوں کو بعد کی زندگی تک پہنچنے میں مدد دیتی ہے۔ سقطرا کے بوسویلیا کے درختوں کی رال آج بھی دنیا کی بہترین بخور کے طور پر جانی جاتی ہے
ایک اور روایت کے مطابق، یونان نے چوتھی صدی قبل مسیح میں سقطرا کی جانب ایک گروہ بھیجا۔ بحری سفر کا مقصد ایلو اور دیگر پودوں پر قابو پانا تھا جو جزیرے پر آزادانہ طور پر اگتے ہیں۔ اس وقت بھی، ڈریگن کے خون کا رس اپنی شفایابی کی صلاحیتوں کے لیے جانا جاتا تھا اور رومی سلطنت نے اس کی تلاش کی تھی۔ اس کا رس گلیڈی ایٹرز کو استعمال کروایا جاتا تھا، جو اسے لڑائی سے پہلے اپنے زخموں کی شفا یابی کو تیز کرنے کے لئے لگاتے تھے
تاہم، سقطرا کے باشندوں نے اپنی زبان لکھنے کے لیے کبھی کوئی طریقہ وضع نہیں کیا۔ لہٰذا، جزائر کے بارے میں جو کچھ جانا جاتا ہے وہ غیر ملکی ریکارڈوں میں ان لوگوں کے ذریعہ پایا جاتا ہے، جو وہاں رہے ہیں۔ ان ریکارڈوں کے مطابق، سقطرا پر مختلف ادوار میں مختلف قومیتوں نے حکومت کی۔ ان میں ہندوستانی، یونانی، پرتگالی، عمانی سلطنت اور برطانوی شامل ہیں۔ ان میں سے بہت سے جزیرے پر ساتھ ساتھ رہتے تھے۔ ان کا جینیاتی اثر جزیرے کے باشندوں میں نظر آتا ہے
اسٹریٹجک مقام یوئر
سقطرا کی جغرافیائی حیثیت نے قدیم دنیا میں ایک بڑا کردار ادا کیا۔ بحر ہند کو عبور کرنے والے ملاحوں کے لیے یہ ایک مقبول ٹھہراؤ تھا۔ ملاح اور سوداگر درختوں کی رال اور دواؤں میں استعمال ہونے والی جڑی بوٹیاں لے کر دور دراز کی سلطنتوں کو بیچتے تھے۔ ان دوروں کے ثبوت کے طور پر حوق غاروں اور دیگر مقامات پر نوشتہ جات مل سکتے ہیں۔ ان میں سے کچھ نوشتہ جات کافی خوفناک ہیں کیونکہ سقطرا کی بارشیں ایک وقت میں مہینوں تک جزیرے کو باقی دنیا سے کاٹ دیتی تھیں۔ ان ملاحوں نے اسے بد روحوں اور جنوں سے منسوب کیا۔ ایک سسلین مصنف نے سقطرا کو ’قینا اور عدن سے گزرنے والی جنوبی عرب بخور سڑک کا آغاز‘ کے طور پر بیان کیا، جو قدیم تجارتی راستوں میں اس کی اہمیت کو ظاہر کرتا ہے۔
سقطری ثقافت اور زبان
جزیرے کا زیادہ تر اسرار اس کی آبائی سقطری ثقافت میں پوشیدہ ہے، دنیا میں دوسری ثقافتوں کے برعکس سقطری ثقافتی ورثے کے امیر ہونے کے لیے بہت سی وجوہات ہیں۔ سب سے پہلے، بیرونی دنیا کے ساتھ کم سے کم رابطے نے ایک لسانی ٹائم مشین بنائی ہے جس میں ان زبانوں کے آثار ہیں جو عربی سے پہلے کی ہیں۔ اس جزیرے کی تنہائی نے زبان کو بیرونی اثرات سے بچانے کا کام کیا ہے
اس کے نتیجے میں جزیروں کے باشندوں کی جانب سے استعمال کی جانے والی منفرد زبان، سقطری تھی۔ سقطری کی جڑیں سب سے قدیم تحریری سامی زبانوں سے ملتی ہیں، جو ہزاروں سال پہلے ختم ہو گئی تھیں۔ سقطری زبان نے بعض صوتیاتی (صوتی) خصوصیات تیار کیں۔ اس کو اب کچھ سائنس دان جدید سامی زندہ زبانوں میں سب سے قدیم زبان سمجھتے ہیں۔ نتیجے کے طور پر، یہ ربط قدیم زمانے کے ثقافتی آثار کو تلاش کرنے کے ممکنہ طریقے فراہم کرتا ہے کیونکہ سقطرا عرب سرزمین کے اثرات سے بہت طویل عرصے تک کٹا رہا تھا۔ اگرچہ سقطری زبان کی کوئی تحریری شکل نہیں ہے، لیکن اس کے باوجود یہ زمانوں تک زندہ رہنے میں کامیاب رہی۔ جو چرواہوں، ماہی گیروں اور بستیوں کی مادری زبان کے طور پر بولی جاتی رہی ہے
اظہار کا بڑا ذریعہ، شاعری
دوسری اہم بات یہ ہے کہ ثقافتی طور پر شاعری اور گانا ایک روایتی سقطری کی روزمرہ کی زندگی کا ایک حصہ ہے۔ ان کے دوسروں کے ساتھ بات چیت کرنے کا ایک طریقہ ہے، چاہے وہ انسان ہوں، جانور ہوں، مُردوں کی روحیں ہوں، جن جادوگر ہوں یا خدا۔ یہ ان کی سماجی اور روحانی زندگی کا ایک اہم حصہ ہے۔ زبانی روایات، جیسے شاعری، نسل در نسل منتقل ہوتی ہے۔
خیال کیا جاتا ہے کہ سقطری کے پہلے معروف شاعر کا دور نویں صدی عیسوی ہے۔ فاطمہ السقطریہ سقطری ثقافت کی ایک مقبول شخصیت ہیں۔ السقطریہ کے بارے میں فی الحال بہت کم معلومات ہیں۔ اگرچہ خیال کیا جاتا ہے کہ وہ تیسری صدی ہجری (اسلامی کیلنڈر) کے دوران جزیرے سقطرا میں پیدا ہوئی تھیں۔ اس کا تعلق سقطرا کے حکمران سے تھا۔ آج بھی اس طرزِ زندگی کو سالانہ شعری مقابلے کے ذریعے منایا جاتا ہے، جو مختلف ثقافتوں سے آنے والوں کو راغب کرتا ہے
شاعری سادہ لوک کہانیوں کے ساتھ ساتھ سقطرا کے قدیم ترین افسانوں کی بھی نمائندگی کرتی ہے، جو زیادہ تر نامعلوم ہیں۔ ٹیمیتھل Temethel سقطری شاعری کی سب سے مشہور شکل ہے۔ شاعری کی یہ شکل لوک داستانوں کے دلچسپ مختصر شاعرانہ ٹکڑوں یعنی چار مصرعوں پر مبنی قطعات پر مشتمل ہے۔ یہ سقطرا کی زبانی لوک داستان کی بہترین مثالیں ہیں۔ یہی وجہ ہے کہ سقطری شاعری پر تحقیق قابل اعتماد مقامی بولنے والوں کی مدد سے ہی ممکن ہے
شاعری سقطری کو معاشرے کی روایات اور مشترکہ علم سے اپنا تعلق ظاہر کرنے کے قابل بناتی ہے۔ لہٰذا، سقطری مرد چار مصرعوں پر مبنی شاعری کے بند زیادہ سے زیادہ جاننے پر فخر کرتے ہیں۔ آج تک ہر جشن میں شاعری کے ’مقابلے‘ منعقد ہوتے ہیں۔ یہ شعری مقابلے ایک ’ریپ جنگ‘ کے مترادف ہیں جن میں حصہ لینے والوں کی طرف سے ایک کے بعد ایک مختصر اشعار پڑھے جا رہے ہیں۔ سب سے زیادہ قطعات جاننے والے شاعر کو فاتح کا تاج پہنایا جاتا ہے
محققین نے یہ بھی دریافت کیا ہے کہ چند سطروں کو جاننا انہیں قبائل خصوصاً سقطری بیڈوین تک رسائی دینے میں کردار ادا کر سکتا ہے۔ اسے سقطری ثقافت اور زبان کے تئیں ان کا احترام ظاہر کرنے کے طریقے کے طور پر دیکھا جاتا ہے
سقطری زبان کی بقا کو لاحق خطرہ
ڈریگن کے درختوں کی طرح جن کی تعداد کم ہو رہی ہے، سقطری زبان بھی آہستہ آہستہ ختم ہو رہی ہے۔ جزیرے پر، سقطری شاعری اور شاعروں کی مہارت کو نظر انداز کیا گیا ہے۔ عربی زبان کے اثر کی وجہ سے سقطری زبان بولنے والے سب عربی سے اصطلاحات کو برتنے لگے ہیں۔ عربی سرکاری زبان ہے جو اسکولوں میں پڑھائی جاتی ہے۔ ساحلی علاقوں میں زیادہ تر لوگ دو لسانی ہیں۔ تاہم، دیہی علاقوں میں، خاص طور پر بوڑھے لوگوں میں، سقطری اب بھی واحد زبان ہے، جس میں وہ اپنے خیالات کا اظہار کرتے ہیں
تیزی سے بدلتی دنیا میں اب سقطری زبان کو ترقی کی راہ میں رکاوٹ کے طور پر دیکھا جاتا ہے۔ اس کی وجہ یہ ہے کہ نئی نسل یہ نہیں سمجھتی کہ اس میں جزیرے کی سماجی و اقتصادی حالت کو بہتر بنانے کی طاقت ہے۔ سقطری کی دوسری حدود بھی ہیں، جیسے کہ تحریر کے ذریعے بات چیت کرنے کے قابل نہ ہونا۔ مزید برآں، طلباء کو اسکول میں رہتے ہوئے سقطری بولنے کی اجازت نہیں ہے اور ملازمت کے متلاشی افراد کو ملازمت حاصل کرنے سے پہلے عربی بولنا ضروری ہے۔ یہاں تک کہ نوجوان سقطری عربی کو سقطری پر ترجیح دیتے ہیں۔ اب وہ اسے سیکھنے کے لیے جدوجہد کر رہے ہیں، اکثر اسے عربی کے ساتھ ملا دیتے ہیں
سقطری بولنے والے اپنی زبان پر شرمندہ ہوتے ہوئے بڑے ہوتے ہیں کیونکہ انہیں بتایا گیا تھا کہ یہ ایک ایسی بولی ہے، جسے صرف گنوار لوگ بولتے ہیں۔ زبان کے تئیں ثقافتی جذبات اور پھر بے حسی دکھائی دیتی ہے۔ یہ غفلت اور اس خیال کی وجہ سے ہوسکتا ہے کہ یہ ان کو محدود کرتا ہے۔ سقطری کو اب شدید خطرے سے دوچار زبان کے طور پر دیکھا جاتا ہے
سقطری زبان کی طرح اس کی ثقافت کو بھی خطرہ لاحق ہے۔ یہ الگ تھلگ جزیرہ تیزی سے بدلتے ثقافتی ماحول کے ساتھ بہت زیادہ جدید کاری سے گزر رہا ہے۔ نتیجے کے طور پر، سقطری لوک کلور ورثہ کی قیمتی علامات کے کھونے کا بہت زیادہ امکان ہے، جسے سقطری لوگوں نے صدیوں سے محفوظ کیا تھا۔ اس کے نتیجے میں زندگی کے روایتی طریقے اور ان کی قدیم الفاظ کا نقصان ہو سکتا ہے
سقطرا کی زبانی لوک داستانوں میں وہ روایات ہیں جو سقطری ثقافت میں عام ہیں۔ لوک داستانیں ان نوادرات کی ایک خطے سے دوسرے علاقے یا ایک نسل سے دوسری نسل تک منتقلی کو بھی مجسم کرتی ہیں۔ زبان کی عمر کی وجہ سے، سقطری لوک داستانیں لکھی ہوئی قدیم سامی روایات کے بہت سے موضوعات اور ادبی خصوصیات کو سمجھنے میں مدد کرتی ہیں، جن میں عہد نامہ قدیم، یوگاریٹک مہاکاوی، اور یہاں تک کہ اسیرو-بیبیلونی، میسوپوٹیمیائی ادب بھی شامل ہے۔ لیکن اس سے بھی اہم بات یہ ہے کہ یہ اب بھی کچھ تھیمز کو برقرار رکھتا ہے، جو مشرق وسطی میں انسانی تہذیب اور مذاہب سے متعلق ہیں
ماہرین کا کہنا ہے کہ بھرپور شاعرانہ سقطری کلچر کو آئندہ نسلوں کے لیے دستاویزی شکل دینے کی ضرورت ہے۔ سرزمین یمن پر سیاسی بدامنی کی وجہ سے، جس سے سقطری تکنیکی طور پر تعلق رکھتی ہے، اس بارے میں اب بھی کوئی ثقافتی پالیسی نہیں ہے کہ غیر عربی زبانوں کے بارے میں کیا کیا جانا چاہیے
سقطری زبان ڈیڑھ صدی سے کم عرصے سے سائنسی مطالعہ کا موضوع رہی ہے، بہت کم محققین کو اس شعبے میں اس کا مطالعہ کرنے کا اعزاز حاصل ہوا ہے۔ ایسا کرنے والی پہلی مہم 1898 میں ویانا اکیڈمی آف سائنس (آسٹریا) کی طرف سے جنوبی عربی مہم (sudarabiche Expedition) تھی، جس کے سربراہ ڈیوڈ ہینرک مولر تھے۔ ان تمام کوششوں کا نتیجہ 1902 اور 1907 کے درمیان متاثر کن کاموں کا ایک سلسلہ ہے، جس میں 1938 میں بھیریا لیسلاو کی لیکسیک سقطری کو شامل کیا گیا۔ سقطرا جانے والے دوسرے ماہر لسانیات 1967 میں ٹی ایم جوہونسٹون تھے، جو جدید جنوبی عربی زبانوں کے ماہروں میں سب سے بہتر تھے، لیکن بدقسمتی سے وقت سے پہلے انتقال کر گئے۔ آخر میں 1970 کے بعد سے سقطرا کا ایک اور بہت اہم وزیٹر اہم طور پر نومکن تھا، جو کہ ایک روسی ماہر بشریات ہے، جس میں لسانیات کی ناقابل تردید صلاحیتیں تھیں۔ واحد مغربی شخص جو سقطرا کو روانی سے بولنے میں کامیاب ہوا
زبان کو دستاویزی شکل دینے کے لیے سقطری آوازوں کو لاطینی حروف تہجی کے ذریعے بہتر طور پر ظاہر کیا جاتا ہے، تاہم جزیرے کے مذہب اور دفتری زبان کی وجہ سے، بہت سے ماہرین کا استدلال ہے کہ اسے عربی رسم الخط میں لکھا جانا چاہیے۔ 1889 میں، آسٹریا کے ایک مستشرق، ڈیوڈ ہینرک مولر نے سقطری زبانی شاعری کی کئی مثالیں لکھنے کے لیے عربی رسم الخط کو استعمال کرنے کی کوشش کی تھی
یہ دلیل اس روسی ماہر لسانیات کے ذریعے عربی رسم الخط پر مبنی ایک آسان سقطری حروف تہجی کی ایجاد کا باعث بنی۔ سقطری کی صوتیات کی عکاسی کرنے کے لیے، انہوں نے عربی حروف تہجی میں چار حروف شامل کرنے کا فیصلہ کیا۔ انہوں نے ایسی علامتیں استعمال کیں جو برصغیر پاک و ہند کی زبانوں میں غیر عربی آوازوں کا اظہار کرتی تھیں۔ لیکن، چونکہ جزیرے کے باشندے عربی کو ترجیح دیتے ہیں، اس لیے یہ مزید عربی پر مبنی ثقافت کی طرف بڑھنے کی حوصلہ افزائی کر سکتا ہے
اس ترقی کی وجہ سے سقطری ایک تسلیم شدہ معیاری ادبی زبان ہے۔ اس پیچیدہ اور متنازعہ اقدام کو ’نیا سقطری تحریری نظام‘ کہا گیا۔ نیا اسکرپٹ سقطری بولنے والوں کو دکھایا گیا، جنہیں اسے پڑھنے میں کوئی دقت نہیں ہوئی۔ امید کی جا سکتی ہے کہ اس سے سقطریوں کو اپنی مادری زبان کی تحریری تخلیق میں حصہ ڈالنے اور محققین کے کام کو جانچنے، منظور کرنے اور درست کرنے میں مدد مل سکتی ہے
تاہم زبان کو دستاویز کرنے کے اس دلچسپ نئے طریقے کے باوجود، شاید پہلے ہی بہت دیر ہو چکی ہے۔ جزیرہ نما کی تیز رفتار ترقی اور اس کے وسیع عرب دنیا تک کھلنے کا مطلب یہ ہے کہ سوقوطری کے معدوم ہونے کا امکان ہے
زبانی روایات طویل عرصے سے ثقافتی اور تاریخی یادداشت کو محفوظ رکھنے کا ایک اہم ذریعہ رہی ہیں، اس لیے زبان کھونے کا مطلب سقطری ثقافت اور سقطری لوگوں کی شناخت کھو دینا ہے۔ پہلے سے ہی، ایک ایسے وقت میں جب قدیم الفاظ اور محاورات کی تفہیم میں مشکلات پہلے ہی ایک بڑھتا ہوا مسئلہ ہے، یہ سب سقطری زبانی ورثے کے محفوظ شدہ دستاویزات، ایک بڑی زبانی غیر تحریری ’لائبریری‘ کے نقصان کا سبب بن سکتا ہے۔ اس سینہ بہ سینہ پھیلتی آئی لائبریری میں ایک منفرد زبان کا ذخیرہ، ترقی یافتہ لوک شاعری اور نثری روایات ہیں۔ اس میں بین الثقافتی رابطوں کے ثبوت کے متعدد ٹکڑے بھی شامل ہیں، جن میں سقطرا نے قدیم دور میں ایک پل کا کردار ادا کیا تھا۔ سقطری افسانوں اور لوک داستانوں میں یوریشیا کی لوک روایت کے ساتھ بہت ساری موضوعاتی اور داستانی مماثلتیں ہیں، جس سے ماہرین کو ان روایات کے سیاق و سباق اور معنی کو سمجھنے میں مدد مل سکتی ہے۔
نوٹ: اس فیچر کی تیاری میں یوایئر میں شائع یوسف مناظر کے مضمون سے مدد لی گئی ہے۔ ترتیب و ترجمہ: امر گل
