مائکروسافٹ کے شریک بانی اور دنیا کے امیر ترین افراد میں سے ایک بل گیٹس نے حال ہی میں ایک پوڈکاسٹ میں بات کرتے ہوئے دماغ کو صحت مند اور تیز بنانے کا آسان ترین طریقہ بتایا ہے
بل گیٹس کا کہنا تھا ”جب میں مائکروسافٹ کو سنبھال رہا تھا، تو نیند پر توجہ نہیں دیتا تھا۔ میں اپنے ساتھیوں کو بتاتا تھا کہ میں صرف چھ گھنٹے سوتا ہوں، تو ان کا جواب ہوتا تھا کہ ہم تو صرف پانچ گھنٹے سوتے ہیں اور کئی بار تو سوتے ہی نہیں“
انہوں نے مزید بتایا ”میں اس وقت سوچتا تھا کہ زبردست! یہ سب تو بہت اچھے ہیں، مجھے بھی سخت کوشش کرنا ہوگی، کیونکہ نیند تو سُستی کی نشانی ہونے کے ساتھ ساتھ غیر ضروری ہے“
لیکن جب بل گیٹس کے والد الزائمر کی بیماری کے شکار ہوئے تو انہوں نے دماغی صحت کے بارے میں جاننا شروع کیا
وہ بتاتے ہیں ”الزائمر سے تحفظ فراہم کرنے کے لیے اچھی نیند بہت زیادہ اہم ہوتی ہے، درحقیقت اس سے ہی دماغی تنزلی کے امراض کی پیشگوئی کی جا سکتی ہے“
اس کے بعد بل گیٹس نے اپنے معمول کو تبدیل کیا اور اچھی نیند کو یقینی بنانا شروع کیا
انہوں نے بتایا کہ وہ ہر رات کم از کم سات گھنٹے سوتے ہیں اور اپنے ’سلیپ اسکور‘ کو روزانہ چیک کرتے ہیں
واضح رہے کہ سلیپ اسکور سے مراد نیند کا دورانیہ اور معیار ہے
انہوں نے یہ تو واضح نہیں کیا کہ وہ کس طرح اپنا ’سلیپ اسکور‘ کو چیک کرتے ہیں مگر ان کا کہنا تھا کہ طاقتور اور تیز دماغ کے لیے اچھی اور معیاری نیند انتہائی ضروری ہے
خیال رہے کہ 2021 میں شائع ہونے والی ہارورڈ میڈیکل اسکول کی ایک تحقیق میں بتایا گیا تھا کہ جو افراد پانچ گھنٹے سے کم وقت تک سونے کے عادی ہوتے ہیں، ان میں ڈیمینشیا یا جلد موت کا خطرہ چھ گھنٹے سونے والوں کے مقابلے میں دوگنا زیادہ ہوتا ہے
امریکا کے سینٹرز فار ڈیزیز کنٹرول اینڈ پریونٹیشن کے مطابق بیس سے چونسٹھ سال کی عمر کے افراد کو بہترین جسمانی اور ذہنی صحت کے لیے ہر رات سات سے نو گھنٹوں کی نیند کو یقینی بنانا چاہیے
پوڈ کاسٹ پر، سیٹھ روزن نے گیٹس سے اتفاق کرتے ہوئے کہا کہ ان کی ساس کی الزائمر کی تشخیص نے انہیں نیند کو زیادہ سنجیدگی سے لینے کی ترغیب دی
روزن نے کہا، ”جب میں جوان تھا، سمجھتا تھا کہ ’جب آپ مر جائیں گے تو آپ سوئیں گے۔ نیند اتنی اہم نہیں ہے۔ آپ کو نیند کی ضرورت نہیں ہے،‘ اور اب ہم پہلے ہی جان چکے ہیں کہ یہ مکمل طور پر سچائی کے خلاف ہے، اور اگر کچھ بھی ہے، تو نیند ایک اہم چیز ہے، جو آپ اپنے دماغ کو صحت مند رکھنے کے لیے کر سکتے ہیں۔“
ہمارے جسم کا ’سرکیڈیئن کلاک‘ اور نیند کا صحت سے تعلق، جن کا جاننا بہت ضروری ہے
