امریکی ریاست ٹینیسی کے شہر میں کرسمس ڈے پر ایک وین خوفناک دھماکے سے تباہ ہو گئی تھی، جس میں سے ملنے والی انسانی باقیات کے ڈی این اے سے مشتبہ بمبار کی شناخت 63 سالہ انتھونی کوئن وارنر کے نام سے ہوئی ہے
تفصیلات کے مطابق امریکی میڈیا رپورٹس میں بتایا گیا ہے کہ کرسمس ڈے پر نیشویل کے ریسٹورینٹ اور دفاتر سے آباد پُررونق علاقے میں فائرنگ کی اطلاع پر ایک پولیس اہلکار وہاں پہنچا تھا۔ جائے وقوعہ پر ایک وین کھڑی تھی جس کا سائرن بج رہا تھا تاکہ آس پاس سے لوگ دور ہٹ جائیں
دریں اثنا پولیس اہلکار وین کے قریب جانے ہی والا تھا کہ خوفناک دھماکا ہو گیا. دھماکا اتنا شدید تھا کہ پولیس اہلکار 3 فٹ فضا میں اُڑ کر زمین پر آن گرا اور شدید زخمی ہو گیا
اس دھماکے میں کوئی ہلاکت نہیں ہوئی تھی تاہم قریب موجود ٹیلی کام آفس مکمل طور تباہ ہو گیا، جس سے ٹینیسی سمیت چار دیگر ریاستوں کے مواصلاتی نظام میں خرابی پیدا ہوگئی تھی
ابتدائی تفتیش کے دوران تباہ حال وین سے انسانی باقیات ملنے پر کہا گیا تھا کہ یہ خود کش حملہ تھا، تاہم اب انسانی باقیات کے ڈی این اے سے خود کش بمبار کی شناخت 63 سالہ انتھونی کوئن وارنر کے نام سے ہوئی ہے
پولیس کا کہنا ہے کہ مزید تفتیش جاری ہے تاہم ابھی تک خود کش حملے کی وجہ اور ہدف کا تعین نہیں کیا جا سکا ہے۔ جب کہ مشتبہ خودکش بمبار کا کوئی مجرمانہ رکارڈ بھی نہیں ملا.
