لندن : امریکا کے خفیہ ادارے سی آئی اے کے سابق اہلکار اور خفیہ دستاویزات منظر عام پر لانے کے حوالے سے شہرت رکھنے والے جلاوطن امریکی صحافی ایڈورڈ اسنوڈن نے دنیا کو خبردار کیا ہے کہ ہیکرز سے کوئی بھی فون محفوظ نہیں ہے، لہٰذا اس ضمن میں فوری طور پر ایکشن لینا ہوگا
ایڈورڈ اسنوڈن نے پیگاسس پراجیکٹ کے حوالے سے اخبار دی گارجین کو دیے گئے انٹرویو میں این ایس او گروپ کے بارے میں انکشافات کے تناظر میں خبردار کیا کہ حکومتوں کو بین الاقوامی اسپائی ویئر تجارت پر عالمی سطح پر پابندی عائد کرنی چاہیے یا ایسی دنیا کو قبول کر لینا چاہیے جس میں کوئی بھی موبائل فون ریاستی سرپرستی میں ہیکرز سے محفوظ نہیں
ایڈورڈ نے کہا کہ آپ کا فون ہر طرح سے آپ کی جاسوسی کر رہا ہے، بظاہر آپ کا فون آپ خود استعمال کر رہے ہیں لیکن دراصل اس پر پہلے ہی بذریعہ ہیکنگ کسی اور کا کنٹرول ہے
ایڈورڈ اسنوڈن نے کہا کہ اگر ہم آئی فون کی بات کریں تو دنیا بھر کے تمام فونز میں ایک ہی سافٹ ویئر موجود ہوتا ہے، اگر وہ ایک آئی فون ہیک کرنے کا طریقہ جان سکتے ہیں تو بے شک وہ تمام آئی فونز کو ہیک کرسکتے ہیں اور وہ یہ کررہے ہیں جس سے لوگوں کا ڈیٹا بیچا جارہا ہے
اسنوڈن کا کہنا تھا کہ اس بات سے کوئی فرق نہیں پڑتا کہ آپ کس ملک میں رہ رہے ہیں یا کونسی زبان بول رہے ہیں، ہم سب کے ساتھ یہ ہورہا ہے، ہم لوگوں کو اسے ہر حال میں روکنے کی ضرورت ہے، اگر ہم نے ٹیکنالوجی کی اس فروخت کو نہ روکا تو ابھی صرف پچاس؛ ہزار لوگ اس سے متاثر ہوئے ہیں، یہ تعداد پچاس ملین تک پہنچ سکتی ہے
انہوں نے عام لوگوں کو مشورہ دیا کہ کوئی بھی شخص انفرادی طور پر اس مسئلے کا حل نہیں نکال سکتا، اس مسئلے پر اس وقت تک قابو نہیں پایا جاسکتا جب تک ہم ان کا کھیل تبدیل نہ کردیں.
