لاپاز : کیسا لگے گا اگر کسی ریسٹورنٹ میں اپنے من پسند برگر سے لطف اندوز ہوتے ہوئے برگر کے ساتھ انسانی انگلی بھی دانتوں کے درمیان آ جائے..؟ یقیناً یہ الفاظ پڑھ کر اور اس کا تصور کرتے ہی آپ نے جھرجھری لی ہوگی!
لیکن ایسا بولیویا کی ایک خاتون اسٹیفنی بینتیز کے ساتھ حقیقت میں ہوا ہے، انہوں نے مقامی اسٹور سے برگر خریدا اور گھر پہنچ کر اسے کھانا شروع کیا تو انہیں منہ میں کسی عجیب شے کا احساس ہوا، جب انہوں نے اسے نکال کر دیکھا تو وہ کچھ اور نہیں، بکلہ انسانی انگلی تھی!
اسٹیفنی نے اس ہولناک واقعے کی اطلاع فورا ریسٹورنٹ کے مینیجر اور پولیس کو کی، اسٹیفنی نے اپنی فیسبک پوسٹ میں اس ہولناک واقعے کے بارے میں پوسٹ کرتے ہوئے لکھا ہے کہ ’برگر کھاتے ہوئے میں نے انسانی انگلی بھی چبا لی۔‘
انہوں نے اپنی پوسٹ میں برگر سے نکلنے والی انگلی کی تصویر اور وڈیو بھی شیئر کی۔ وڈیو میں انہیں برگر شاپ کے مینیجر سے گفتگو کرتے ہوئے دکھایا گیا ہے، جو انہیں کہہ رہے ہیں کہ ’مجھے بتائیے، آپ کو کیا چاہیے، وہ ہم آپ کو دے دیں گے۔‘
اسٹیفنی کی اس وڈیو کو اب تک ساٹھ ہزار سے زائد افراد دیکھ چکے ہیں اور ممکن ہے یہ سطور پڑھتے وقت اس تعداد میں کہیں زیادہ اضافہ ہو چکا ہو
وڈیو وائرل ہونے کے بعد کمپنی کے ترجمان نے وضاحتی بیان جاری کرتے ہوئے کہا ہے کہ دراصل یہ انگلی ان کے ایک ملازم کی ہے، جو کہ گوشت کاٹتے وقت کٹ گئی تھی اور اسی گوشت سے بننے والا برگر غلطی سے اسٹیفنی کو فروخت کردیا گیا
ریستوران کے ترجمان کے بیان کی تصدیق کرتے ہوئے پولیس ڈائریکٹر ایڈسن کلار کا کہنا تھا کہ کام کے دوران کمپنی کے ایک ورکر کی انگلی کٹ گئی تھی۔ تاہم انسانی انگلی کے برگر میں شامل ہونے کی غفلت پر اس کی متعلقہ برانچ کو عارضی طور پر بند کرتے ہوئے کمپنی پر جرمانہ بھی عائد کر دیا گیا ہے.
