بھارت کے فاسٹ بولر محمد شامی کے تعلقات کچھ سال پہلے اپنی اہلیہ سے خراب ہوئے تو انہیں میچ فکسنگ کے الزامات کا بھی سامنا کرنا پڑا
سنہ 2018ع میں تعلقات کی خرابی کے بعد حسین جہاں نے اپنے شوہر محمد شامی پر میچ فکسنگ کے الزامات لگائے تھے، جس کے بعد بھارتی کرکٹ بورڈ کے اینٹی کرپشن یونٹ نے بھارتی فاسٹ بولر کے خلاف تحقیقات کا بھی آغاز کیا تھا
بھارتی کرکٹ بورڈ نے تحقیقات کے بعد فاسٹ بولر محمد شامی کو کلیئر قرار دیا تھا، لیکن آج بھی یہ قصہ خبروں کی زینت بنا ہوا ہے
بھارت کے سابق فاسٹ بولر اشانت شرما نے ایک انٹرویو میں کہا ہے کہ جب محمد شامی کے خلاف تحقیقات شروع ہوئیں تو ان سے بھی اس حوالے سے تفتیش کاروں نے سوالات کیے
این ڈی ٹی وی کے مطابق اشانت شرما کا کہنا ہے ’میری محمد شامی سے بات ہوئی تھی اور انہوں نے اس موضوع پر مجھ سے تفصیل سے چیزیں شیئر کی تھیں۔‘
اشانت شرما کا مزید کہنا تھا کہ ’اینٹی کرپشن یونٹ نے ہم سب سے رابطہ کیا تھا اور پوچھا تھا کہ محمد شامی میچ فکسنگ کر سکتے ہیں یا نہیں۔‘
اشانت شرما کے مطابق انہوں نے اینٹی کرپشن حکام کو بتایا ’مجھے محمد شامی کی ذاتی زندگی کے بارے میں زیادہ نہیں پتا، لیکن مجھے دو سو فی صد یقین ہے کہ وہ ایسا (میچ فکسنگ) نہیں کرسکتے اور میں انہیں اچھی طرح سے جانتا ہوں۔‘
واضح رہے کہ محمد شامی 61 ٹیسٹ میچوں میں انڈیا کی نمائندگی کر چکے ہیں جن میں وہ 219 وکٹیں حاصل کرچکے ہیں، جبکہ 87 ون ڈے میچوں میں ان کی وکٹیں 159 ہیں
دائیں ہاتھ سے بولنگ کرنے والے 32 سالہ فاسٹ بولر 23 ٹی20 میچوں میں بھی انڈیا کی نمائندگی کرچکے ہیں جن میں ان 24 وکٹیں ہیں۔
