لندن : پاکستان میں فٹ بالرز کےلیے بڑی خبر سامنے آگئی، انگلش لیجنڈ مائیکل اوین جلد پاکستان آئیں گے۔ سابق انگلش فٹبال کھلاڑی مائیکل اوون نے پاکستان فٹبال لیگ (پی ایف ایل) سے سفیر مقرر کیے جانے کے تین سالہ معاہدے پر دستخط کر دیے ہیں
گلوبل سوکر وینچرز (جی ایس وی) سے جاری بیان میں کہا گیا کہ مائیکل اوون، پاکستان فٹبال کی باگ ڈور سنبھالیں گے تاکہ انگلینڈ میں فٹ بال کی طاقت سے قوم کو متحد کرکے اسٹریٹجک پارٹنرشپ پروگرام وضع کرنے میں مدد مل سکے، اوون اکتوبر میں فٹبال کے گڑھ انگلینڈ میں پی ایف ایل کے لوگو کی رونمائی کریں گے
وہ فٹبال ماسٹر کلاسز کی سیریز کے انعقاد اور پی ایف ایل کے لوگو کی باضابطہ رونمائی کے لیے جلد پاکستان کا دورہ بھی کریں گے
پاکستان کے ایک نجی ٹی وی چینل سے گفتگو میں انگلش فٹبال لیجنڈ نے کہا کہ 22 کروڑ کی آبادی والے پاکستان میں فٹ بال کے لئے بہت کچھ کیا جاسکتا ہے
انہوں نے کہا کہ بہت جلد پاکستان آرہا ہوں، یہاں پہنچ کر لیگ کے ذریعے فٹ بال کو سپورٹ کروں گا
اُن کا کہنا تھا کہ میں یہ نہیں کہتا کہ پاکستان دس سال میں ورلڈ چیمپئن بن جائے گا، لیکن بہت کچھ بہتر ہوسکتا ہے
انگلش فٹ بال لیجنڈ نے کہا کہ پاکستان میں کرکٹ کی بڑی فالوونگ ہے، مگر فٹ بال فینز بھی کم نہیں ہوں گے
جبکہ جی ایس وی کی جانب جاری بیان میں مائیکل اوون کے حوالے سے کہا گیا ہے کہ پاکستان، فٹبال کے باصلاحیت کھلاڑیوں کی جنت ہے، پاکستان فٹبال لیگ کے لیے کام کرنا اعزاز سمجھتا ہوں اور پاکستان میں فٹبال کو جدید خطوط پر استوار کرنا میرا مشن ہوگا
گلوبل سوکر وینچرز کے سی ای او زیب خان نے کہا کہ مائیکل اوون کا پاکستان آنا قوم کے لیے ایک اعزاز ہے، وہ فٹبالروں کی صلاحیتوں کو صحیح سمت میں موڑنے کا ہنر جانتے ہیں
ان کا کہنا تھا کہ بہت جلد پاکستان فٹبال لیگ کی فرنچائزز کی تقریب رونمائی ہوگی اور فرنچائزز مالکان کا بھی بہت جلد اعلان ہوگا
خیال رہے کہ مائیکل اوون انگلش پریمیئر لیگ، ریئل میڈر، لیورپول ایف سی اور مانچسٹر یونائیٹڈ کے لیے خدمات سرانجام دے چکے ہیں. وہ انگلش پریمیئر لیگ کے کم عمر ترین 100 گول کرنے والے کھلاڑی کا اعزاز رکھتے ہیں، جبکہ لیگ کے 10 سب سے زیادہ گول کرنے والے کھلاڑیوں میں بھی شمار ہوتے ہیں.
