سعودی عرب نے ایک سو ساٹھ ملکوں کے طلبہ کی سہولت کے لیے ’ادرس فی السعودیہ‘ (سعودی عرب میں تعلیم حاصل کریں) کے عنوان سے ایک تعلیمی پلیٹ فارم متعارف کرایا ہے
سعودی عرب کی وزارت تعلیم اس کے تحت مختصر اور طویل المدتی تعلیمی ویزے جاری کرے گی
العربیہ نیٹ کے مطابق سعودی کابینہ نے مختصر مدتی اور طویل مدتی تعلیمی ویزا جاری کرنے کا فیصلہ کیا ہے۔ اس سے یونیورسٹیوں میں طلبہ و طالبات اور اسکالرز کو فائدہ ہوگا۔ انہیں یہ ویزا جاری کیا جائے گا
وزارت تعلیم نے کہا ہے کہ تعلیمی ویزے کے اجرا کا مقصد منفرد استعداد رکھنے والے طلبہ و طالبات اور اسکالرز کو سعودی عرب کے تعلیمی اداروں اور ریسرچ سینٹر اور انسٹیٹیوٹ سے جوڑنا ہے۔
سعودی وزارت تعلیم کے مطابق: اس کا مقصد عربی زبان کی تعلیم، اعتدال پسندی اور میانہ روی جیسی پاکیزہ اقدار کے پرچار میں سعودی عرب کی خدمات کا دائرہ وسیع کرنا ہے
وزارت تعلیم نے بتایا کہ یہ ویزہ اساتذہ اور اسکالرز کو بھی جاری کیا جائے گا۔ مختصر مدتی ویزا ایک سال کا ہوگا اور طویل مدتی ویزہ مکمل تعلیمی پروگرام کے لیے جاری کیا جائے گا
وزارت تعلیم کا کہنا ہے کہ ایک سو ساٹھ ممالک کے طلبہ اس اسکیم سے فائدہ اٹھاسکیں گے۔ نو زبانوں میں ڈیٹا ریکارڈ کرنے کا موقع دیا جائے گا۔ ویزا درخواستیں متعلقہ اداروں کو پیش کی جائیں گی۔ علاوہ ازیں مملکت میں تعلیمی کارروائی کو آسان بنایا جائے گا۔ جبکہ غیرملکی طلبہ کے لیے اسپانسر کی شرط نہیں ہوگی
یاد رہے کہ سعودی عرب، پاکستان کے لیے اسکالر شپ اسکیم منظور کیے ہوئے ہے۔ دونوں ملک تعلیمِ، تدریس اور ریسرچ کے مختلف پروگراموں سے جڑے ہوئے ہیں۔ نئی اسکیم سے فائدہ اٹھانے والوں میں پاکستانی طلبہ و طالبات اور سکالر بھی شامل ہوں گے۔
